మన కాలపు స్ఫూర్తి ప్రదాతలు-7

ఒకప్పుడు 50 ఏళ్ల క్రిందట చెర బండ రాజు అనే కవి

“ విప్లవాలయుగం మనది- విప్లవిస్తె జయం మనదె..” అని మహోద్రేకంగా పాడుతూ ఉండేవాడు. అతని కవితలెంత వరకు యదార్థమో అతని స్వప్నాలెంతదాక ఋజువైనవో గాని... మన సమకాలం ముఖ్యంగా ఈ 21 వ శతాబ్దం ద్వితీయ దశకం మాత్రం సామాజిక పరిశీలకులకు

 “ స్వచ్చోద్యమ యుగం మనది- ఉద్యమిస్తె జయం మనది....” అనిపించక మానదు. అటు 2014 ఆగస్టు 15 తరువాత కేంద్ర, రాష్ట్ర ప్రభుత్వాల వైఖరులు గాని, ఇటు చాలా రాష్ట్రాలలో ఎక్కడికక్కడ స్వచ్చంద సామాజిక శ్రమదాన సందడులు గాని పుట్టుకొచ్చిన దశాబ్దమది. వైయక్తికంగా కాక, ఒక సామాజిక- సామూహిక- సత్ప్రేరణ గా 2014 నవంబరు 12 నుండి- సుదీర్ఘ కాలం నిరాఘాటంగా - 2070 రోజుల పాటు ప్రజ్వరిల్లిన చల్లపల్లి స్వచ్చంద శ్రమదాన ఉద్యమం గాని, దాని ప్రేరణలుగా, అనుకరణలుగా, 25-30 గ్రామాలలో పరిఢవిల్లిన ప్రజా ప్రయోజనకర ఉద్యమాలుగానీ ఇటీవలి చరిత్రే!

ఇవి కాక:

2015 అక్టోబరు 15 న ఒంగోలులో శిరసెత్తిన “ భూమి ఫౌండేషన్” వారి శుభ్ర-సుందర ఉద్యమం కొంత భిన్నమైనది. ఒక 20 ఏళ్ల యువతి - తేజస్వి తన ఊరి గోడల- వీధుల- పార్కుల జుగుప్సాకర దృశ్యాలను చూసి, తన ఒంగోలు పట్టణ పరిశుభ్రత విషయంలో ‘ హిందూ’ పత్రికలో కించపరుస్తున్న వ్రాతల్ని చదివి, అవమానపడి, మథనపడి ప్రారంభించిన ఉద్యమం అది!  విద్యార్థులతోనూ, వివిధ రంగాల ఉద్యోగులతోనూ, శని ఆది వారాలలో సుదీర్ఘ కాలంగా జరిగిన ఒంగోలు పట్టణ స్వచ్చ-శుభ్ర-సుందరీకరణ ప్రయత్నం అది! ఉదయం 5.00 కే 60-70 మంది “ భూమి ఫౌండేషన్ “ కార్యకర్తలు ముందుగా నిర్ణయించుకొన్న – ఊరిలో కెల్ల నికృష్ట ప్రదేశాన్ని చేరుకొని, నాలుగైదు గంటలలో దానిని  శుభ్రపరచి, రంగులద్ది, సమూలంగా మార్చివేసి, సర్వాంగ సుందరంగా తీర్చిదిద్ది, చెరగని ముద్ర వేసే కార్యక్రమం అది!

తొలినాళ్లలో- తొలి ప్రయత్నాల వేళలో అన్ని ఉద్యమాలలాగే  అవహేళనలెదుర్కొని, అడుగడుగునా అకారణ ప్రతి బంధాలను తొలగించుకొని, మొక్కవోని పట్టుదలను నిలుపుకొని, ఆ అవహేళనకారులను – ఆ అకారణ అపహాస్య బ్రహ్మలను కూడ ఆకర్షించి, అక్కున చేర్చుకొని అప్రతిహతంగా పురోగమించిన “భూమి...... ఉద్యమం” అందరికీ స్ఫూర్తిదాయకం కాకపోతుందా?

ఆంధ్ర దేశంలోని 13 వేల,  భారతదేశంలోని 6 లక్షల ఊళ్లు స్వాగతించి, ఆచరించి, తరించదగిన ఉద్యమం!

- పది మందితో ఐదేళ్ల నాడు మొదలైన ఈ ప్రయాణంలో ఇప్పుడు రెండు వేల మందికి పైగా వచ్చి చేరారు!

- ఒంగోలు లోని 100 కు పైగా వికృతమైన దారులు, పార్కులు, చోటులు ప్రస్తుతం కనువిందుచేసే కమనీయ దృశ్యాలు!

- భాగ్యనగరానికి కూడ విస్తరించిన “భూమి ఫౌండేషన్” తేజస్సు అక్కడి అసంఖ్యాక అనాకారి కూడళ్లను, జన సమ్మర్ద ప్రాంతాలను కూడ సుందరీకరిస్తూనే ఉన్నది.

- గత ప్రభుత్వ సమయంలో రెండేళ్లలోనే రెండు మార్లు స్వచ్చాంధ్ర అవార్డులు ఒంగోలు పట్టణానికి దక్కాయి!

- కాలక్రమాన తెలంగాణ ప్రభుత్వ ప్రశంసలకూఈ సంస్థ పాత్రమైంది.

- ఆ హిందూ పత్రికే ‘స్వచ్చ సర్వేక్షణ్’ ప్రకారం ఒంగోలుకు దేశమంతటిలో నాల్గవ స్థానమని ప్రచురించింది.

అన్నింటినీ మించి, గత ఏప్రిల్ మాసంలో – కరోనా కష్ట కాలంలో - తేజస్వి కుటుంబం తమిళ దేశ వలస కూలీలను వందలాది మంది ఆకలి తీర్చి, బ్రతికించడమే అత్యంత మానవీయ సన్నివేశం!

అందుచేత-దేశ వ్యాప్తంగా ప్రతి గ్రామానికీ, పట్టణానికీ కనీసం ఒక యశస్వి ఐన తేజస్వి తప్పక ఉండాలనీ, ఆమె మనస్సులో తన ఊరి దుస్థితి పట్ల రోషం పొడుచుకురావాలనీ, ఆ బాధనుండి ఆయా గ్రామాల సమస్యలకు పరిష్కారాలు దొరకాలనీ కోరుకొందాం!   

అప్పటి దాకా ఎవరి జన్మ స్థలాల జుగుప్సాకర దృశ్యాలు వారి కంట పడినప్పుడు-

“ బాధే సౌఖ్యమనే భావన రానీవోయ్!

ఆ ఎరుకే నిశ్చలానందమోయ్- బ్రహ్మానందమోయ్.....”

అనే 1953 నాటి  ‘మల్లాది / సముద్రాల /దేవదాసు’ సినిమా పాటను (ఘంటసాల) గుర్తుచేసుకొందాం.

 - నల్లూరి రామారావు

స్వచ్చ సుందర చల్లపల్లి కార్యకర్త

చల్లపల్లి - 14.08.2020