ఒక్కసారికి మాత్రమే పనికొచ్చే ప్లాస్టిక్ వస్తువులను వాడం!
N.H.216 వ జాతీయ రహదారి శుభ్ర-సుందరీకరణ లక్ష్య పరిపూర్తి @2235*.
ఈ గురువారం నాటి 25 మంది స్వచ్చ దీక్షా పరుల మూడు వారాల శ్రమ ఫలించి, 2 ½ కిలో మీటర్ల జాతీయ రహదారిలో-అటు చల్లపల్లి మొదలు ఇటు కప్తాన్ పాలెం మలుపుదాక స్వచ్చంగాను, చూసేందుకు రెండు కళ్ళు చాలవనేంత అందంగాను రూపొందింది. ఇందుకుగాను ఈ వేకువ 4.19 సమయనికే 14 మంది కాసానగర కాసారం దగ్గర దారి కశ్మల విధ్వంసానికి సంసిద్ధులైన వైనాన్ని గమనించారా?
ఈ సువిశాల రహదారి మనోజ్ఞత వెనుక, హరిత సుమ సుందర ఆహ్లాదకర సన్నివేశాల వెనుక గతంలో లెక్కలు కాక, మళ్ళీ ఈ నెల నుండి ఎందరి సహృదయత, అంకుఠిత దీక్ష, ఐదారు వందల పని గంటల శ్రమదానం ఉన్నవో ఇప్పుడైనా నూరుశాతం మంది గ్రామస్తులు, రహదారి పథికులూ ఆలోచిస్తారా? ఇదంతా అప్పనంగా ఆకాశం నుండి ఊడి పడ్డదేమీ కాదనీ, కార్యకర్తల శ్రమ-దమ-వ్యయ పూర్వక కృషి ఫలితమనీ గ్రహిస్తారా? గ్రహిస్తే-ఇక నుండైనా మరికొందరు సామాజిక బాధ్యులు వచ్చి పాల్గొంటారా?
నేటి కార్యకర్తల ప్రయత్నం ప్రధానంగా 3 విధాలుగా జరిగింది :
- కాసానగర సరోవర తూర్పు భాగంలో అందవిహీనంగా ఉన్న కొన్ని పెద్ద చెట్ల కొమ్మల ఖండనం,
- మిగిలిపోయిన నాలుగైదు పూల మొక్కలకు ఊతం నిలిపి, త్రాడు చుట్టి భద్రపరచిన విధానం.
- చెరువు దక్షిణ గట్టును, ఊరిలోకి పోయే దారిని, అక్కడ నివాసాల ఎదుట తెగ పెరిగిన తిక్క మొక్కల్ని, ముళ్ల చెట్లనీ అవసరాన్ని బట్టి సమూలంగా తీసేయడం, (ఈ పనే ఎక్కువమంది కార్యకర్తల శ్రమనూ, సమయాన్నీ దక్కించుకొన్నది!) వాస్తవానికి-అసలీ పని ఎవరిది? 3-4 కిలోమీటర్ల దూరం నుండి వేకువ చీకట్లో వచ్చి, వానలో తడుస్తూ పని చేయడం స్వచ్చోద్యమ కారుల బాధ్యతా? లేక కాసానగర నివాసితుల కర్తవ్యమా?
- నేటి నాలుగోరకం శ్రమదానం-ముఖ్యంగా ముగ్గురు మహిళా కార్యకర్తల పట్టుదలేమంటే – చెరువు బారునా, స్థానిక దేవాలయం దగ్గరా, ఉప రహదారి మలుపు దాక చేతులు నొప్పి పెట్టినా విడవక ఊడ్చి శుభ్రపరచడం.
ఈ నాటి ముఖ్య సంతోషకర విషయమేమంటే-కాసానగరం నుండి చెక్ పోస్టు ఉద్యోగి – దాసు అనే వ్యక్తి కార్యకర్తలతో చేయి కలపడం.
మరొక ఆసక్తికర సమాచారమేమనగా – ప్రాతూరి శంకర శాస్త్రిగారు (ఆయన పెన్షన్ లో అదనంగా డి.ఎ. కలిసిన మిషతో) పర్యావరణ హానికరం కాని, బహుకాల వాడకానికనువైన చేతి సంచుల్ని పంచడం!
స్వచ్చోద్యమ ప్రతీకలైన స్వచ్ఛ - శుభ్ర - సౌందర్య సంకల్ప నినాదాలను నేడు విస్పష్టంగా ప్రకటించిన వారు శివరామపురం స్వచ్ఛ కార్యకర్త లౌవ్లీ వేంకటేశ్వరరావు కాగా, ఇంత అద్భుత రహదారి రూపు రేకల్నీ,అందుకు కారణమైన కార్యకర్తల శ్రమనూ ప్రశంసించినదీ, రేపటి కృషి కేంద్రాన్ని ప్రస్తావించినదీ డాక్టరు D.R.K గారు;
రేపటి శుక్రవారం వేకువ మనం కలిసి పాటుబడదగిన చోటు – పాగోలు రోడ్డులోని మహాబోధి స్కూలు ముఖద్వారం వద్ద!
ఇట్టి వాళ్ళకె నా ప్రణామం – 11
జీవితాన్నే ఉదాహరణగ చేసి చూపిన మహాత్ములకూ
స్వార్ధమేలని-పరుల బాగుకె ప్రబోధించిన మహాకవులకు
వారసులుగా ఊరి బాధ్యత కుద్యమించిన కార్యకర్తకు
సమర్పిస్తా నిండు మనసుతొ సవినయంబగు ఒక ప్రణామం!
ఒక ‘స్వచ్ఛ సుందర చల్లపల్లి’ కార్యకర్త
23.09.2021.