ఒక్కసారికి మాత్రమే పనికొచ్చే ప్లాస్టిక్ వస్తువులను ఎవ్వరమూ వాడవద్దు!

2248* నాళ్ళ స్వచ్చోద్యమ గమనంలో నేటి క్లిష్టమైన అడుగులు.

ఈ వేకువ 4.30 కాకముందే 3 – 4 కిలోమీటర్లు ప్రయాణించి, వాట్సాప్ తొలి చిత్రంలో కనిపిస్తున్న 19 మంది ఎక్కడ నిలబడ్డారో గమనించారా? ఈ పెద్ద ఊరి తడి – పొడి చెత్తల కుళ్ళు కంపుల కేంద్రమైన డంపింగ్ యార్డులో! స్వల్ప వ్యవధిలోనే వాళ్ళతో కలిసిన 14 మంది – వెరసి ఈ 33 మంది 100 నిముషాల పాటు ఏం సంపాదించారు? (సారీ – ఏం సాధించారు) అని ప్రశ్నిస్తే – కాస్తంత సామాజిక చైతన్యం, ఉన్న ఊరి పట్ల కొంతైనా శ్రద్ద - బాధ్యత ఉన్న వాళ్ళకే అది పూర్తిగా అర్ధమౌతుంది!

            పుట్టుకతో చల్లపల్లి వాళ్ళు కాక, ఉద్యోగ రీత్యా, గ్రామ స్ధుతి పట్ల ఆసక్తి దృష్ట్యా రోజూ వేకువనే ప్రక్క గ్రామాల నుండి వచ్చి మరీ – ఇంతటి భీభత్స దుర్గంధం  నడుమ అక్కడి కుళ్ళు చెత్తను పెళ్లగిస్తున్న గ్రామ సింహాల – ఊర పందుల సరసన ఈ డాక్టర్ల, ఉద్యోగుల, గృహిణుల, ట్రస్టు ఉద్యోగుల, వయోవృద్ధుల స్వచ్చ – శుభ్ర – సౌందర్య చర్యలెందుకో – బాధ్యతగా, సానుభూతిగా ఆలోచించే కొద్దిమందికి తప్ప – ఇప్పుడున్న అనాలోచిత, అయోమయ స్వార్ధ సహిత సమాజానికి అర్ధం కాకపోవచ్చు!

            ఇలా ప్రశ్నిస్తే – వక్కాణిస్తే చాల మందికి వింతగా, కొందరికభ్యంతరకరంగా ఉండవచ్చు గాని, 365 రోజులూ – 24 గంటలూ సొంత బ్రతుకు లాభం వెంట పరుగులెత్తడం తప్ప, గంటసేపైనా ఊరి కోసం పాటుపడని అధిక సంఖ్యాకుల నడుమ – ఎడారుల్లో ఒయాసిస్ లాగా – మండు వేసవిలో చిరుజల్లులాగా ఈ చల్లపల్లిలో నడుస్తున్న స్వచ్చోద్యమాన్నీ, తత్కార్యకర్తల నిరంతర – బాధ్యతాయుత – శ్రమదానాన్ని గుర్తించి, ప్రస్తుతించడం మాత్రమే నా ఉద్దేశం!

            మన గ్రామ స్వచోద్యమ నాటకంలో ప్రతి రోజూ జరిగే అంకం వేరు, నేటి కథ వేరు. మురుగు కంపులకీ, కశ్మల దౌర్భాగ్యానికీ అలవాటు పడిన ఈ కార్యకర్తలు కాక, కొత్తవాళ్లే గనుక ఈ పనిలో దిగితే- ముక్కులు మూసుకుని, కళ్ళు తిరిగి, వాంతులు చేసుకుని, దూరంగా పరుగెత్తే కథ ఇది!(తొలి నాళ్లలో ఇదే ప్రాంతంలో అలాంటి దృశ్యాలు బాగానే కనిపించాయి!) అందుకు మినహాయింపు – తణుకు నుండి వచ్చి, గత రెండు మూడు నాళ్ళుగా వెనకడుగు వేయని-వెరవని పశు సంవర్థక శాఖ ఉద్యోగి సాయిబాబు. ఈనాటి భీకర – భీభత్స – చెత్త కేంద్ర పారిశుద్ధ్య సేవల్లో నన్ను బాగా కదిలించిన కొన్ని సన్నివేశాలు:

- నలుగురు స్త్రీ కార్యకర్తలు చీకట్లో శ్మశానం ప్రక్కన చీపుళ్లతో, గోకుడు పారల్తో డంపింగ్ రోడ్డునుఊడ్చి, గోకి, ఇదొక సిమెంటు రోడ్డే’ అని నిరూపించడం.

- ఇంత వేకువ వేళ, ఇంతటి గాఢ దుర్గంధ వాతావరణంలో ఒకరితో ఒకరు పోటీ పడి, పరస్పరం ప్రోత్సహించుకొని 100 గజాల సిమెంటు దారిని బాగుచేయడం.

- ఐదారుగురైతే - పెద్దపెద్ద చెత్త గోనె సంచుల్ని సైతం అవలీలగా రోడ్డుకు దూరంగా దక్షిణానికి జరపడం.

            గంటన్నర కు పైగా కుళ్ళు చెత్తల, ఛండాలపు కంపుల మీద పోరాడినా సరే- తమ విజయానికి గుర్తుగానో, స్థైర్యానికి ప్రతీకగానో- పూల మొక్కల నడుమ గాక, తమ పోరాట క్షేత్రంలోనే సమీక్షా సమావేశం నిర్వహించినప్పుడు- ఈనాటి స్వచ్చోద్యమ చారిత్రక ఘట్టాన్ని వర్ణించడానికి డాక్టరు DRK గారికి సరైన మాటలే దొరక లేదు. మాలెంపాటి అంజయ్య మాత్రం ఆ నాలుగైదెకరాల ప్రదేశం మారుమ్రోగేంతగా ముమ్మారు స్వగ్రామ స్వచ్చ-శుభ్ర-సౌందర్య సాధక సంకల్పాన్ని నినదించి, నేటి కార్యక్రమాన్ని ముగించారు!

            రేపటి వేకువ మన పారిశుద్ధ్య పోరాట ప్రదేశం- శ్మశానం దక్షిణపు ఎదుట.

         ఈ మహాత్ములకే ప్రణామం – 23

కశ్మలాలతొ భయోద్విగ్నత - అంటు జబ్బుల అధిక రుగ్మత

ఆహ్లాద లుప్తత తో అస్వస్తత - పారిశుద్ధ్యం లోప భ్రష్టత

క్రమ్ము కొచ్చిన సొంత ఊరిని కాపు గాసిన సాహసాత్మక

కార్యకర్తల ఉద్యమానికి ఘన నివాళులతో ప్రణామం!

ఒక సీనియర్ ‘స్వచ్ఛ సుందర చల్లపల్లి’ కార్యకర్త

08.10.2021.