ఒక్కసారికి మాత్రమే పనికివచ్చే ప్లాస్టిక్ వస్తువులను వేటినీ వాడం

స్వచ్ఛ సుందర చల్లపల్లి ఉద్యమం – 1725* వ నాటి శ్రమ విన్యాసం.

ఈ వేకువ 4.08 – 6.05 నిముషాల మధ్య రెండు శివరామపురాల మధ్య కోళ్ల ఫారాల సమీపంలోని రోడ్డు మార్జిన్ల లోను, చల్లపల్లి ప్రధాన వీధిలోను స్వచ్ఛ సేవలలో కృతార్ధులైన వారు 24 మంది.

– వీరిలో ఐదుగురు స్వచ్చ యోధులు బందరు మార్గంలోని మురుగు కాల్వ ప్రక్క పడి ఉన్న పనికిరాని మూత రాళ్లను పగులగొట్టి ట్రాక్టర్ కెత్తి చెత్త కేంద్రపు అసంపూర్ణ మార్గంపై పరచి వచ్చారు. బహుశా మరి కొన్ని వారాలలో వీళ్ల చేతిలో ఆ రోడ్డు పూర్తి కావచ్చు.

– ఇక మిగిలిన వారు యధా విధిగా శివరామపురం రోడ్డు మార్జిన్ల అశుభ్రత మీద, అనాకారితనం మీద దండెత్తారు.

కొందరు ఖాళీ మద్యం సీసాలు, ప్లాస్టిక్ సంచులు ఏరగా, కొందరు పిచ్చి-ముళ్ల మొక్కల పని బట్టగా, సుందరీకరణ బృందం వారి చేతులు గతం లో తాము పెట్టి, పెంచిన చెట్ల కొమ్మలు కత్తిరించి, ఆ పచ్చదనానికి మెరుగులు దిద్దాయి.

అంతకు ముందటి మొక్కల పాదుల్ని కొన్ని చేతులు సరిజేశాయి. ఉభయ దిశల్లో పంట పొలాల మధ్య – తెల తెలవారుతున్న ఆ చల్లని శుభోదయాన-మైకు నుండి వినిపిస్తున్న కొసరాజు రాఘవయ్య ఏరువాక పాట అచ్చ తెలుగుదనం గుబాళింపులలో- స్వచ్ఛ సుందర కర్తల హాస్యోక్తుల నడుమ-స్వార్ధం కోసం గాక-పరుల కోసం 1724 రోజులుగా సునాయాసంగా సాగుతున్న ఈ

‘’ శ్రమ బంధుర సుమ సుందర యదార్థ దృశ్యం’’ నా వంటి కొందరికి (శ్రీ శ్రీ పేర్కొన్నట్లు ) ‘క్షణికమై, శాశ్వతమైన బ్రహ్మానుభవం!

ఆర్భాట మెరుగని స్వచ్ఛ కార్యకర్త లక్ష్మణ రావు స్వచ్చోద్యమానికి నమస్కరిస్తూ, ముమ్మారు పలికిన స్వచ్ఛ సంకల్ప నినాదాలు మిగిలిన కార్యకర్తల గళాలలో ప్రతిధ్వనించి, 6.40 నిముషాలకు నేటి స్వచ్చ సేవ ముగిసింది.   

నాలుగు కిలోమీటర్లు ప్రయాణించి మరీ ఈ స్వచ్ఛ కార్యకర్తలకు బిస్కెట్ ప్యాకెట్ల పంపిణీ చేసిన పెద్దలు ఉడత్తు రామారావు గారు అభివందనీయులు.

అమెరికాలో మన కార్యకర్త నాదెళ్ల సురేష్ ‘’ చల్లపల్లి స్వచ్ఛ మారథాన్’’ కు అనుకరణగా-జ్ఞాపికగా ఈ 4 వ తేదీ ఆదివారం చల్లపల్లి స్వచ్ఛ సుందర టాయిలెట్ల(నాగాయలంక రోడ్డు) నుండి మోపిదేవి వరకు(6 km) నడవాలని కార్యకర్తల సంకల్పం.  

రేపటి మన స్వచ్చంద సేవ కూడా శివరామపురంలో ప్రేమానంద్ గారి ఇంటి దగ్గర .

          ఐదేళ్లనాడు(2014లో)

ఒక్కమారే వాడి వదలే దిక్కుమాలిన ప్లాస్టిక్ తుక్కులు

ప్రజారోగ్యం క్రుంగదీస్తూ – పర్యావరణం దెబ్బ తీస్తూ-

భూమి మనుగడ అంతు జూస్తూ-బోర విరుచుక పెరుగునప్పుడు

చల్లపల్లి స్వచ్ఛ సైన్యం సమర దుందుభి మ్రోగు చప్పుడు!

– నల్లూరి రామారావు

స్వచ్ఛ సుందర చల్లపల్లి కార్యకర్త మరియు

సభ్యులు – మనకోసం మనం ట్రస్టు

శుక్రవారం – 02/08/2019

చల్లపల్లి.

4.10 కు శివరాంపురమ్ ప్రేమానంద్ గారి ఇంటి వద్ద

బందరు రోడ్డులో రద్దు రాళ్లు ఎత్తుతున్నారు
అందంగా వున్న కోనో కార్పస్ మొక్క మొక్కకు కంపకడుతున్నారు

Powered by Facebook Like