ఒక్కసారికి మాత్రమే పనికివచ్చే ప్లాస్టిక్ వస్తువులను వేటినీ వాడం

స్వచ్ఛ సుందర చల్లపల్లి ఉద్యమం – 1727* వ నాటి విశేషాలు.

నేటి ప్రాతఃకాలం (70+20) 90 మంది వివిధ వృత్తుల, సంఘాల వారు పాల్గొన్న సామాజిక చైతన్య సేవ 4.40 – 6.50 నిముషాల మధ్య విజయవంతమైనది.

నిర్ణీత ప్రణాళిక ప్రకారం 4.35 కే నాగాయలంక దారి – స్వచ్ఛ సుందర టాయిలెట్ల వద్దకు చేరుకొన్న కార్యకర్తలు 70 మంది ఒక వంక స్వచ్చతా గీతాలు మైకు నుండి వింటూ – నినాదాలతో – చేతుల్లో జెండాలతో – కాసానగర్ – పెదప్రోలు – భాషిత పాఠశాలల వద్ద మాత్రం ఐదేసి నిముషాలు ఆగి – 5కి.మీ. దూరంలోని మోపిదేవి సుబ్రహ్మణ్యేశ్వరాలయానికి 6.15 నిముషాలకు చేరుకున్నారు.

ఆలయానికి తూర్పు, దక్షిణ మార్గాలలో దుమ్మును ప్లాస్టిక్ సంచుల్ని, టీ కప్పుల్ని, ఇతర వ్యర్ధాలను చీపుళ్ళతో ఊడ్చి, శుభ్రపరిచారు. అక్కడి వందలాది మంది భక్తులకు , మోపిదేవి సెంటర్లోని ప్రజలకు తమ సేవాపూర్వక – వినయ పూర్వక హెచ్చరికలతో – నినాదాలతో – అభ్యర్ధనలతో స్వచ్చ – శుభ్రతా స్ఫూర్తిని కల్గించే ప్రయత్నం చేశారు.

ఈ రెండు గంటల కార్యక్రమం ఆద్యంతం ఘంటశాలకు చెందిన నందేటి శ్రీనివాస్ ప్రతి సెంటర్ లోనూ తన పాటలతో – మాటలతో స్వచ్చ సైన్యం 1727 రోజుల ప్రస్థానాన్ని వివరిస్తూ – నినదిస్తూ – సమన్వయపరుస్తూ అంతటా తానై విహరించాడు.

స్వచ్చ సైనికులతోబాటు నడక సంఘం, మెకానిక్ ల సంఘం, లయన్స్ క్లబ్, రోటరీ క్లబ్, ధ్యానమండలి, ఆర్యవైశ్య ప్రముఖులు, మహిళలు, పిల్లలు, పెద్దలు పాల్గొన్నారు. మోపిదేవిలో కొందరు వీరితో కలిశారు.

స్వచ్చోద్యమ సారధి డాక్టర్. రామకృష్ణ ప్రసాదు గారు సేవానంతర సమావేశంలో ఈ ఉద్యమ లక్ష్యాలను వివరించి, జులై మాసపు ఆదాయ వ్యయాల వ్యత్యాసాన్ని తెలిపారు. ‘మనకోసం మనం’ ట్రస్టుకు ఈ క్రింది దాతల విరాళాలను కృతజ్ణతతో స్వీకరించారు.

ప్రాతూరి శంకర శాస్త్రి గారు : 5000/-

          రవివర్మ గారు : 5000/-

          కోడూరు వేంకటేశ్వరరావు గారు : 500/-

          సాంబశివరావు గారు : 500/-

          గోళ్ళ వెంకటరత్నం గారు : 300/-

          పొనమాల చిన్నబ్బాయి గారు : 1000/-

తక్షణ స్పందనగా మోపిదేవి వాస్తవ్యులు రావి రామనాధబాబు గారు : 1001/-

వీరందరి స్వచ్చోద్యమాభిమానానికి, ప్రోత్సాహకానికి స్వచ్చోద్యమ చల్లపల్లి ధన్యవాదములు.

స్వచ్చ కార్యకర్తల సేవలకు సానుకూలంగా స్పందించిన మోపిదేవి వాస్తవ్యులకు, వ్యాపారులకు, బడ్డీ, టీ కొట్ల మిత్రులకు మా కృతజ్ఞతలు.

కార్యక్రమానంతరం శ్రీ భాషిత పాఠశాలలో పొనమాల చిన్నబ్బాయి – కమలశ్రీ దంపతులు అల్పాహారం పేరుతో ఇచ్చిన విందును స్వీకరించి 7.50 కి అంతా గృహోన్ముఖులయ్యారు.

రేపటి మన స్వచ్చ సేవలు శివరామపురం వద్ద.

సమీక్షించి – స్వాగతించి

విశాలాంధ్ర రాష్ట్రంలో – భరత భూమి చరిత్రలో

దశాబ్దాల గతంలోన ఈ సుదీర్ఘ ఉద్యమాలు

సాగినవో – గెలిచినవో – సమీక్షించవలసినదే!

స్వచ్చోద్యమ చల్లపల్లి స్వాగతింపవలసినదే!

– నల్లూరి రామారావు

స్వచ్ఛ సుందర చల్లపల్లి కార్యకర్త మరియు

సభ్యులు – మనకోసం మనం ట్రస్టు

ఆదివారం – 04/08/2019

చల్లపల్లి.

4.12 కు నాగాయలంక రోడ్డు లో స్వచ్చతా నడకను ప్రారంభిస్తున్న పంచాయితీ కార్యదర్శి బొల్లినేని ప్రసాదు గారు  M.V.ట్రేడర్స్ రంగారావు గారు ఒక్కసారికి మాత్రమే వాడి పారేసే బ్యాగులను కాకుండా మళ్ళీ మళ్ళీ వాడగలిగే బ్యాగుల మీద పేరు రాయించి వాడుతున్నారు. ఒక నమూనాగా 2 బ్యాగులను స్వచ్చ చల్లపల్లి ఉద్యమానికి అందచేశారు.   పొనమాల చిన్నబ్బాయి గారు : 1000/-గోళ్ళ వెంకటరత్నం గారు : 300/-కోడూరు వేంకటేశ్వరరావు గారు : 500/- మోపిదేవి వాస్తవ్యులు రావి రామనాధబాబు గారు : 1001/- గత నెలలో 14,000/- విరాళమిచ్చి మళ్ళీ 5000/- ఇస్తున్న వర్మ గారు  T. సాంబశివరావు గారు  : 500/- ప్రాతూరి శంకర శాస్త్రి గారు : 5000/-

Powered by Facebook Like