*అన్ని రోడ్ల కాదర్శం- మా రోడ్డే కీర్తి పథం.*
రోడ్డంటే మా రోడ్డే- గంగులపాలెం రోడ్డే
బాహ్య విసర్జనలు లేక ప్రజలు పరవశించు రోడ్డు
గతుకులసలె కనిపించక కాలి నడక సాగు రోడ్డు
మురుగు పైకి కనిపించక భూగర్భంలో నె దాగి
పైన పూల కుండీల తొ- పలు పచ్చని చెట్ల తోడ
పూల సుగంధాలు ఒలికి పోవు అందమైన రోడ్డు
ఝణకు ఝణకు తారా-ఒక మారు వచ్చి చూడరా
గంగులపాలెం మార్గమిపుడు- బహు సుందరమైనదిరా ॥ ఝణకు ఝణకు
పూర్వం ఈ దారంతా భూలోక పునరకమురా
పట్ట పగలె రోడ్డంతా పూతి గంధ హేయమురా
చచ్చి పడిన కళేబరాలు- జంతు మాంస వ్యర్ధాలూ
డ్రైనేజి నిండ ప్లాస్టిక్కులు- చెప్పరాని పలు తుక్కులు
నడచునపుడు ముక్కు మూసి- మహిళలైతే కళ్లు మూసి
ఆస్పత్రికి చేరుకొనే అతి భీకర గండమురా
ఝణకు ఝణకు తారా – దాన్ని గుర్తు చేసుకోకురా
స్వచ్చోద్యమ ఫలితంగా- దాని రూపు మారెరా ॥ ఝణకు ఝణకు
పలు దఫాలు కార్యకర్తలు పాటు బడిన రోడ్డురా
నెలల కొలది తమ స్వేదం చిందించిన బాటరా
తరతరాల కాలుష్యాన్ని తరిమి కొట్టి సుమసుందర
సుమధుర దృశ్య కవిత్వాన్ని- చూపు మంచి దారిరా
ఇతర గ్రామ వీధులకిక ఇది ఒక ఆదర్శమురా
కడమ ఊళ్ల బాటలకొక కలల రాచ బాటరా
ఝణకు ఝణకు తారా – దీన్ని మళ్లీ మళ్లి చూడరా
సెల్ఫీలను తీసుకొంటు – కరవు తీర నడవరా
ఝణకు ఝణకు తారా – ఒక్కడుగు ముందు కేయరా
మిగిలిన మన రోడ్లు దీన్ని – మించు నట్లు చూడరా
ఝణకు ఝణకు తారా – కనుల కరవు తీర చూడరా
అన్ని ఊళ్ల- అన్ని రోడ్ల కలల రాచ బాటరా
ఝణకు ఝణకు తారా – ఒక్కడుగు ముందు కేయరా
ఇకపై మన రోడ్లన్నిటి నిలా చూడ వలె నురా
॥ ఝణకు ఝణకు తారా – ఒక్కడుగు ॥
