ఒకానొక స్వచ్చ – సుందర ‘గస్తీ గది’ వేడుక.

          ఈ బుధవారం (9-3-22) నాటి ఆహ్లాదమయ సాయంత్రం 6.00 నుండి గంట పాటు గంగులవారిపాలెం వీధి మొదట్లో జరిగిన ఒక చిన్న గది ప్రారంభం నిజంగానే ప్రత్యేక వేడుక! దాని వ్యయం ఒక డాక్టరమ్మదే కావచ్చు గాని – ఆ క్లిష్టమైన నిర్మాణ పర్యవేక్షణ ఆమె మరిదిదే కావచ్చు గాని, దాని పరిధి మాత్రం చల్లపల్లి గ్రామ మంతంటిదీ! ఆ ఉత్సాహం ముఖ్యంగా స్వచ్చ – శుభ్ర – సౌందర్య ప్రియులైన గ్రామస్తులందరిదీ! మరీ ప్రధానంగా స్వచ్చ – సుందర కార్యకర్తల నూతనోత్సాహమైతే చెప్పే పనే లేదు.

          తొమ్మిదేళ్ళ నాటి గంగులవారిపాలెం బాట దుర్భర దుస్థితి వేఱు - కనువిందైన పూలతో – రంగు దీపాలతో - మనసుల్ని సమ్మోహనపరిచే పచ్చదనాలతో - జల నాట్యాలతో - సందర్శకుల తాకిడితో ఇప్పుడున్న పెళ్లికళ వేఱు! ఈ రహదారి నిరంతర పర్యవేక్షణకు, పరిరక్షణకు నిర్మించిన అన్ని హంగులున్న కుటీరానికైన ఖర్చుముఖ్యం కానే కాదు -  సర్పంచి, ఉపసర్పంచి, కార్యనిర్వహణాధికారి కొనియాడింది. “ఇంత చిన్న కాపలా ఉద్యోగులకు అంత పెద్ద సౌకర్యం కల్పించాలనే” సత్సంకల్పాన్నే!

          వందలాది స్వచ్చ కార్యకర్తల వేలాది రోజుల శ్రమదాన స్ఫూర్తే లేకుంటే - డాక్టర్‌ గురవారెడ్డి వంటి దాతల సౌజన్యమే దక్కకుంటే స్వచ్చ చల్లపల్లి గాని, అందులో ఈ తరహా వేడుకలు గాని ఊహించగలిగే వాళ్లమా? చల్లపల్లి గ్రామస్తుడు కాకున్నా, ఇక్కడ బిల్లు కలెక్టరుగా పనిచేసిన కంఠంనేని రామ బ్రహ్మం తన 71 వ జన్మదిన సందర్భంగా చల్లపల్లి అభివృద్ధి కోసం ‘మనకోసం మనం” ట్రస్టుకు ఇచ్చిన 50 వేల విరాళం వెనుక కూడ గ్రామ సామాజిక స్వచ్చ - సుందర కర్తవ్యమే - సౌజన్యమే –  కనిపిస్తున్నది!

          చల్లపల్లిలో స్వచ్చ – సుందరంగా తీర్చిదిద్దిన ఒక వీధిలో  ‘గస్తీ గది’ ప్రారంభవేడుకలో పాల్గొన్న 60 మంది ముఖాల్లోని ఆనందమే గ్రామంలోని అన్ని వీధుల్లోను ఇక ముందు కనిపించాలనీ, ఒక వీధిని మించి మరొక వీధి ఆరోగ్యకరంగా – ఆహ్లాదమయంగా వర్ధిల్లాలనేదే స్వచ్చ కార్యక్రమ సారధి డాక్టర్ డి.ఆర్.కె. మొదలు నేటి ప్రముఖుల – వక్తల – స్వచ్చ కార్యకర్తల ఆశయం!

          మన వీధికి ‘గస్తీ గది’.

ఈ గది ముస్తాబు కొరకు ఇంత పెద్ద వేడుకా?

ఇది స్వచ్చోద్యమ ఫలితమ? ఇది ‘గురవాభిరామమా?’

ఏ సదాశయ స్ఫురణకు ఈ ‘గస్తీ గది’ సూచిక?

ప్రతి వీధికి ప్రేరణగా - ఇదొక మచ్చుతునకా?

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   10.03.2022.