పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడాలా?
2812* వ తూరి స్వచ్ఛ - సుందరోద్యమం!
ఆ నాటౌట్ (*) సంఖ్య శుక్రవారం (30.6.23) నాటిది; ఉద్యమకర్తలు 24 మంది; వాళ్లు పాల్పడింది – ఈ కాలంలో ఏ మాత్రం గౌరవ ప్రదమైన పనికీ కాదు; ఆమాట కొస్తే - రోజుకు వెయ్యి రూకలిచ్చినా - ఇలా వీధి – మురుగు కాల్వల పారిశుద్ధ్య పనికి ముందుకొచ్చే వాళ్లే లేరు!
పైగా – ఇదేదో నిన్నా - మొన్నటి మురికి పనులూ కావు - ఈ ఊళ్లోనూ - బైటా తగు మాత్రం గౌరవ మర్యాదామన్ననలున్న వ్యక్తులే! కొందరైతే - బొత్తిగా తీరికుండని వాళ్లే ఐనా – కనీస సామాజిక బాధ్యతల చేతికి చిక్కి - తప్పించుకోలేని గ్రామ పౌరులు!
ఐతే – ఆ చేసేదేదో చిత్తశుద్ధితోనూ - ప్రణాళికాబద్ధంగానూ - రోజుకు గంటన్నరే కావచ్చు – శక్తివంచన లేకుండానూ - ప్రతిఫలాపేక్ష లేకుండానూ - ఒక ఐక్య సంఘటన గానూ – విసుగూ విరామం లేకుండానూ చేసుకుపోవడమే క్రమంగా చల్లపల్లికొక వరంగా మారుతున్నది!
ఈ మాత్రం సొంతూరు పట్ల అంకితభావం, నమ్మిన కార్యాచరణం, శ్రమ - ధన త్యాగం గ్రామ పౌరుల్లో ఉండాలే గాని - ఏ వూరైనా బాగుపడడం ఎంత సేపు?
నేటి కార్యకర్తల్లో సగం మందైతే మరీ 4.10 కే - ఎక్కడెక్కణ్ణుంచో ATM సెంటరుకు చేరుకొన్నారు. పని మీద ఎక్కడికెళ్లాడో గాని – వరుణ దేవుడి జాడలేదివాళ!
అందువల్ల –
నేటి 110 నిముషాల, వీధి శుభ్ర - సుందరీకరణ ప్రయత్నం సాఫీగా జరిగిపోయింది. గ్రంథాలయ వీధి దగ్గరి డ్రైను పని కావచ్చు, 100 గజాల బందరు బాట ఊడ్పులు కావచ్చు, బంకు ప్రక్క తోపుడు బళ్ల దగ్గరి గలీజులు కావచ్చు, చిన్నకార్ల నిలుపుదల చోట బాగుచేతైనా కావచ్చు - స్వచ్ఛ - సుందర చల్లపల్లికి తగ్గట్లుగా నెరవేరిపోయాయి!
తమ నేటి 40 కి పైగా పని గంటల శ్రమ ఫలితంగా సువిశాల రహదారి ఏ మేరకు ఎన్ని మార్కుల డిస్టింక్షన్ లో ఉత్తీర్ణమైందనేది ఏ కార్యకర్త ముఖ కవళికలు చూసినా ఇట్టే తెలిసిపోదా?
అందుకే - సమీక్షా కాలంలో DRK వైద్యుల వారు స్వచ్ఛ కార్యకర్తల పట్టుదల గురించి – ఎన్ని వందలమారో గాని, “అందరూ అగౌరవప్రదమని భావించే ఇంత శ్రమను - ఈ రోజుల్లో ఎవరు చేస్తారు...” అని ఆశ్చర్యపడేది!
పరిసరాల జనం ఉలికి పడేట్లు - గట్టిగా కోడూరు వేంకటేశ్వరావు గారు స్వచ్ఛ - సుందరోద్యమ సారాంశాన్ని మూడు మార్లు నినదించింది!
రేపటి మన కృషిని బందరు రహదారిలోనే - చిన్న కార్ల స్టాండు దగ్గర కలిసి, సెంటరు దిశగా కొనసాగిద్దాం!
మాట వరుసకొ – ఉదాహరణకొ
మాట వరుసకొ - ఉదాహరణకొ - మచ్చుతునకకొ చేయు పనుల?
ప్రలోభాలకొ – ప్రచారాలకొ - వార్తకెక్కే సేవలా ఇవి?
స్వచ్ఛ సుందర గ్రామమునకై ఆరు ఋతువులు - అన్ని రోజులు
కార్యకర్త కఠోర శ్రమ కైంకర్యములుగా జరుగు కృషియా?
- ఒక సీనియర్ స్వచ్ఛ కార్యకర్త,
30.06.2023.