పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు అవసరమా?
నడుస్తున్న స్వచ్ఛ – సుందరోద్యమ చరిత్ర – @2816*
అనగా - అది ఈ ఊరి కొరకు – ఊరి నుండి - కొందరు ఊరి వాళ్ళ చేత తాజాగా - బుధవారం(5-7-23) వేకువ 4.18 - 6.00 వేళల నడుమ - 21 మంది స్వచ్ఛ – శుభ్ర వ్యసనపరులు లిఖించిన సచ్చరిత్ర! సదరు చారిత్రక ఘటనా స్థలం అవనిగడ్డ రహదారిలో పాగోలు - చల్లపల్లి గ్రామాల ఉమ్మడి సరిహద్దైన స్వచ్ఛ - సుందర టాయిలెట్ల వద్ద!
చరిత్రను అనుకరించడమో, అనుసరించడమో ప్రజా బాహుళ్యానికి అలవాటైన పని - వేసిన బాట మీద నడవడమన్న మాట! ఐతే - కారడవిని ఛేదించి, రోడ్డు నిర్మించడం వంటి మన ఊరి స్వచ్ఛ – సుందరోద్యమంలో ఒక్కొక్క ఇటుకను పేర్చుకుపోవడమే అసలైన - కఠిన పరీక్ష! అట్టి రోడ్ల నిర్మాణాన్ని అవహేళన చేయడమూ, కొండొకచో త్రవ్వుకు పోవడమూ మహాపరాధాలు కావా?
అసలు నేటి స్వచ్ఛంద శ్రమ కర్మలు ఇదే రోడ్డు మొదట - మూడు ముఖ్య వీధుల కూడలిలో జరగవలసి ఉండగా - వరుణడి శీలాన్ని శంకించి కిలోమీటరు దూరానికి మారింది!
స్వచ్ఛ సుందర కార్యకర్తలు కాక వేరెవరు చూసినా బండ్రేవు కోడు వంతెన ప్రాంతపు 100 గజాల రోడ్డు “ఇంతందంగా ఉంటే - ఇంకా ఇక్కడేం చేయాలి” అనే అనుకొంటారు. ఐతే ఈ శుభ్ర - సుందరీకర్తల దృష్టే వేరు!
ఇప్పుడు - 6.15 తరువాత - ఎవరు వెళ్లి చూసినా - ఆ అందమైన మరుగుదొడ్లు, ఆ హరిత వైభవమూ, కాస్త దూరంగా రహదారి ఉద్యానాలూ ఒక్క 10 నిముషాల పాటు పరిశీలించండి - మీరు భావుకులైతే, కాస్త కళాభిరుచే ఉంటే, మీ హృదయం కదుల్తుంది, మీలో కళాకారుడు మేల్కొంటాడు!
ఒకవేళ వెళ్ళి చూడలేకపోతే – ‘జై స్వచ్ఛ చల్లపల్లి సైన్యం’ మాధ్యమ చిత్రాలైనా చూడండి! ఆ బాట వైశాల్యం, స్వచ్ఛత, పొందిక కొంతైనా తెలియక పోదు! ఐతే – ఎందరు కార్యకర్తలు చెక్కుడు పారల్తో మట్టిని చెక్కితే - పూలమొక్కల్నెంతగా క్రమబద్దీకరిస్తే – నలుగురి చీపుళ్లెంతగా ఊడిస్తే - ఎన్ని చెమటలు దిగ గారితే – ఈ సుందర దృశ్యం ఆవిష్కృతమయిందనేది మాత్రం ఎవరైనా ప్రత్యక్షంగా వచ్చి – చూసి – పాల్గొంటేనే తెలియగలదు!
ఇక్కడ ప్రస్తావిస్తున్న నూతన చరిత్ర నిర్మాణాలూ, శ్రమదానాలూ, చెక్కబడుతున్న గ్రామ వీధుల శుభ్ర సౌందర్య శిల్పాలూ గ్రాఫిక్స్ కానే కావనీ, స్వానుభవ పూర్వక వ్రాతలనీ విశ్వసించండి!
కారక్రమ ముగింపు సంగతుల్లో:
- యధా ప్రకారం DRK సమీక్షకుని ఆశ్చర్యానందాలూ,
- తమ గంటన్నర కష్టంతో తీర్చిదిద్దబడిన వీధి సౌందర్యాలకు నిస్వార్థ శ్రామికుల పరవశాలూ
- 2 వారాల ఎడబాటు భరించాక, కాళ్లకూ, ఒంటికీ కట్లతో వచ్చి శాస్త్రి మహాశయుని ఉచ్ఛ స్వరంతో నినాదాలూ
- మరొక ముఖ్య సమాచారమేమనగా: అర్ధ రాత్రో – అపరాత్రో దూర ప్రయాణం పిదప చల్లపల్లిలో బస్ దిగే వాళ్ల సౌకర్యం కోసం షణ్ముఖ శ్రీనివాసుని వాహన ప్రతిపాదన, (ఔను స్వచ్ఛ కార్యకర్తలకే ఇలాంటి ఆలోచనలెక్కువగా వస్తాయి! – అతని చరవాణి – 9885539401)
- రేపటి వేకువ కార్యకర్తల కలయిక వాన లేకుంటే చల్లపల్లి సెంటరనీ, ఉన్నచో ఊరి బైట నాగాయలంక రోడ్డనే నిర్ణయమూ...
కష్టించక నిజమౌనా కలలన్నీ?
‘కలాం’ గారు చెప్పకనే కలలు కనే వారెందరొ!
“తమ గ్రామం అడుగడుగున సుమ సౌరభ నిర్భరముగ-
స్వస్తతకు ఉదాహరణగ - స్వచ్ఛతకు నిదర్శనముగ –
నిలవాలని!’ - కష్టించక నిజమౌనా కలలన్నీ?
- ఒక సీనియర్ స్వచ్ఛ కార్యకర్త,
05.07.2023.