పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల!
మరొక వీధి సుందరీకరణ ప్రయత్నం -@ 2848*
గురువారం (10.8.23) వేకువ జరిగిన సదరు ప్రయత్నం కూడ గంగులవారిపాలెం బాటలో నిన్నటి తరువాయి గానే! 4.14-6.05 కాల పరిమితిలోనే! ప్రయత్నీకులు 20 మందే ! క్రొత్తగా పరిశుభ్ర - సుందరీకృత వీధి 30 గజాల వరకే!
నిన్నరాని సుందరీకర్తలు ఈ వేకువ వచ్చి, నిన్నటి కూడలిలో వాళ్లకు మరికొన్ని లోపాలు కనిపించి, వాళ్ల పద్ధతిలో ఆ 20 గజాల జాగాను తీర్చిదిద్దినందు వల్లే ఈ ఉదయం పనిలో వాసి తప్ప రాశిపెద్ద గా కనిపించలేదు.
అదీ గాక – పని జరుగుతున్నది పెద్ద మురుగు కాల్వ దక్షిణపు గట్టున కావున, ఇరుకు చోట్ల జాగ్రత్తగా మసులుకోవలసి రావడం కూడ ఇంకో కారణం ! నిన్నా- నేడూ శ్రమదానంతో వంతెన దాక శుభ్ర పరచే లక్ష్యం నెరవేరలేదు!
నేటి తలా 100 నిముషాల సమయ దానంతో అక్కడ జరిగిన మార్పులివి:
- యదాలాపంగా చూసి మెచ్చేట్లుగానే ఉన్నా, కార్యకర్తల సూక్ష్మ దృష్టికి వచ్చిన గడ్డీ, ముళ్లు- - పిచ్చి మొక్కలు తొలగిపోవడం,
నిన్న ప్రోగుపడిన వ్యర్థాల గుట్టను నలుగురు మోసుకుపోయి, మురుగు కాల్వ అంచున పరిచి, సర్దడం,
- 2 డిప్పలకు సరిపడా నీళ్ల, శీతల పానీయ మద్య పాత్రల్ని ఏరడం,
- రోడ్డంతటినీ మరొకమారు క్షుణ్ణంగా ఊడ్వడం,
ఇవన్నీ కూర్చొని వ్రాయడమూ - చదవడమూ తేలికేగాని, ఎగుడుదిగుడు జాగాలో పని చేసేవాళ్లకి గదా - అందులోని కష్టం తెలిసేది!
నేటి తుది సమావేశాన్ని 2 x 3 నినాదాలతో పార్రంభించినది భోగాది వాసుగారైతే –
రేపు 180 పైగా పూల మొక్కలు నాటవలసిన - అందుకు దుబాయి నుండి శ్రమ కోర్చి అతిథిగా వస్తున్న “శశి” వైద్యుని గురించీ, ఆదివారం వేంకటాపురం - శివరాంపుర రహదారి పచ్చతోరణ ప్రణాళిక గురించీ వివరించినది దాసరి రామకృష్ణ ప్రసాదు గారైతే, కార్యకర్తల్ని ఖాళీగా ఉంచక - బుర్రలకి పదును పెట్టే పద వినోద విజేతలకు బహుమతులు పంపినది ప్రాతూరి శాస్త్రి గారైతే –
చప్పుడు లేకుండా 712/- గుప్త విరాళ ప్రదాత షణ్ముఖ శ్రీనివాసుడు!
రేపటి బందరు ఉపరహదారి పుష్పాలంకరణ కోసం అతిథి వైద్యుడూ, సర్పంచులతో బాటు - మనం కలుసుకోదగ్గ చోటు గంగుల పాలెం దగ్గరి హైవే వంతెనే!
సాధనమున పనులు
సాధనమున పనులు సమకూరుననిగదా
వేమనార్యుడెపుడొ విన్నవించె
వేన వేల నాళ్లు వీధి శుభ్రతకు శ్ర
మించు వీరులకు నమస్కరింతు!
- ఒక ‘స్వచ్ఛ సుందర చల్లపల్లి’ కార్యకర్త
10.08.2023.