పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడాలా!

2854^*వ వేకువ కృషి శివరాంపురం దగ్గరగా.

            బుధవారపు బ్రహ్మకాలం - 4.20 కే సదరు సత్కృషి వంతెన దగ్గర రహదారికి తూర్పుగా మొదలై, 6.10 వరకూ నిరాటంకంగా ముగిసింది. కృషీవలురు 26 మందిలో వేంకటాపురపు కోనేరు ట్రస్టు పనివారిద్దరూ, అదే గ్రామస్తులిద్దరూ.

            పాపం – అదే గ్రామస్తులిద్దరు మాత్రం ఎటూ తేలని - సందిగ్దంలో ఉండి  - ఉండి, బెరుకో  మొహమాటమో కాని, చివరికి పనిలో దిగకుండానే నిష్క్రమించారు! ఐతే - ఒక రైతు మాత్రం చీకటితో పొలం వెళుతూ తన పని వాయిదా వేసి, కార్యకర్తల్తో కలిసిపోయాడు! (ఈ కృష్ణ - గతాదివారం కూడ బాగానే కష్టించాడు.)

            ఈ వైచిత్ర్యాన్ని, వైవిధ్యాన్నీ చిత్తగించారా? ఈ వేకువ 4 ½ కిలోమీటర్లు దాటుకొని వచ్చి, 86 పూల - పండ్ల చెట్లను నాటింది చల్లపల్లి కార్యకర్తలు! శివరాం - వేంకటాపురాల నడుమ, ఉభయ గ్రామస్తుల ఆహ్లాద నిమిత్తం జరుగుతున్న ఇంత మంచి పనుల్లో స్ధానికుల్నుండేమో తక్కువ భాగస్వామ్యం!

            ఇక్కడ కోనేరు వారి వారసత్వ దాతృత్వం ఉంది, చల్లపల్లి నుండి శ్రమదాతృత్వముంది, సరిపడాలేనిది భవిష్యత్తు సౌకర్యాల పట్ల స్థానికుల్లో దార్శనికత, చొరవ! [ఇంకో రకం చొరవ మాత్రం ఉన్నది - ఆదివారం పెట్టిన పూల మొక్కల్లో ఒకటి సోమవారానికి అదృశ్యం కావడమూ – దాన్ని పునః ప్రతిష్టించేందుకిద్దరి నిర్ణయమూ...]

            కొన్ని విషయాలు చెప్పుకుంటే సిగ్గు చేటు – వ్రాస్తుంటే కలం, సిరా చేటు! రోడ్డు వార నేటి పచ్చతోరణ ప్రయత్నం అరకిలోమీటరు మేరా మూణ్ణాలుగు చోట్ల కార్యకర్తలు మొక్కల్నాటింది నోటితో చెప్పరాని గలీజుల దగ్గరే!

            స్వచ్ఛ సైనికులు మొక్కలు నాటడమంటే ఏమిటి? ఏదో మొక్కుబడిగా - అడ్డదిడ్డంగా నాటేసి చేతులు దులుపుకోవడం కాదే!

            ముందు రోజే కూలీలు గుంటలు త్రవ్వితే – ఈ వేళ క్రమపద్ధతిలో నాటవలసిన మొక్కల్ని క్రితం రాత్రే ట్రాక్టర్లలో సర్దుకొని, తెచ్చి, ఒకే పండ్ల కులానికి చెందిన 10 చెట్లనూ, తరువాత 10 భిన్న రంగుల పూలమొక్కల్నీ కొలతల ప్రకారం - ముందు ముందు దారి ప్రయాణాలకడ్డు రాని పద్ధతిలో అమర్చడం కదా!

            నేటి 86 మొక్కల్లో నేరేడు, మామిడి, సపోటా వంటి ఫల వృక్ష జాతులూ, సువర్ణ గన్నేరు – చిన్న తురాయి (గద్ద గోరు) – పారిజాతం వంటి రంగు, సువాసనల పూలమొక్కలూ ఉన్నాయి!

            ‘FOGSI’ - అంటే గైనకాలజిస్టుల - ప్రసూతి వైద్యనిపుణుల సంఘపరంగా ఈ నాటి పచ్చతోరణం జరిగినట్లు తెలుస్తున్నది.

            నేటి కృషి సమీక్షా వేడుకను ముందుగా నినాదాలతోనూ, తదుపరి కొన్ని సూక్తులతోనూ అలరించినది అడపా గురవయ్య గారు!

            నేడు శేషించిన హరిత తోరణం ముగింపు కోసం రేపటి వేకువ కూడ మరింత మందితో కలిసి కృషిచేయవలసింది - శివరాంపురం సమీపాననే!

            చోద్యం చూస్తుందామా?

ఏమయ్యా! ప్రతి వేకువ నీ గ్రామం వీధుల్లో

తొమ్మిదేళ్లు ఎండల్లో - తొలకరిలో - మంచుల్లో

కార్యకర్త శ్రమిస్తుంటె చోద్యం చూస్తుందామా?

అప్పుడప్పుడైన వచ్చి, ఆత్మీయత చూపుదమా?

- ఒక సీనియర్ స్వచ్ఛ కార్యకర్త,

   16.08.2023.