పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకెంత కాలం!
స్ధిరవారం వేకువ సుస్థిర శ్రామిక యజ్ఞం! @2876*
9.9.23 - బ్రహ్మముహుర్తాన అది 4.15 నుండి 6.10 దాక నిర్విఘ్నంగా - కనీసం 3 చోట్ల –
1) గంగులవారిపాలెం వీధిలో భవఘ్నినగర్,
2) SRYSP సంస్థ ప్రహరీ వెలుపల,
3) పంటకాల్వ వంతెన మొదలు మూల్పూరి ఉద్యానముల దాక
స్వచ్ఛ సుందర పతాకం రెపరెపలాడింది.
సదరు పతాకధారులు 24+6 మంది - చివరి సంఖ్య ట్రస్టు ఉద్యోగులది! ఇప్పటికీ సగం ఊరికి అంటీ ముట్టని ఈ వీధి పారిశుద్ధ్యంలో 14 ఏళ్ల విద్యార్ధిని నుండి 84 ఏళ్ల వైద్యుని దాక వివిధ వయస్కుల భాగస్వామ్యం!
“మీరు సమాజంలో లబ్ద ప్రతిష్టులు, బట్టలు నలక్కుండ ఉద్యోగించే – గౌరవ వృత్తులవలంబించే – గడపదాటి బైటకురాని - గౌరవనీయులు, పెద్దలు, గృహిణులు - ఇలా పాచి, తుక్కు, దుమ్ము, మొరటు పనులకు దిగడమా” వంటి ప్రశ్నార్థకాలూ, ఆశ్చర్యార్థకాలూ ఈ ఉద్యమం తొలి 100 నాళ్లలోనే ముగిసినవి. వందలు వేలై, 2900 రోజుల్ని సమీపిస్తున్నవి.
ఒక వ్యసనంలాగా ఆ పాతిక ముప్పై - నలభై మంది ఏనాడూ ఈ పాచిపనలు మాననూ లేదు, ఊరి వాళ్లు జాగృతులైపోయి, కార్యకర్తల సంఖ్య ఎప్పుడో తప్ప - వందల సంఖ్యకు చేరనూ లేదు!
ఈ వేకువైనా అంతే - ఇంత పెద్ద ఊరి నుండి అతికష్టమ్మీద 30 మంది పాల్గొన్న వీధి పారిశుద్ధ్యంలో –
1) బందరు వీధికి ఉత్తరంగా మొలచి పెరిగిన గడ్డి పీకి, చెక్కిన ఆరేడుగురూ,
2) దక్షిణంగా సుమారు 130 గజాల పొడవునా చీపుళ్లతో దుమ్మూ - ధూళీ ఇతర వ్యర్థాల్ని ఊడ్చిన నలుగురూ
3) భూగర్భ మురుగు వ్యవస్థ దగ్గర మరి రెండు పెద్ద చెట్లను ప్రహరీ ఎక్కి అదుపు చేసిన నలుగురూ,
4) ముళ్ల బోగన్ విలియా చెట్ల కొమ్మల్ని ఒడుపుగా సుందరీకరించిన 5 గురి బృందమూ,
శతధా - సహస్రధా అభివందనీయులు!
జూనియర్ కళాశాల ద్వారమెదురుగా 6.25 కు జరిగిన దైనందిన వీడ్కోలు/సమీక్షా సమావేశానికి ముందు
- జంకు లేకుండా అనుమకొండ గీతా హాసిని ముమ్మారు స్వచ్చ సుందరోద్యమ నినాదాల ప్రకటింపూ
- సుభాషిణీ ప్రధానోపాధ్యాయిని ప్రాయోజిత తినుబండారాలూ,
- అదొక గుప్త దానమో, వ్యక్తదానమో తెలియని ఒక వ్యాపారి విరాళం 700/-
- విజయవాడ నోవాటెల్ హోటలో ప్రకృతి మైత్రిగా ఇటీవల జరిగిన విందూ,
- నిన్న పాగోలులో పర్యావరణహితంగా జరిగిన భోజన – భాజనాలూ,
- శ్రీకాకుళంలో నిన్న ఒక వాస్తిక ప్రముఖుడావిష్కరించిన భక్తి పూరిత ‘భజరంగభళీ' శతక సంగతీ,
రేపు మరొక మారు SBI దగ్గరనే మనం కలిసి శ్రమించదగు పని వివరాలూ..
దృష్టిని బట్టే కనిపిస్తుంది...
॥ దృష్టిని బట్టే కనిపిస్తుందీ స్పష్టని విన్నాను
నువ్వది వేదం అన్నావు - నేనది వాదం అన్నాను ॥
సంత మధ్యలో జోలె పట్టి పసి గొంతు మ్రోగుతుంటే
నువ్వది గేయం అన్నావు - నేనది గాయం అన్నాను
॥ దృష్టిని బట్టే ॥
కళాత్మకంగా సినిమా తప్పుడు విలువలు చూపిస్తే
నువ్వది వినోదమన్నావు - నేనది ప్రమాదమన్నాను
॥ దృష్టిని బట్టే ॥
ఊరి మెరుగుదల కోసం కొందరు ఉద్యమించుచుంటే
నీవు నిరర్థకమంటావు - నేనది సార్థక మంటాను
॥ దృష్టిని బట్టే ॥
శ్రమదానం మన చల్లపల్లి కొక వర దానం అంటే
నువ్వది మోటు పనంటావు – నేనది నీటు పనంటాను
॥ దృష్టిని బట్టే ॥
తొమ్మిదేళ్ళుగా స్వచ్చ సైనికుల చెమట చిందుతుంటే
నువ్వది విచిత్రమంటావు – నేనది పవిత్రమంటాను
॥ దృష్టిని బట్టే ॥
ప్రజారోగ్య పరిరక్షణ కోసం పాటు పడుతు ఉంటె
నువ్వది కీర్తి దురద అంటే – నేనది బాధ్యత అంటాను
॥ దృష్టిని బట్టే ॥
డ్రైను లోన దిగి కార్యకర్తలు బురద తోడుతుంటే
నువు ముక్కులు మూసి నిష్క్రమిస్తే – మేము నిలిచి సహకరిస్తాం
॥ దృష్టిని బట్టే ॥
శ్మశానాల క్రమబద్దీకరణకు శ్రమకు పూనుకొంటే
భయపడి వెనకడుగేస్తావు – మేం నిలబడి పురోగమిస్తాము
॥ దృష్టిని బట్టే ॥
- ఒక సీనియర్ స్వచ్ఛ కార్యకర్త,
09.09.2023.