పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకెంత కాలం!
గ్రామ కాలుష్యంపై పోరాటంలో త్రిముఖ వ్యూహం! @2886*
బుధవారం (20-9-23) వేకువ 4.16 కే తొలి 10 మంది గుంపెడు కార్యకర్తలు బత్తుల వారి రామాలయం ప్రక్కన నిలవడమూ, అక్కణ్ణుంచి నిముష క్రమంలో మిగిలిన 14 మందీ వచ్చి కలిసి, పారిశుద్ధ్య పనులందుకోవడమూ, 3 చోట్ల ఎవరి శరీరాల్ని వారు అలయించి, 6.07 సమయం దాక గ్రామ సుస్థితి కోసం చాతనైనంత పాటుబడడమూ - టూకీగా గంటా ఏభై నిముషాల శ్రమదాన చరిత్ర!
వాలంటీర్లు శ్రమించిన 3 గ్రామ విభాగాలేవంటే:
1) గంగుల వారిపాలెం రోడ్డులో – అలవి గాని పెరుగుదలతో, దట్టంగా క్రమ్ముకొన్న పచ్చదనంతో, క్రింద పూల మొక్కల ఎదుగుదలను నిరోధిస్తున్న 2 పెద్ద చెట్ల క్రమబద్దీకరణ 5 గురి ధ్యేయం కాగా -
తొలుత ఒక ఒంటరి పోరాట యోధుడూ, తదుపరి అతడికి జతపడిన అదే వీధి కార్యకర్తా - కనీసం 10 గద్ద గోరు పూల మొక్కల్ని గుమ్మటాల్లాగా కత్తిరించిన తదేక దీక్ష!
2) నడుములు నొప్పెట్టి - చెమటలు దిగ్గారి – గూళ్లరిగిన డజను మందిది రామాలయం ఎదుట చట్టుగా బిగిసిపోయిన 10 X2 గజాల జాగాలోని సిమెంటు – ఇసుక – దుమ్ము చోటే! 5 నిముషాలకొకమారు మంచి నీళ్లు త్రాగుతూ - బరువైన గునపాలతో - పారల్తో - చెక్కుడు బరిసెల్తో - గోకుతూ, పొడుస్తూ లాగి డిప్పల్తో ట్రక్కులోకి చేరుస్తూ అక్కడ జరిగినదే గ్రామ కాలుష్యాల మీద అసలు సిసలు యుద్ధం!
అది పనికిమాలిన వ్యర్థమేం కాదు - ఆ మట్టీ - ఇసుకా – సిమెంటు మిశ్రం సాగర్ టాకీసు మూలమలుపులో కేంద్ర జల పథకం వారు త్రవ్వి నెల రోజుల్నాడు పూడ్చక వదిలేసిన గుంటల పూడికకు పనికొచ్చింది మరి!
మిగిలిన కార్యకర్తల్లో ఇద్దరు కత్తుల్తో మురుగ్గుంటల ప్రక్క పిచ్చి మొక్కల్నీ గడ్డినీ తొలగిస్తుంటే –
- తక్కిన వాళ్లకు చీపుళ్లతోనే పని! రైసు మిల్లు రోడ్డు మొదలు కమ్యూనిస్టు వీధి దాక – 2 ప్రక్కలా ఊడ్చి ప్రోగు చేసిన దుమ్ము ఇవాల్టికలాగే మిగిలిపోయింది - లోడింగుకు సమయం చాల్లేదు!
ఒకవంక తోటివాళ్లకు పయోగపడాలనే సద్భావన కుంచించుకుపోతున్న – అన్నీ నాకే, నావే అనే స్వార్థం బలిసిపోతున్న ప్రస్తుత సమాజనికిక్కడ దశాబ్ద కాలంగా జరుగుతున్న సామాజిక బాధ్యతా చింతనా, దాని ఆచరణా మార్గదర్శకాలు కావాలి! ప్రతి వేకువా 50 - 60 పని గంటల శ్రమదానం ఎందుకు జరుగుతున్నదో సోదర గ్రామస్తులు ఆలోచించాలి.
అసలీ శ్రమదానానికి మూల స్తంభమనదగ్గ పర్యవేక్షక కార్యకర్త ఈ ఉదయం కొంత అస్వస్తత వల్ల రాలేదు!
6.20 వేళ – ఏ నెల రోజుల తరువాతనో పునరంకితుడైన శివబాబు ముమ్మార్లు ప్రకటించిన ఊరి స్వచ్ఛ - సుందరోద్యమ నినాదాలతోనూ – అడపా గురవయ్య ప్రవచిత సూక్తి ముక్తావళితోనూ నేటి వీధి పారిశుద్ధ్యం విజయవంతంగా ముగిసింది!
ఇదే బందరు రహదారి మెరుగుదల కోసం రేపటి వేకువ కూడ మనం కలసి కదం త్రొక్కవలసిన చోటు – కమ్యూనిస్టు వీధి ఎదురుగా – వర్థన్ సిమెంటు దుకాణమే!
అవాక్కవుదురు ఎవ్వరైనా
క్రమం తప్పని కార్యకర్తల కాయకష్టం వచ్చి చూస్తే -
మురికి బట్టల, చెమట ధారల మూలకారణమును గ్రహిస్తే –
స్వచ్ఛ సుందర ఉద్యమంబును సరిగ్గా పరిగణన చేస్తే –
అవాక్కవుదురు ఎవ్వరైనా – మహాశ్చర్య నిమగ్ను లౌదురు!
- ఒక సీనియర్ స్వచ్ఛ కార్యకర్త,
20.09.2023.