పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడుతూనే ఉంటారా!

2900^* నాళ్లకు దగ్గరగా చల్లపల్లి స్వచ్ఛ - సుందరోద్యమం!

            ఇవాల్టి శ్రమదానం మాత్రం 2894^* వ నాటిది – 28.9.23 గురువారమన్నమాట! 24 మందిమి వేకువ కర్మక్షేత్రం మాత్రం - అడపాదడపా 2-3 చోట్ల జరిగినా - ప్రధానంగా బైపాస్ వీధిలోని ప్రాత - శిధిల - కస్తూర్భా ప్రభుత్వాస్పతి ప్రవేశ ద్వారమే!

            ఇంకొక సవరణేమంటే - అసలది ఏనాడో – ఏదాతో దానమిచ్చిన ముప్పాతిక ఎకరంలోని కట్టడాలకు ముఖద్వారంగా కనిపిస్తే గదా! ఏ గృహస్తులో – ఒకటి - రెండు నెలల్లో వేసిన రకరకాల వ్యర్థాల్తో 2 - 3 అడుగులెత్తున - 15x40 అడుగుల వైశాల్యంతో క్రిక్కిరిసిపోయింది గదా!

            సైజులుగా కోసిన 15-20 కొబ్బరి చెట్ల కాండాలూ, ప్లాస్టిక్ గాజు సీసాలూ, లోపలే ఛండాలమున్నదో తెలియని గోనె సంచులూ, మూటలూ..... ఇంకా ఏ పెన్నిధులున్నవో వంగి చూడలేదు గాని, స్వచ్ఛ కార్యకర్తలందులో కాలు పెట్టగానే గుప్పుమని దుర్గంధాలు! - రోడ్డున పోయే వాళ్లక్కూడా! కార్యకర్తలకైతే గంటన్నర పాటు - ఆ కంపే ఇంపు గాను, చెమటకు తడిసిన బట్టల మీద మరకలే మహా సొంపుగాను మారిపోయినవి!

            మరి 35 గంటల పనితో అక్కడేం జరిగిందంటే: ముందుగా ఎండు పుల్లలూ, తరవాత మూటలూ, సీసాలూ, చెట్ల పచ్చి కొమ్మలూ, చివరికి కొబ్బరి చెట్ల కాండాల ముక్కలూ ట్రాక్టర్లోకి చేరి - అందులోంచీ కంపు బయల్దేరి, అప్పటికే 6.10 పని వేళ ముగిసి, ఇంకొన్ని వ్యర్ధాలు మిగిలాయి,

            ఇక – విద్యుత్తీగల జోలికి పోతున్న కొన్ని చెట్ల కొమ్మల్ని శిక్షించే నిపుణుడొకాయన ఒకరిద్దరి సాయంతో తీరిక లేకుండా గడుపుతుంటే –

            ముగ్గుర్నలుగురు చీపుళ్లతో బైపాస్ బాటను ఊడుస్తుంటే - ఇక్కడి మినీ డంపింగ్ సృష్టించిన వారు మాత్రం తలుపులే తీయకుంటే నిచ్చెన మీదుగా త్రాళ్ల సాయంతో బరువైన కొబ్బరి చెట్ల కాండం ముక్కల్ని ట్రాక్టర్ మీదికెక్కించే క్రమంలో ఒకరిద్దరు ద్విచక్ర వాహనదారులు ఇబ్బంది పడిన మాట వాస్తవం!

6.20 వేళ - నేటి ఆఖరి సమావేశంలో:

1) ఉదయ శంకరశాస్త్రి గారు ముమ్మారు పలికిన ఉద్యమ సారాంశ నినాదాలూ, ఆయన స్వరంలో హెచ్చు తగ్గులూ,

2) నేటి కంపు పనులు కష్టం పట్ల DRK గారి ఆశ్చర్యానందాలూ,

3) గురవయ్య గురువరేణ్యుని ప్రవచనాలూ కాక –

            రేపటి వేకువ కూడ ఇదే బైపాస్ వీధి శిథిలాస్పత్రి ముఖద్వారం బాగుచేయడమే కర్తవ్యమనే నిర్ణయమూ...

            స్వచ్ఛోద్యమ సారధ్యం

సాహసించి అడుగేసిన స్వచ్ఛోద్యమ సారధ్యం

అనుసరించి, అధిగమించు స్వచ్ఛ సైన్య బలగం

ప్రతి వేకువ సృజన శీల – ప్రగతి శీల ప్రయత్నం

చల్లపల్లి వీధులన్ని సౌందర్య ప్రపూర్ణం!

- ఒక సీనియర్ స్వచ్ఛ కార్యకర్త,

   28.09.2023.