పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడుతూనే ఉండాలా!
ఫలించిన 2903*వ నాటి శ్రమదానం!
అది శనివారం వేకువ నాలుగున్నరక్కాదు – 4.16 కే మొదలైంది; 6.06 దాక - అంటే గంటా 50 నిముషాల పాటు కొనసాగింది; సదరు శ్రమ సంఘటనం NH 216 కు ఉత్తరంగా పంట పొలాల వద్దా, గంగులవారిపాలెం జంక్షన్ దగ్గరా - 2 రకాలుగా ఉండెను; వేకువ నిద్రను త్యజించి, అందరి ఆహ్లాదం కోసం పాటుబడిన కార్యకర్తలు 25 మంది!
తొమ్మిదేళ్లకుపైగా చల్లపల్లిలో ఏదొక చోట కనిపించే నిత్య కృత్య సన్నివేశాలే ఇవి! ఐనా, చేసే కర్మ ప్రవీణులగ్గాని, చూసే నాలాంటి వాళ్లగ్గాని విసుగూ విరామాలుండవు! ఎంత బరువు - కరకు- మురికి పనులైనా ఒక మహత్తర లక్ష్యం కోసం ముందుకు పడుతున్న ఆ 50 - 60 అడుగులాగవు! ఆ చేతుల పనితనానికి తరుగుదలా ఉండదు!
ఋజువులు కావాలంటే మీరొక్క పరి నేటి ‘ జై స్వచ్ఛ చల్లపల్లి సైన్యం’ వాట్సాప్ చిత్రాన్ని చూడండి - నాలుగైదేళ్ల నాడు L1C సంస్థ నుండి పని విముక్తుడైన ఒక ఉన్నతాధికారి బురదలో కాలు నిల ద్రొక్కుకుని పూల మొక్క చుట్టూ గడ్డి పీకి, పశువుల్నుండి రక్షణగా ముళ్లకంప కట్టుతున్న సన్నివేశాన్ని!
76 ఏళ్ల - రిటైర్డ్ హిందీ పంతులు గారు (అసలాయనదీ ఊరేకాదు) అడుగడుగునా కార్యకర్తల్నభినందిస్తూ ప్రోత్సహిస్తూ – శ్రమ దృశ్యాల్ని ఫోన్లో బంధిస్తూ చురుగ్గా తిరగడాన్ని!
ఒక పెద్ద డాక్టరమ్మ, ఒక సాదా గృహిణి, ఒక గ్రామ సౌందర్య నిపుణుడు, ఒక సీనియర్ బడి పంతులు, మరొక మొక్కల సరఫరాదారుడు 2 రోడ్ల కూడలి రెండు ప్రక్కలా క్రోటన్ మొక్కల్నలంకరించేందుకెంత శ్రమిస్తున్నదీ!
శివరాంపురం నుండి వచ్చి మరీ చల్లపల్లికి సహకారమందిస్తున్న వాళ్లూ!
- ఇవన్నీ తమ సామాజిక బాధ్యతను గుర్తించి, నెరవేరుస్తున్న కొన్ని గురుతులు!
బాట వెంట వాహనాల్ని పరిగెత్తిస్తూ - ఈ వేకువ - ఇక్కడ పాతిక మంది జనం ఏమిటో - అక్కడ గడ్డి చెక్కే కత్తుల గణ గణ లెందుకో - అవి రాళ్లకు తగిలి లేస్తున్న నిప్పు రవ్వలేలనో చూస్తూ పోయారు!
ఏక కాలంలో పాతిక మంది బండ్రేవు కోడు కాల్వ దగ్గర - తమ కోసం కాక - తమ ఊరంతటి ప్రయోజన మాసించి చేసిన 7-10-23 తేదీ నాటి శ్రమదానమిది!
6.30 కు పనులు ముగించి, ‘సమూహ ఛాయాచిత్రం’ కోసం గుమికూడినప్పుడు -
1) బందరు ఉపరహదారికే మనం నెలో రెండు నెలలో శ్రమించక తప్పదు అనే కొందరి వ్యాఖ్యానాలూ,
2) తొమ్మిదేళ్ల శ్రమదానోత్సవానికి (12-11-23) వాగ్గేయ కారుడైన జయరాజు గారికి పంపుతున్న ఆహ్వానానికి ఒకటి రెండు సవరణలూ,
3) RTC ఉద్యోగి తోట నాగేశ్వరావు గారి స్వచ్ఛ సంకల్ప నినాదాలూ,
4) గురవయ్యగారి పద్యాలాపనా...
రేపటి శ్రమ ప్రయత్నం కూడ ఈ గంగులవారిపాలెం సమీపంలోనేనట!
ఓనమాలు దిద్దుకొంది
పట్టి పట్టి పరిశుభ్రత పాఠాలను నేర్చుకొంది
వీధుల్లో శ్రమదానపు ఓనమాలు దిద్దుకొంది
అవసరపడి మురుగు కాల్వ అశుద్ధాలు తొలగిస్తూ
స్వచ్ఛోద్యమ చల్లపల్లి స-రి-గ-మ-లను పాడుతోంది!
- ఒక సీనియర్ స్వచ్ఛ కార్యకర్త,
07.10.2023.