పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు తక్షణం మానేద్దాం!

2945^* వ నాటి శ్రమదాన విశ్వరూపం!

            అసలే ఆదివారం(19-11-23) – ఆ పైన విజయవాడ నుండి ప్రయాణించి, డాక్టర్ గోపాళం శివన్నారాయణ ఆగమనం - గంగులవారిపాలెం వీధి నడుమ క్రిక్కిరిసినట్లు 53 మంది శ్రమదానం! మహిళలతో సహా భవఘ్ని - శాయినగర నివాసుల ప్రవేశంతో కళకళలాడిన వీధి పారిశుద్ధ్య సంగామ్రం! ఇంతా జేస్తే - స్వయంగా వచ్చి, చూసి, పాల్గొన్న వారిదే గదా ఈ ఆనందం!

            ఊరి ఇతర ప్రాంతాల్లో కూడ ఇలాగే ఎక్కువ మంది వచ్చి, కాలుష్యం మీద యుద్ధంలో పాల్గొంటే? ఎవరి బజారును వాళ్ళిలా శుభ్రంగా - అందంగా మార్చుకొనే ప్రయత్నం చేస్తే? స్వయంగా పూనుకోకున్నా - తమ వీధికి కార్యకర్తలు వచ్చినప్పుడైనా ఇలా సహకరిస్తే? తాము ఎక్కడో కాదు – “స్వచ్ఛ - సుందర చల్లపల్లి”లో ఉంటున్నామనే స్పృహ ఊరి జనులందరి మనసుల్లో నాటుకుపోతే ...... అప్పుడీ చల్లపల్లి మరీ న్యూజిలాండూ – స్విడ్జర్లాండూ కాకున్నా ఒక ఇండోర్ గా మారడమెంతసేపు?

            మనుషుల బుర్రలు చేసే విచిత్రం చూశారా! వేకువ 4.00 కే విజయవాడలో బయల్దేరి, 4.56 కే చల్లపల్లి వీధి పరిశుభ్రతా కృషికి ఒక ప్రముఖ వైద్యుడు 85 కిలోమీటర్లు దాటి వచ్చి పాల్గొనడమూ, 9 ఏళ్లుగా ఈ ఊళ్లో జరుగుతున్న భగీరథ ప్రయత్నాన్ని ఈ గ్రామస్తులు కొందరం నిర్లక్ష్యం చేయడమూ - ఇవన్నీ కేవలం మైండ్ సెట్ల మాయలే కదా!

            ఊరి వాళ్లలో 100 కు పైగా మందికి ఈ వీధులు, డ్రైన్లు, పబ్లిక్ స్థలాలు, రహదార్లు శుభ్రంగా - పచ్చగా సుందరంగా ఉండనిదే ఎందుకు నిద్ర పట్టదో - ఈ సౌందర్యాన్నా స్వాదించే - అనుభవించే కొందరికిది ససేమిరా ఎందుకు పట్టకున్నదో తెలియదు. ఈ వైఖరి చూస్తుంటే -  

            “అన్నమైతేనేమిరా – మరి సున్నమైతేనేమిరా... అందుకే ఈ పాడు పొట్టకు అన్నమే తిందాము రా” అనే ముతక తత్త్వ గీతం గుర్తొస్తున్నది!

ఇక ఇవాళ్టి 2 గంటల వీధి పారిశుద్ధ్య కృషిలో నాకగుపించినవన్నీ చిరస్మరణీయ దృశ్యాలే!

- వేరే ముఖ్యమైన ప్రయాణముండి కాబోలు - ఒకాయన “ఈరోజుకు మానేద్దాంలే” – అనుకొని కూడా ఇక్కడికి రావడమూ – మురుగు కాల్వ దుస్థితి చూసి, మరొక రామానగరం మిత్రుడితో కలిసి మోకాలి లోతు బురద ఊబిలో నుండి తాటి దుంగల్ని – తాజా కొమ్మల్నీ త్రాళ్ళు కట్టి బైటకు గుంజడమూ,

- అదే పనిలో గోపాళం డాక్టర్ తో సహా ఐదారుగురి బట్టలూ, చేతులూ మురుగంటుకోవడమూ,

- నిచ్చెనలెక్కి మర రంపంతో పెద్ద చెట్ల కొమ్మల కోతకు పూనుకొన్న ఒకరి భుజం పట్టేస్తే, మరొకరి నడుం ఇబ్బంది పడడమూ,

- కాస్త వయస్సు మళ్ళిన 4 గురు మహిళలు ఎప్పుడు పని మధ్యలో కాస్త విశ్రాంతి తీసుకొని, వంచిన నడుములెత్తుతారా అని నేను ఆసక్తిగా చూసినా ప్రయోజనం లేకపోపడమా,

- లోడు చేస్తే 2 ట్రాక్టర్లయ్యే వ్యర్ధాల్ని దూరంగా ఉన్న బండ్రేవు కోడు కాల్వ అంచుల్ని గట్టిపరచడానికి చేర్చి – పేర్చడమూ,

- చాలా మొక్కల్ని ఐదారుగురు ట్రిమ్ చేసేయడమూ,

- శుభ్రంగానే ఉన్నా రోడ్డును మళ్లీ మళ్ళీ ఊడ్వడమూ, ....... వగైరాలన్న మాట!

            మరి – ఇందరి శ్రమదానం చూస్తే, సందడి చూస్తే, ఒక ఆదర్శ సామాజిక బాధ్యతా నిర్వహణ చూస్తే – కార్యకర్తలూ, ముఖ్యంగా DRK, GSN డాక్టర్ల సంతోషం మిన్నుముట్టదా?

            తుది సమావేశంలో అదే జరిగింది – ఇద్దరు ప్రముఖుల మాటల్లో అదే ప్రతిఫలించింది. 40 నిముషాల పాటు ఆ తరంగాలు కదుల్తూనే ఉన్నాయి.

            నేటి స్వచ్ఛ సుందరోద్యమ సంకల్ప నినాదకుడు గోళ్ళ వేంకటరత్నం కాగా – వద్దంటున్నా వినకుండా 5,000/- విరాళమిచ్చినది శివన్నారాయణ!

            బుధవారం నాటి వేకువ శ్రమదానం కూడా ఇదే గంగులవారిపాలెం దారిలోనే ఉండగలదు.  

            సమర్థిస్తాం - స్వాగతిస్తాం!

జరా భారం లెక్క చేయక స్వచ్ఛ కర్మను ప్రోత్సహిస్తూ

ఉషోదయముకు ముందుగానే ఉద్యమంలో పాలు గొంటూ

డెబ్బదెనుబది ఏళ్ళు మీరిన పెద్ద వారల శుభాశీస్సుల

స్వచ్ఛ సుందర ఉద్యమాన్నే సమర్థిస్తాం - స్వాగతిస్తాం!

- ఒక సీనియర్ స్వచ్ఛ కార్యకర్త,

   19.11.2023.