పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు ఇంకా వాడాలా?
3052* వ వేకువ శ్రమ కథనాలు!
అనగా - గురువారం (7-3-24) నాటి పెదకదళీపురం రోడ్డు శుభ్ర - సుందరీకరణ చర్యలన్నమాట! వెంకటాపురం - శివరామపురం మధ్య గత ఆరేడు నాళ్ళుగా పాతిక - ముప్పై మంది సగటున తలా 2 గంటల వీధి 03.కాలుష్య విరుద్ధ సమరం! ఇప్పుడా ఉభయ గ్రామస్తులు వెళ్లి చూస్తే – శివాలయం మొదలు పెద్ద వంతెన దాక – సుమారు అర కిలోమీటరు దాక బాగుపడి ఎంత ముచ్చటగా ఉన్నదీ, వంతెన తర్వాత కార్యకర్తల కష్టం రుచి చూడని భాగమెంత దరిద్రంగా ఉన్నదీ ఇట్టే తెలిసిపోతుంది!
అంతే కాదు - సామాజిక బాధ్యతంటే ఏమిటో చప్పున తెలిసొస్తుంది! స్వచ్ఛ చల్లపల్లి సైనిక గాయకుడు అప్పుడప్పుడూ
“ఒక్కసారైనా ఒక్క రోజైన స్వచ్ఛ కార్యకర్తగా బ్రతుకు నేస్తమా!
ఆ గొప్ప నీకు తెలుస్తుంది మిత్రమా!...” ! అని పాడే పాటకర్ధం బోధపడుతుంది! మారుమూల చల్లపల్లి - వేంకటాపురం వంటి రహదారి శుభ్ర - హరిత - సుందరీకరణ దర్శన భాగ్యానికి SP. బాలసుబ్రహ్మణ్యం, గురవారెడ్డి, గోపాళం శివన్నారాయణ వంటి ప్రముఖులెందుకు వస్తారో తెలిసొస్తుంది! చల్లపల్లి స్వచ్ఛంద శ్రమదాతలు 3052* దినాలుగా చేస్తున్న కృషి అర్ధంపర్ధం లేనిది కాదనీ, ఎప్పటికైనా ప్రతి గ్రామానికీ తప్పని సరనీ బోధపడుతుంది!
ఒక ప్రక్క భారీ మంచు: తూర్పు నుండి చలి గాలీ, చిమ్మ చీకటీ, శివ రాత్రి పండక్కి ముందే వాహనాల రొదల మధ్య ఈ వేకువ 4:22 – 6:18 వేళల నడుమ జరిగిన రహదారి శుభ్ర - సుందరీకరణం వేంకటాపురం చరిత్రలో ఒక మంచి పుటగా మిగిలిపోతుంది!
అందులోనూ ఆ గ్రామ పాఠశాల విద్యార్థినీ విద్యార్థుల పట్టుదలైతే, వాళ్ల చురుకుదనమైతే మరింత ఆకర్షణీయం! భేషజాలు వదిలేసి, పెద్దలం ఆ పిల్లల్ని అనుకరించవలసిన తరుణం!
వంతెనకు తూర్పు పడమరలుగానూ, ఉత్తర దక్షిణాలు గానూ కార్యకర్తల కత్తులకు బలైన మొండి మొక్కలూ, పిచ్చి - ముళ్ళకంపలూ, ఎండు గడ్డీ, గుబురు పొదల్లోకి విసరబడిన ప్లాస్టిక్ తుక్కులూ, అడ్డదిడ్డంగా పడున్న ఎండుకొమ్మలూ తాడి మొద్దులూ రెండు గంటల శ్రమతో తెగిపడి, ఏరబడి, సర్దబడి, ఇప్పుడెంత మర్యాదగా, అణకువగా కనిపిస్తున్నాయో వాట్సప్ లో వీక్షించండి!
అనివార్యంగా దావణగెరెలోనో – అమెరికా తదితర దేశాల్లోనో ఉంటున్న స్వచ్ఛ కార్యకర్తలు ఆనందించండి!
6.30 దాటాక కూడ మంచు పొరమాటు నుండి బయట పడలేని సూర్యుడూ, మిణుకు మిణుకుమనే చంద్రుడూ నేటి స్వచ్ఛ కర్మ సాక్షులు!
పిట్టకొంచెమూ - కూత ఘనమన్నట్లు సంతోష్ ప్రకటించిన వెంకటాపుర స్వచ్ఛ - సౌందర్య సాధనా సంకల్ప నినాదాలతోనూ,
DRK డాక్టరు సమీక్షతోనూ రేపటి శివరాత్రి పర్వదిన – మహిళా దోనోత్సవ శుభాకాంక్షలతోనూ, శుక్రవారం ఉదయం మరొక మారు ఈ వెంకటాపురం వంతెన వద్దే కలుద్దాం!
అంకితులు మన చల్లపల్లికి – 14
అసలు సిసలు స్వచ్ఛ కార్యకర్త మెండు శ్రీనుడే
శ్రమదానము నందాతని సంగతి ప్రత్యేకమే
“వచ్చామా - తోచిన పని చేశామా – వెళ్లామా”
అన్నట్లాతని వైఖరి అందరికీ ఇష్టమే!
- నల్లూరి రామారావు
07.03.2024