పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు ఇంకా వాడాలా?

మహాశివ రాత్రి వేకువ సామాజిక శ్రమ పండుగ! - @3053^*

            ఈ శుక్రవారం (8.3.24) అనేముందిలే - దేశ కాల స్వభావాల్ని అర్థం చేసుకొని, సమాజం నుండి తీసుకొన్న అప్పు చెల్లిస్తున్న చల్లపల్లి స్వచ్ఛ కార్యకర్తలకు ఈ పదేళ్లుగా ప్రతిరోజూ పండగే! వాళ్ల స్థాయిని బట్టి చూసే వాళ్లకెలా కన్పించినా, 3 లక్షలకు పైగా గంటలు శ్రమిస్తున్న బాధ్యులకు ఏరోజుకారోజు అందుతున్నది ఎనలేని సంతృప్తే!

            నేటి సంధ్యాపూర్వక పుణ్యకాలంలో - నాలుగైదారు కిలోమీటర్ల దూరాన్నీ,  రోడ్డు గుంటల్నీ, మంచునీ, కళ్లేపల్లి దైవ దర్శన కుతూహల ప్రయాణికుల్నీ దాటుకొని, తప్పుకొని, వెంకటాపురం దగ్గరి వంతెనను చేరుకోనేసరికి కాస్త ఆలస్యమై 4:29 సమయం!

            ఇక అక్కడి నుండి సుమారు 2 గంటల పాటు_డజను మంది స్త్రీ కార్యకర్తల్తో  సహా - ఒక దశలో 36 మంది సముచిత శ్రమదానం! ఫాన్ల క్రింద - ఎయిర్ కండిషనర్ల సమక్షంలో ఉద్యోగం కాదు - బూడిద, దుమ్ము, ఇసుకల్లో దంతెలతో – కత్తులతో – చీపుళ్లతో - చీకటి వేళ చేస్తున్న బరువు, మురికి పని!

            తల దీపాల వెలుగులో – అమావాస్య నాటి సన్నని చంద్ర వంక సాక్షిగా - గంటన్నర పాటు సున్నితమైన మహిళల చేతులు గునపాలు, పారల్ని వాడుతూ చేసిన రహదారి పారిశుద్ధ్య కృషి! పెద్ద చెట్ల మొదళ్లు అడ్డదిడ్డంగా అసహ్యంగా పడి ఉండడం నచ్చక బలంగా కదల్చి, తమకు నచ్చినట్లమర్చిన మొండి పనులివి!

            ఈ పనులకు కలిసి వచ్చిన పాఠశాల విద్యార్థులు కృతకృత్యులు - వారు చిన్న వయస్సులోనే పెద్దలకు ఆదర్శ పాత్రులు!

            గృహిణులూ, ఉద్యోగులూ, వయోధికులూ ధన్యులు - సామాజిక కర్తవ్యం చక్కగా నెరవేర్చిన నిండు సంతోషం వారిది!

            పెను పండుగకుపోతున్న వస్తున్న, పారిశుద్ధ్య పనులను పట్టించుకోని వాహన చోదకులు అభినందనీయులు - మరి వారి భక్తీ - ముక్తీ వారిది!

            మనుషుల ప్రమత్తత వల్లే జరుగుతున్న కాలుష్య ప్రమాద నివారణకు ప్రకృతే ఈ 35 మంది కార్యకర్తల్ని నియమించుకోవడమూ, వాళ్లది విధ్యుక్తధర్మంగా - అసిధారావ్రతంగా నిర్వహిస్తుండడమూ విశేషం!

6.30 తర్వాత - 20 నిముషాల పాటు జరిగిన సమావేశంలో:

- వెంకటాపురం ప్రభుత్వ పాఠశాల ప్రధానోపాధ్యాయిని లంకే సుభాషిణి 1) వెంకటాపుర 2) చల్లపల్లి స్వచ్ఛ – శుభ్ర - సౌందర్య సాధనా సంకల్ప నినాదాలూ,

- పల్నాటి అన్నపూర్ణ రవ్వ కేసరి విందూ,

- కడియాల భారతి బిస్కట్ల పంపకమూ,

- వాసవీ క్లబ్బు వారు గోళ్ల ద్రోణ ఆధ్వర్యంలో జరిపిన మహిళా సమ్మానము వంటి విశేషాలూ,

   [అసలిందుకే మేము “చల్లపల్లిలో జరిగేది శ్రమదానం కాదు – శ్రమ వేడుక” అనేది!]

- రేపటి వేకువ కూడ మనం ఇదే వెంకటాపురం దగ్గరి వంతెన వద్దనే కలుసుకోవాలనే నిర్ణయమూ!

    అంకితులు మన చల్లపల్లికి – 15

J.V.V. విధులందున తన సుదీర్ఘ చరిత్ర

‘సమతా’ సమావేశాల్లో గణనీయం ఆమె పాత్ర

దశాబ్ద కాలంగా తన స్వచ్ఛ సుందరోద్యమం

హెడ్ మిస్ట్రెస్ సుభాషిణిది ఎంతటి వైవిధ్యం!

- నల్లూరి రామారావు

   08.03.2024