పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు వెంటనే మానేద్దాం!

సోమవారం (8/4/2024) నాటి కష్టతర కృషి - @3084^*

          రెస్క్యూ టీమ్ ఉన్నదే కఠినమైన – గ్రామ సమస్యాత్మకమైన - బరువు పనుల పరిష్కారం కోసం. చెట్లెక్కేందుకూ, రోడ్ల గుంటల పూడికకూ, రోడ్ల పరిరక్షణకూ వాళ్లు ఎప్పుడు వెనకాడారు గనుక!

          ఈ వేకువ కూడ అంతే! 4:16 నుండే సిద్ధపడిన నలుగురు కరుడు గట్టిన స్వచ్ఛ కార్యకర్తలూ, వాళ్లకుతోడు ముగ్గురమూ, చిట్టచివరగా 8 వ కార్యకర్తా గంగులవారిపాలెం బాటలో బండ్రేవుకోడు మురుగుకాల్వ దగ్గర గంటా ఏభై నిముషాలు రోడ్డు బాగుదలకూ, సుందరీకరణకూ ప్రయత్నించారు!

          నేటి పనికి నాందిగా 3 కిలోమీటర్ల దూరంలోని పెదకళ్లేపల్లి రోడ్డులో పొలం గట్టున పడి ఉన్న తాడి చెట్టు మొద్దును ట్రాక్టరుకు బంధించి తీసుకొచ్చారు. గతవారం చేర్చిన మరొక చెట్టునూ, ఇప్పటి చెట్టునూ రోడ్డుకు రక్షణగానూ, అందం చెడకుండానూ అమర్చడమే ఈ వేకువ కార్యక్రమం!

          ఈ మూడు నాలుగొందల గజాల రోడ్డు భద్రత కోసమూ, మార్జిన్ మట్టి కోసుకుపోకుండానూ, పబ్లిక్ రహదారి మనుగడకూ వారాలు - నెలల తరబడీ ఇందరు శ్రమిస్తున్నారనేదే పెద్ద విశేషం!

          అసలు శారీరకంగా కష్టించే తత్త్వమే అడుగంటిపోతున్న ఈ కాలంలో – తమ కోసం కాక – ఊరంతటి సౌకర్యం కోసం ప్రతిఫలాపేక్ష రహితంగా దశాబ్దకాలంగా నానా కష్టాలూ పడుతున్న స్వచ్ఛ సుందర చల్లపల్లి కార్యకర్తలకు అభివందన చందనాలు!

          చివరకు ఈ కార్యకర్తలు తమ శ్రమదాన సంకల్పానికి గుర్తుగా మాలెంపాటి అంజయ్య నాయకత్వంలో ముమ్మారు గ్రామంపట్ల నిబద్ధతను నినాద రూపంలో ప్రకటించారు!

          బత్తిన ఉమాదేవి గారు (విశ్రాంత పోలీస్ ఉన్నతోద్యోగి అయిన శ్రీనివాస్ గారి సతీమణి) తమ నెలవారీ 5000/- చందాను ట్రస్టు ఖాతాకు ఆన్లైన్ లో పంపినందుకు ఉభయ దాతలకు మన కృతఙ్ఞతలు.

 అంకితులు మన చల్లపల్లికి – 54

సాధనాల సతీష్ అనే స్వచ్చోద్యమకారుడు

చెక్క పనుల మెలకువలో చాల సిద్ధహస్తుడు

కఠినమైన సేవలలో యువక దళం సభ్యుడు

మైకులు నిర్మించి ఇచ్చు సాంకేతిక నిపుణుడు!

- ఒక సీనియర్ స్వచ్ఛ కార్యకర్త  

  08.04.2024