ఒక్కసారికి మాత్రమే పనికివచ్చే ప్లాస్టిక్ వస్తువులను వాడము గాక వాడం!

ఆహ్లాద – ఆనంద – ఆరోగ్య – సుందర చల్లపల్లి ప్రయత్నంలో 2136^* వ నాడు. 

27.02.2021(శనివారం) వేకువ - 4.26 సమయానికే - ఊరి వివిధ వార్డుల్నుండి వచ్చిన 12+1+1 (కార్యకర్తలు + ఛాయాగ్రాహక వైద్యుడు + రోజూ క్రమం తప్పక హాజరయే కాలభైరవ మిత్రుడు) = 14 మందిని వాట్సాప్ చిత్రంలో ముందుగా వీక్షించండి! తారకరాముని పార్కులోని మూడు ముఖ్య జాగాలలోనూ 30 మంది గ్రామ మెరుగుదల దీక్షాపరులు – ఎంత ఒద్దికగా, క్రమపద్ధతిగా, తదేక దీక్షగా, విసుగు – విరామ రహితంగా రెండు గంటలపాటు ఆయాచోటులలో శ్రమిస్తున్నారో మీరు సులభంగానే గ్రహిస్తారు. స్వచ్చోద్యమ ఆస్థాన ఛాయాచిత్ర గ్రాహకుడు - మన శాస్త్రీజీ తీసి, పంపే ఛాయా చిత్రాలా – మజాకానా? (ఆయన పలుగులు – పారలతో పనిచేయక పోవచ్చు గాని – తన మనసుకు, మెదడుకు మాత్రం 24 గంటలూ ఇదే ధ్యాస, ఇదే శ్వాస!)

నేనిలా ఏళ్ల తరబడీ చల్లపల్లి స్వచ్ఛ – సుందరోద్యమ దైనందిన విశేషాలు విసుగు లేకుండా (కాస్త వర్ణనాత్మకంగా కూడ) వ్రాయడమంటే – మరి అదినా ఆనందం, అదృష్టమూ! ఇలా ఈ ఉషోదయ మహత్తర గ్రామ బాధ్యతా నిర్వహణను చదివి, వాట్సాప్ లో చూసి, ఉప్పొంగిపోయే ఓ రకమైన వెర్రి జనులు – అమెరికా, స్వీడన్, బ్రిటన్ వంటి విదేశాల్లోనూ, బెజవాడ వంటి రాష్ట్రం నడిబొడ్డులోనూ ఉన్నారు. (ఇందులో ఒకాయన – M.V. సుబ్బారావు – ప్రతి రోజూ ప్రత్యక్షంగా కాకపోయినా – పరోక్షంగానైనా ఈ ప్రత్యేక ఉద్యమాన్ని మనో నేత్రంతోనే చూసి, ఆనందం తట్టుకోలేక – నిన్నటి వలె – అప్పుడప్పుడు మన వాట్సాప్ గుంపులో సదరు ఆనందాన్ని పంచుడానికి కారణం మాత్రం క్రమం తప్పని కార్యకర్తల సుదీర్ఘ నిష్కల్మష శ్రమ తప్ప మరేదీ కాదు!

ప్రతిరోజూనూ, పై పేరాలలోనూ నేను పేర్కొంటున్నట్లు – ప్రతి దినమూ, ప్రతి నిముషమూ స్వచ్ఛ కార్యకర్తల ఆశ్చర్యకర శ్రమదానం లాగే నేటి విశేషాలు సైతం ఇలా:

- పార్కు ఉత్తర భాగంలో – అక్రమంగా పెరిగిపోయిన పచ్చిక దుబ్బుల్నీ చతికిలబడి కొందరూ, తిరగేసిన డిప్పల మీద కూర్చొని కొందరూ కోసి, కుప్పలు చేశారు. కోయని గడ్డి మధ్య కోసిన భాగం ఎలా శుభ్రంగా, పాయలుగా ఉన్నదీ (ఇక్కడికి రాజాలని వారు) చిత్రాలలో చూడాలి!

- గడ్డి మేటల్నీ, ఎండు మొక్కల ప్రొగుల్నీ నలుగురు ట్రాక్టర్ లోకి రవాణా చేయడాన్ని, ఆ ట్రాక్టరును అటూ ఇటూ నడుపుతున్న చల్లపల్లి స్వచ్ఛ వైద్యుణ్ణి కూడ అభినందించాలి!

- అన్నిటికన్నమించి – సజ్జా వారి వీధి నుండి వచ్చి, రకరకాల స్వచ్చంద కృషి చేసిన ఒక గృహిణి – ఖాళీ దొరక్క ఎవ్వరూ ఎక్కకపొతే – అమాంతం చెత్త ట్రాక్టర్ ట్రక్కులోనికెక్కి క్రింద నుండి అందిస్తున్న అన్ని కశ్మలాలను క్రమ పద్ధతిలో సర్ది, త్రొక్కి పేర్చుతున్న దృశ్యం నాకు మరింతగా ఆశ్చర్యానందదాయకం!

6.40 కి కాఫీ కబుర్ల తరువాత – విలేకరుల సాక్షిగా జరిగిన కృషి సమీక్షా సమావేశంలో – ముమ్మారు గ్రామ స్వచ్ఛ – సుందర సంకల్ప నినాదాలను వినిపించినది కాంపౌడర్ వక్కలగడ్డ వేంకటేశ్వరరావు. బాగా నలతగా ఉండి, మనలో ముగ్గురు పెద్దల నుద్దేశించి మన కార్యకర్త నాంచారయ్య వ్రాసిన లేఖను చదివి, దాసరి రామకృష్ణ ప్రసాదు గారు, నా ద్వారా అతడు పంపిన 2500/- చెక్కు విరాళాన్ని స్వీకరించారు. నాంచారయ్య పట్ల శివన్నారాయణ, పద్మావతి, డి.ఆర్.కె. గార్ల ఆత్మీయతను తెలుసుకొని స్వచ్ఛ కార్యకర్తలు చప్పట్లతో అభినందించారు.

రేపటి మన సుందరీకరణ బాధ్యతలు కూడ N.T.R. పార్కులోనే నిర్వహించవలసి ఉన్నది.

(గంగుల పాలెం దారిది) ఘన చరిత్ర – మన చరిత్ర – 5

ఇంతలోనె ఎంత మార్పు! అశుద్ధాల – అభద్రతల

స్ధానంలో పూదోటలు! హరిత వర్ణ రంజితాలు!

యాతాయాత ప్రముఖుల హాయి గొలుపు సెల్ఫీలు!

స్వచ్చోద్యమ ఫలితం ఇది – వ్యధతీర్చెను, కథ మార్చెను!  

నల్లూరి రామారావు, రిటైర్డ్ ప్రిన్సిపల్,

స్వచ్ఛ సుందర చల్లపల్లి కార్యకర్త

27.02.2021.