ఒక్కసారికి మాత్రమే వాడి వదిలించుకొనే ప్లాస్టిక్ వస్తువులు వేటినీ వాడనే వాడం!
స్వచ్ఛ – బంధుర స్వగ్రామం కోసం కార్యకర్తల 2197* వ నాటి ప్రయత్నం.
ఈ వారంతపు (సు స్థిరవారపు) వేకువ 4.27 వేళ “జై స్వచ్చ చల్లపల్లి సైన్యం” సామజిక మాధ్యమ ఛాయా చిత్రంలో కనిపిస్తున్న స్వచ్చోద్యమకారులు 15 మందైతే – అనతి కాలంలోనే 19 (మొత్తం 34) మంది కూడ వచ్చి చేరి, గంగులవారిపాలెం రహదారిలో – మురుగు కాల్వ వంతెన కల్లంత దూరాన 105 నిముషాల పాటు వీరి నిర్వాకం బెట్టిదనిన :
1) బాటకు ఉత్తర దిశగా, ఈ నెల మధ్యలో కురిసిన వానలకు గుబుర్లుగా పెరిగిన దోమల కంప, దురదగొండి, పరమేశుని కంప తదితరేతర పిచ్చి – ముళ్ళ మొక్కల నిర్మూలన! ఈ పనిలో డజను మందికి పైగా.
2) బండ్రేవు కోడు మురుగు కాల్వ గట్టున – పూల మొక్కల నడుమ పెరిగి, అల్లుకొంటున్న దిక్కుమాలిన మొక్కలు, గడ్డి తొలగింపు! పనిలో పనిగా ఈ 15 మంది రోడ్డు మీదికి వచ్చిన కొమ్మల్ని కత్తిరించారు కూడ!
3) సుందరీకర్తలకు పని దొరకని చోటేముంటుంది? గత 3 రోజుల శుభ్ర – సుందరీకృత ప్రదేశాన్ని – మురుగు కాల్వ గట్టును – పారలతో, రైల్వే పారలతో గడ్డి తిరగేసి, చదును చేసే ఉద్యోగం వాళ్ళది! (బహుశా త్వరలో ఇక్కడ బోగన్ విలియా, గద్దగోరు వంటి పూల మొక్కల – చిన్న పాటి ఉద్యానాన్ని సృష్టించే ప్రణాళికేదో ఉండే ఉంటుంది)!
4) ఇక మిగిలిన వాళ్ళది చీపుళ్లతో ఊడ్పులు, ఈ గంటన్నర పాటు తెగి పడుతున్న గడ్డి – నిరర్ధక మొక్కలు – కొమ్మ – రెమ్మల్ని ట్రాక్టర్ లోకి తరలింపు వంటి అంతిమ సంస్కరణ!
ఈ వేకువ ఇంకా రెండు విశేషాలేవంటే – పడమటి వీధికి చెందిన మారుతీ ప్రసాద్ అనే యువకుడు – (ఉద్యోగం హైదరాబాదు లో, ప్రస్తుతం ఇంటి నుండే పని) – 2 ½ కి.మీ దూరం వేకువ జామునే వచ్చి, వీధి శుభ్రతలో పాల్గొని, ఈ రెండు – మూడు నెలల పాటు గ్రామ బాధ్యత పంచుకొంటానని ప్రకటించడం,
నేటి స్వచ్చోద్యమ సందడిలో ముఖ్య భాగం నలుగురైదుగురు బాలకార్మికులదే. దాసరి రామమోహనరావు – స్వర్ణలత గార్ల కుటుంబంలోని నాలుగోతరం వారసులు వీళ్ళు!
ఇన్ని సామాజిక వర్గాల – ఇన్ని వయసుల వాళ్ళ – వృత్తుల వ్యక్తుల పరస్పర దైనందిన ఆత్మీయ కలయికకు, తమ గ్రామ పునీత కృషిలో వేలాది దినాలుగా పొందుతున్న సంతోషానికి స్వచ్చ చల్లపల్లి కార్యకర్తలు ఎలా దూరం కాగలరు? ఈ ఉద్యమ ప్రధాన సృష్టి కర్త – డాక్టర్ - డి.ఆర్. కె. ఈ దైనందిన స్వచ్చోద్యమాన్ని పర్యవేక్షించక, పరవశింపకపోతే తన కెలా నిద్రపడుతుంది?
6.15 పిదప తాతినేని పూల మొక్కల రమణ గారి రేపటి ఆత్మీయ విందు ప్రకటన తోను, ఆర్య-ఆరవ్ ల సంయుక్త గ్రామ మెరుగుదల సంకల్ప నినాదాలతోను నేటి 2 గంటల స్మరణీయ కృషికి స్వస్తి.!
రేపటి మన వీధి స్వచ్చతా విధులు కూడ బండ్రేవు కోడు మురుగు కాల్వ(గంగులవారిపాలెం దారిలో) గట్టు పైనే!
స్వచ్చోద్యమమెందు కొరకు?
అసాధ్యమే సుసాధ్యమైన ఆనందాన మునుగుటకో
విస్తుబోయి చూచుటకో - ప్రశస్త మనుచు మెచ్చుటకో
చల్లపల్లి స్వచ్చోద్యమ సరంభము లేదు సుమా!
ఆచరించు- అనుభవించు అత్యుత్తమ పథము సుమా!
ఒక ‘స్వచ్ఛ సుందర చల్లపల్లి’ కార్యకర్త
31.07.2021.