ఒక్కసారికి మాత్రమే వాడి వదిలించుకొనే ప్లాస్టిక్ వస్తువులను వాడనే వాడం!

జాతీయ రహదారి శుభ్ర – సుందరీకరణ వేడుకలు - @ 2219*.

గురువారం (02.09.2021) నాటి బ్రహ్మముహూర్తమైన 4.25 కు అవనిగడ్డ రహదారిలో – పెద్ద వడ్లమర దగ్గరి పద్మాల నడుమ – వాట్సాప్ తొలి ఛాయాచిత్రంలో ఠంచనుగా హాజరైన 14 మంది కాక, కొద్ది వ్యవధిలో మరొక 10 మంది కూడ కలిసి, చేసిన నిర్వాకం ఏమిటి? రోడ్డు ప్రక్క ఖాళీ స్థలాల కబ్జానా? సొంత పొలాన్ని, వాటి గట్లనీ బాగు చేసుకునేందుకా? పత్రికలలో – టీ. వీ. ల్లో – సామాజిక మాధ్యమాల్లో విహరించేదుకా? కానే కాదు; ఇలాంటి ప్రశ్నలెవరి మనసుల్లోనైనా ఉంటే – గింటే మాట రూపాన కాక, చేత రూపంగా బదులిచ్చేందుకే! తమది వాగ్ధాటి కాదు, ప్రచారార్భటి కాదు – ఉన్న ఊరి స్వచ్ఛ – శుభ్ర – సౌందర్య – స్వస్తతా భద్రతలే తమకు ముఖ్యమని ఋజువు చేసుకొనేందుకే!

ఆ లక్ష్యం కోసమే ఈ 20 మందికి పైగా స్వచ్చంద శ్రమదాతలు 2219* వ రోజున కూడ పాటుబడ్డారు. నిజానికి ఈ నాగాయలంక మార్గం దాతల చలవతో – అధికారుల చొరవతో – అదే పనిగా చెప్పనక్కర లేని కార్యకర్తల సాటిలేని మేటి కృషితో పరిశుభ్రంగాను, సుందరంగాను ఉండనే ఉన్నది. ఐనా సరే – అందమైన ఈ రహదారి ఆకృతిలో చిరులోపాలెందుకుండాలనీ, వేల దినాలుగా గ్రామ మెరుగుదలకంకితమైన తమ వ్యసనాన్ని బట్టీ – కార్యకర్తలీ వేకువ జాములో – నిన్న స్వచ్ఛ పరచిన కొంత భాగంతో సహా – బండ్ల సుబ్బన్న ఆశ్రమం దాటి తమకు నచ్చినట్లు శుభ్రపరచిన విధంబెట్టిదనగా:

- ఒకరిద్దరు మెరికలు మురుగు కాలువ వంతెన కల్వర్టుల్ని – ముఖ్యంగా పడమటి వైపున తుక్కు సర్ది, మట్టి – రాతి ముక్కల మిశ్రమాన్ని కప్పి రోడ్డు కోత నాపి, కల్వర్టు భద్రతకై పూనుకొన్నారు.

- బాట కుభయ దిశలా కనిపించిన ప్రతి గడ్డినీ – పిచ్చి, ముళ్ళ మొక్కల్నీ ఒకటీ అరా కనిపిస్తే ప్లాస్టిక్ తుక్కునీ – ఖాళీ మద్యం సీసాలనీ కత్తి వీరులు పది మంది కోసి, నరికి, ఏరి, సమీకరిస్తూ పోయారు. ఏ కాస్త అందహీనంగా కనిపించినా – ఏ పూల మొక్కనీ, హరిత వృక్షాన్ని చక్కబెట్టక వదల్లేదు.

- గ్రామ సుందరీకరణ బాధ్యులైతే – ఇక వాళ్ల దీక్షే వేరు – మనకు చంద్రునిలో మచ్చగా అనిపించేది వాళ్ల దృష్టిలో పెద్ద లోపం! ఆ చీకటిలోనే కల్వర్టు గోడ మీద నిలిచి మొక్కల్నీ, చెట్లనీ కత్తిరించి, పాదులు చేసి, పట్టి పట్టి సుందరీకరించనిదే వాళ్ళకు నిద్ర పట్టదు కాబోలు!

- నలుగురు చీపుళ్ళ వారు, ముగ్గురు దంతెల వారు యధా ప్రకారం తమ బాధ్యతలకు కట్టుబడ్డారు.

          ఎవరి పిచ్చి వాళ్ల కానందమనీ, ఎవరి వ్యసనం వాళ్లకు సమ్మగా ఉంటుందనీ చెప్పే మాటలు, నిజమే కావచ్చు! ఊరిలో – మురుగులో – వల్లకాడులో – రహదార్ల వెంట బాగు చేసి, పూల వనాలు పెంచి ఆనందించేదేమో స్వచ్ఛ కార్యకర్తలు ;

తమ వ్యాపారాలకో, సౌకర్యాలకో, స్వార్ధాలకో ప్రతి అంగుళాన్ని ఆక్రమించి, పేడ దిబ్బలు వేసి, గొడ్లను బాటల మీద కట్టి....గాని, సంతృప్తి చెందేదేమో కొందరు తెలివి మీరిన గ్రామ సహోదరులు! (ఓ మహాత్మా! ఓ మహర్షీ! ఎంత కాలం ఇంత వింతలు?)

          6.25 వేళ శ్రమదాన ఫలిత సమీక్షకు ముందు పట్టుదలతో ముమ్మారు తన గ్రామ స్వచ్ఛ – శుభ్ర – సౌందర్య సాధనా సంకల్ప నినాదాలు చేసినది యువ కార్యకర్త రాజు గారు. కనుల పండుగగా కార్యకర్తల శ్రమ వేడుకను చూసి వెళ్లినది నాగాయలంకకు చెందిన విలేకర స్వచ్ఛకార్యకర్తలు.

          రేపటి మన గ్రామ అంకిత దీక్ష కూడ ఇదే దారిలో – బండ్ల సుబ్బన్న ఆశ్రమ సన్నిధిలోనే ఉండగలదు!

          ప్రాణవాయు పరిరక్షణ

స్వచ్చోద్యమ చల్లపల్లి కధాక్రమం బేదనగా...

సామాజిక ఋణం తొలుగు తాత్త్వికత పునాదిగా...

బస్టాండున – శ్మశానాన – రహదార్లలో చెట్లు నాటి

పచ్చదనం – ప్రాణవాయు పరిరక్షణ చేయడం!       

ఒక ‘స్వచ్ఛ సుందర చల్లపల్లి’ కార్యకర్త

02.09.2021.