ఒక్కసారికి మాత్రమే పనికొచ్చే ప్లాస్టిక్ వస్తువులను ఎవ్వరమూ వాడవద్దు!
2244* వ నాటి 24 మంది తుది మెరుగులతో రహదారి స్వచ్ఛ – శుభ్ర – వైభవం.
సోమవారం వేకువ కూడ 4.20 వేళకే 15 మంది ఔత్సాహికుల సంసిద్ధత! అతి త్వరలోనే నవ కార్యకర్తల చేరికతో అది 24 మంది బలగం స్వచ్చోద్యమకారుల పాదస్పర్శకు నోచుకుకున్న ప్రదేశం కూడా నిన్నటిదే- అపార్ట్ మెంట్ల, బండ్రేవు మురుగు వారధుల మధ్యస్తమే!
తమకు పౌరహక్కులే కాక, బాధ్యతలు కూడ ఉన్నవని మరచిపోని రెండు డజన్ల మంది స్వచ్చంద శ్రమదాతలొకవైపు – నిన్న, మొన్నటి శుభ్ర – సుందరీకృత ప్రదేశంలో నిర్లక్ష్యంగా ఇంటి వ్యర్ధాల ప్లాస్టిక్ సంచుల్ని విసరగల బాధ్యతారాహిత్యమింకొక ప్రక్క! కనీసం ఈ ఒక్క రోజుకు గెలుపెవరిదంటే – స్థిత ప్రజ్ఞత ప్రదర్శిస్తున్న – సుదూర దృష్టితో అడుగులేస్తున్న – సహనశీల స్వచ్చోద్యమానిదే! (అంతిమ విజయం మాత్రం ఇంకో మూడు నాలుగేళ్ల తదుపరి భవిష్యత్ – కాలమనే వెండి తెర మీద చూడవలసిందే!)
చల్లపల్లి స్వచ్చోద్యమం ఎందరెందరికో స్ఫూర్తినివ్వడమే కాదు – ఏ సంఘటన నుండైనా స్ఫూర్తి పొందగలదని కూడ తెలిసొచ్చింది. జనసైనికుల పిలుపుతో బస్టాండు ఎదుటి – 3 రోడ్ల కూడలోని రహదారి గుంటలను పూడ్చడంలో స్వచ్ఛ కార్యకర్త కూడ పాల్గొనడం, అందుకు సామాజిక మాధ్యమంలో కనిపించిన అభినందనలే ఋజువు. ప్రజాసౌకర్య రక్షణలో ప్రభుత్వాలు విఫలమైతే – ప్రజలే ఆ బాధ్యత కూడ నిర్వహించక తప్పదు!
ఇక, ఈనాటి కార్యకర్తల శ్రమదానరీతులెలా ఉన్నవంటే :
- ముగ్గురు కార్యకర్తలు ముందుచూపుతో బాటకు దక్షిణపు దిక్కున కరెంటు తీగలనందుకోగలవనిపించిన పెద్ద చెట్ల కొన్ని కొమ్మల్ని బారు గడకత్తులతోను, అవసారానుగుణంగా పెద్ద నిచ్చెన మీదకెక్కి కూడ తొలగించారు.
- సుమారు పది మంది రోడ్డు ఉత్తర దిశగా బాట కడ్డం వస్తాయనుకొన్న కొన్ని శాఖల్ని మాత్రమే కత్తిరించుకుంటూ పోయారు.
- ఇద్దరు ముగ్గురి పని – బండ్రేవు కోడు కాల్వ వంతెన గోడల్ని శుభ్రపరిచి, తాము గతంలో శ్రమించి, వ్యయించి వేసిన రంగుల అందాన్ని మరొకమారు ప్రదర్శించడం.
- పనిలో పనిగా మురుగు కాల్వ పడమటి – దక్షిణ గట్టులో కొంత మేర కూడ శుభ్ర పడింది.
- ఆకులలముల్నీ, కొమ్మ రెమ్మల్నీ, ఇతర వ్యర్ధాలనీ, చెత్తనీ పోగులు చేసి, ట్రాక్టరులో నింపుకొని చెత్త కేంద్రానికి తరలించినది మరికొందరు.
- నలుగురు ఆద్యంతం చీపుళ్లతో ఊడ్చే సత్కార్యంలోనే ఉన్నారు.
6.00 వేళకు – భానూదయ నేపధ్యంలో DRK గారు తీసి, వాట్సాప్ లో పెట్టిన పాగోలు రహదారి అందాన్ని అందరూ వీక్షింతురుగాక!
దైనందిన కృషి సమీక్షా సమావేశంలో తమ స్వచ్ఛ – శుభ్ర – సౌందర్య సంకల్ప నినాదాలను ముమ్మారు వినిపించినది యువ కార్యకర్త రాజు గారు.
వీరబ్రహ్మం గారి గుడి, స్వచ్ఛ – పరిశుభ్ర – టాయిలెట్ల దగ్గరి పునః పారిశుధ్యం నిమిత్తం మనం రేపటి వేకువ కలువదగిన చోటు మహాబోధి స్కూలు మొదటి గేటు వద్ద.
ఈ మహాత్ములకే ప్రణామం – 19
వేకువల స్వచ్చంద సేవలు – బ్రహ్మ సమయపు సమావేశము -
హరిత వేడుక నిర్వహణలూ – హ్లాదకర చర్చోపచర్చలు
అవసరార్ధమనేక చోట్ల విహార యాత్రల ప్రమోదమ్ములు
సాధ్యపరచిన స్వచ్ఛ – సుందర సాహసికులకు నా ప్రణామం!
ఒక ‘స్వచ్ఛ సుందర చల్లపల్లి’ కార్యకర్త
04.10.2021.