ఒక్కసారికి మాత్రమే పనికొచ్చే ప్లాస్టిక్ వస్తువులను ఎవ్వరమూ వాడవద్దు!

పాగోలు బాటకు 14 వ, చల్లపల్లి ప్రాంతానికి 2245^* వ నాటి శ్రమ సందేశం.

            నమ్మక తప్పని యదార్ధం ఈ గ్రామ స్వచ్చంద శ్రమదాన ప్రస్థానం! మంగళవారపు (05.10.2021) వేకువ వేళ కూడ 4.21 కే పాగోలు దారిలో ప్రత్యక్షమైన – ముకుళ హస్తాలతో సంసిద్ధులైన 17 మందీ, నాతో సహా తరువాత వచ్చిన ఆరుగురూ – వెరశి 23 మందీ సాగించిన గ్రామహిత పరిచర్యలేమిటి? సాధించిన స్వచ్ఛ – శుభ్ర – సౌందర్యాలేమిటి? మాటల మర్మాలతో గాక, తమ క్రియాశీలక సందేశమేదైనా ఉందా? భ్రష్టు పడుతున్న సామాజిక చైతన్యానికీ, పరిసరాల స్వచ్ఛ – శుభ్రతల లోపంతో అడుగంటుతున్న ప్రజారోగ్య దుస్థితికీ చల్లపల్లి స్వచ్చోద్యమం స్ఫూర్తి మంత్రం కాగలదా?...

            అసలిలాంటి అరుదైన – సామాజిక చైతన్య ప్రబోధకమైన శ్రమదానానికి సమాజం నుండి, పంచాయితీల నుండి, ప్రభుత్వాల నుండి ఏపాటి అనుశీలన, ప్రోత్సాహం, గుర్తింపు లభిస్తున్నవి? ఎందరు సహృదయులు స్తబ్దతను వీడి, ప్రక్కింటి వాళ్లను కలుపుకొని తమ వీధి – గ్రామ సంక్షేమానికి ముందుకొచ్చారు? ఏ అధికారుల, నేతల, దాతల, సామాజిక చింతనా పరుల క్రియాశీలక సహకారం ఏ మాత్రంగా లభించింది?... ఇవన్నీ ఇప్పటికి ప్రశ్నలే? సానుకూల స్పందన, సమాధానాలు దొరికినపుడే పరిష్కారాలు!

            స్వచ్ఛ కార్యకర్తలు ఈ పాగోలు బాటలో 14 రోజులుగా ఏమి సాధించారని కాక – ఏమి చేయలేదని ప్రశ్నించుకోవడమే సబబు. నిల్వ మురుగు, దాని సిల్టు తోడి, లాగి మురుగును ముందుకు నడపలేదా? మోకాలి లోతు మురుగులో దిగి , వందలకొద్దీ తాటి టెంకల్ని బైటకు తీయలేదా? కరెంటు తీగలను సమీపిస్తున్న పెద్ద చెట్ల ఎత్తు కొమ్మల్ని తొలగించి, మహాగని 6, యర్ర తురాయి 12, అడివి తంగేడు 62, వేప 1 పూల మొక్కల్ని కొత్తగా నాటిందీ వీళ్లే!

            ఈ రహదారికి సంబంధించిన ప్రతి చిన్న విషయాన్ని ఆలోచించి, ప్రతి సూక్ష్మ లోపాన్ని సరిదిద్ది, స్వచ్ఛ – శుభ్రతల్ని మప్పి, పూల పరిమళాన్ని, సౌకర్యాన్ని ప్రదర్శించి, పచ్చదనాల ఆహ్లాదాల్ని పంచేందుకు – అంతకు ముందటి శ్రమ కాక – క్రొత్తగా ఆరేడు వందల పని గంటలు శ్రమించింది స్వచ్ఛ కార్యకర్తలే!

            (ఐతే – వీళ్ళకసాధ్యం ఒకే ఒక్కటి ఉండిపోయింది. ప్రతి వేకువ ఇన్ని చెమటలు కార్చి – ప్రత్యంగుళాన్ని శ్రద్ధగా తీర్చిదిద్ది, ఏ పరిసర గ్రామస్తుల కోసం – ఏ ప్రయాణికుల ఆహ్లాదం కోసం ఇంతగా తపించారో – ఆ సమీప గృహస్థులు, బాటసారులు ఒక్కమారైనా చేతులు కలపలేదు!)

            6.20 వేళ – మహాబోధి తొలి గేటు ఎదుట జరిగిన నేటి కృషి సమీక్షకు ముందు పలనాటి అన్నపూర్ణ ముమ్మారు ప్రవచించిన గ్రామ స్వచ్ఛ – శుభ్ర – సౌందర్య నీరాజన నినాదాలతోను, ఏలిన వారి చర్యలతో గ్రామ ముఖ్య చెత్త కేంద్రం కుంచించుకుపోతున్న వేదనతోను నేటి కార్యకర్తల 2 గంటల గ్రామ మెరుగుదల ప్రయత్నం ముగిసింది.

            ఇక రేపటి వేకువ మన పునర్దర్శన ప్రదేశం బండ్రేవు కోడు వంతెన.

            ఈ మహాత్ములకే ప్రణామం – 20

చల్లపల్లి స్వచ్ఛ చరితలు, కార్యకర్తల మనోరీతులు,

హరిత సుమ సుందర ప్రగతులు, అవార్డులు మరి ఆ రివార్డులు

మహానందపుటాది వారపు మంచి వార్తలు రాష్ట్రమంతట

వ్యాప్తి చేసిన స్వచ్ఛ సుందర కార్యకర్తకు నా ప్రణామం!

ఒక ‘స్వచ్ఛ సుందర చల్లపల్లి’ కార్యకర్త

05.10.2021.