ఒక్కసారికి మాత్రమే పనికొచ్చే ప్లాస్టిక్ వస్తువులను ఎవ్వరమూ వాడవద్దు!

చిన్న అవాంతరాల్ని అధిగమిస్తూ 2246* వ నాటి శ్రమవినోదం.

            స్వచ్ఛ కార్యకర్తలతో బాటే మేల్కొని, దబాదబా ఉనికి చాటుకొన్న వర్షం సాక్షిగా – ముందనుకొన్నట్లు  కాక – నాగాయలంక మార్గం బదులు నడకుదురు రోడ్డులో జరిగిన వేకువ కాల శ్రమదానం బాధ్యతగాను, ప్రయోజకంగాను, వేడుకగాను ముగిసింది. శ్రమదాన రంగస్థలం మార్పు వల్ల కొన్ని నిముషాలు వెనుకగా 24 మంది శ్రమదాతల కృషి మొదలయింది, 6.15 దాక విస్తరించింది.

            నడకుదురు బాటలో – గ్రామ కేంద్రానికి కిలోమీటరు పైగా దూరాన - వాహనాలు నిలిపిన చోటు నుండి విజయవాడ మార్గం దిశగా కొనసాగిన స్వచ్చంద సేవల వివరాలు :

- రోడ్డుకు దక్షిణంగా పెద్ద చెట్ల కొమ్మలు కరెంటు తీగల్ని ముద్దాడబోతున్నాయని గ్రహించిన సుందరీకర్తలు బారు కత్తెరతో – దంతెల సాయంతో కత్తిరించారు. ఆపనేదో ఒక ఉద్యోగ విధిగా కాక, మొక్కు బడిగా కాక – సౌందర్యమయంగా నెరవేరడమే ఇక్కడ విశేషం!

- గత నాలుగైదు నెలల కాలంలో ఉత్తరం వైపున ఎంత గడ్డి, ఎన్ని పిచ్చి ముళ్ళ మొక్కలు, కంపలు, ప్లాస్టిక్ తుక్కులు, దిక్కుమాలిన చౌకబారు మద్యం సీసాలు, ఎక్కడివో – ఎవరివో పాత గుడ్డ ముక్కలు – ఇంకా ఎన్నెన్నో స్వచ్ఛ కార్యకర్తల కోసం ఎదురు చూస్తున్నాయి. 12 మంది కార్యకర్తలు 150 గజాల మేర – గత నాలుగైదు మాసాల స్వచ్ఛ – శుభ్రతా బకాయిలు తీర్చేశారు.

- పూల మొక్కల పాదులు సరిదిద్ది, అలవి మాలిన కొన్ని పెద్ద కొమ్మల్ని తొలగించి, గడ్డి చెక్కి, రహదారి అందానికర్ధం చెప్పారు మరికొందరు.

- దాని పాటి కది అడ్డదిడ్డంగా, అక్రమంగా పడి ఉన్న పెద్ద వృక్ష కాండాన్ని మోకులు కట్టి, లాగి, మరో పెద్ద చెట్టు కానించి, అరుగుగా మార్చారు(ఇది మందు బాబుల అడ్డా కాకుండు గాక!)

- రోడ్డుకడ్డంగా, లోతుగా గుంటపడి, చిన్న చెరువుగా నిల్చిన నీటిని ఒక కార్యకర్త శ్రద్ధగా ప్రక్కకు మళ్లిస్తున్న దృశ్యం చూశారా?

            ఇలా ఈ స్వచ్చంద శ్రమదాన విశేషాలు ఎంతగా చెప్పినా తరగవు. మరి ఈ నిస్వార్ధ – నిర్వికల్ప పరోపకార పారీణతనే మన నుండి జాతిపిత ఆశించేది!

            ఈ శ్రమైక జీవన సౌందర్య సన్నివేశాన్ని – ఈ గంటన్నర కాలపు కష్ట జీవుల చెమట సుగంధాన్ని మహాకవి శ్రీశ్రీ అత్యద్భుత కవితామయంగా కీర్తించింది!

            మన సమకాలంలో ఆసుమనోహర జీవన తత్త్వాన్ని ఈ మాత్రం ప్రదర్శిస్తున్న స్వచ్ఛ సైనికులకే నా సవినయ నివాళులు!

            నేటి ముగింపు సమావేశంలో మూడు మార్లు మనసా – వాచా – కర్మణా సొంత ఊరి పరిశుభ్ర – స్వచ్ఛ – సౌందర్య ఆకాంక్షా నినాదాలు పలికినది సజ్జా ప్రసాదు గారైతే – ఈవానలో, బురదలో, నడకుదురు రహదారి సౌందర్య సాధకుల్ని అభినందించినది డాక్టర్ DRK. ప్రసాదు గారైతే – హర్షామోదాలు తెల్పింది అందరూ!

            తన నెల చందా – 520/- సమర్పించినది కోడూరి వేంకటేశ్వర మహోదయుడు!

            రేపటి వేకువ మన కలయిక, శ్రమదాన వేడుక నడకుదురు మార్గంలోని ‘రాజా’ వెంచర్ దగ్గరే!

            ఈ మహాత్ములకే ప్రణామం – 21

దివారాత్రములదే చింతన – గ్రామ సొగసుల కథే భావన

ఇందరిందరు కార్యకర్తలు – సహకరించిన ఊరి పెద్దలు

“ఉద్యమంబును నడపు నేతలు ఉండు గ్రామమె చల్లపల్లిని”

పేరు తెచ్చిన వారి కెల్లను పేరు పేరున నా ప్రణామం! 

ఒక ‘స్వచ్ఛ సుందర చల్లపల్లి’ కార్యకర్త

06.10.2021.