ఒక్కసారికి మాత్రమే పనికొచ్చే ప్లాస్టిక్ వస్తువులను మనం ఎందుకు వాడాలి?

దీపాల పండుగ శుభాకాంక్షలతో – 2267* వ నాటి శ్రమానందం

            శ్రీమత్ ప్లవనామ సంవత్సర ఆశ్వయుజమాస - (శాలివాహన శక – 1943 - చిత్త అంతాన) గురువాసర -  4.21 సమయాన – “అయం ముహూర్తోసుముహూర్తః” అనుకొని - నడకుదురు బాటలో – చిరుజల్లులో – స్వగ్రామ స్వచ్ఛ - సుందర పూజకు దిగిన కార్యకర్తలు 22 మంది. అక్కడి డ్రైన్ గణపతి సాక్షిగా – వడ్లమర దిశగా వాళ్లు మెరుగుపరచిన రహదారి 125 గజాలు! ఆ నిత్య నైమిత్తిక పారిశుద్ధ్య కర్మకాండలకు సాక్షులు సూర్యచంద్రులు కాదు – తమ కళ్ళెదుటే స్వచ్చోద్యమ విలాసాన్ని రోజూ చూస్తూ కూడ తమ నివాస వీధి స్వస్తతను పదే పదే అపహాస్యం చేస్తున్న కొందరు వింత మనుషులు!

            తమ ఆహ్లాదం, ఆరోగ్యం కోసం వానలో తడుస్తూ స్వచ్ఛ కార్యకర్తలు తమ ఇళ్ల పరిసరాల్ని ఊడ్చి -  మొక్కలు పెంచి - ఇన్నేళ్లుగా పాటుబడుతుంటే - అందులో పాల్గొనకపోగా - రహదారిని మలినపరిచే చర్యలింకెన్నాళ్లు?

            ఒక ప్రక్క “నభూతో నభవిష్యతి” అన్న చందంగా గ్రామ మెరుగుదల కృషి! సుచిర కాలంగా ఆ ఉద్యమానికి సమాంతరంగా - గొడ్లను కట్టేసి, పెంటపోగులు పోసి, అన్ని విధాల కంగాళీచేసి, “రహదారిని ఇన్ని రకాలుగా కూడా వాడుకోవచ్చా!  ఇంతగా చెడగొట్టవచ్చా!...” అనే సంభ్రమాశ్చర్య కారణాలొక ప్రక్క! ఐతే – ఈ బాట మీదనే చల్లపల్లి స్వచ్చోద్యమ శకటం ఒక్కోమారు కుంటుతూ సాగాలి!

            గ్రామ స్వచ్చంద శ్రమదాతల ఉడుం పట్టునూ - తద్భిన్నంగా సదరు ఉద్యమ అపహాస్య బ్రహ్మల్నీ చూస్తుంటే :

            “సరసము విరసము కొరకే - పరిపూర్ణ సుఖంబులధిక బాధల కొరకే

                                                       .....  - ధర తగ్గుట హెచ్చుకొరకె తధ్యము సుమతీ!”

అనే నీతి పద్యం గుర్తొస్తున్నది.

            చల్లపల్లి స్వచ్ఛ – సుందరోద్యమ మహా గ్రంథంలోని ఈ నాటి 2267* వ పుట తెరిస్తే - కన్నవీ, విన్నవీ విశేషాలు :

- అటు విద్యుత్ శాఖ వారి బాధ్యత నెరవేరుస్తూ, ఇటు రహదారి ఆహ్లాదాన్ని సాధిస్తూ మరి కొన్ని చెట్లను ట్రిమ్ చేసిన సుందరీకర్తలు

- తడిలో, బురదలో ఎలా కూర్చుని - ముందుకు జరుగుతూ పనిచేస్తారో గాని,

   ముళ్ల – పిచ్చి మొక్కల్ని, గడ్డినీ నరికి, చెక్కిన 10 మంది శ్రమదాతలు

- దంతెలతో, చీపుళ్లతో ఖాళీ సీసాల్ని, ప్లాస్టిక్ తుక్కుల్ని లాగి, ఊడ్చి, ట్రక్కుల కెత్తి, చెత్త కేంద్రానికి చేర్చిన బాధ్యులు....

            ఇక సమీక్షా సమయపు సంగతులు : - ఏడాదికొకటి కాక, ఎక్కువ పుట్టిన రోజుల మిషతో శంకర శాస్త్రీయ అల్పాహార పంపకం,

- పండుగ వేళ సుభాషిణీ వితరణగా కార్యకర్తలకు కదళీఫల పందేరం,

- గంధం బృందావన సుకుమార ప్రవచిత గ్రామ శుభ్ర - సౌందర్య స్ఫోరక నినాదాలు....

            రేపటి శ్రమదాన అవసర ప్రదేశమూ, వేకువనే మన కలయిక ప్రాంతమూ నడకుదురు బాటలోని వినాయక దేవాలయమే!

            ఈ మహాత్ములకే ప్రణామం – 40

అడ్డు వస్తే నమస్కరించిన గడ్డు కాలం దాటుకొంటూ

ఊరి వీధుల నొక్కటొకటిగ ఉద్ధరిస్తూ - మెరుగు పరచుచు

పూల తోటగ మార్చి వేసిన - పుష్కలంగా స్ఫూర్తి నింపిన –

విక్రమించిన స్వచ్ఛ - సుందర వీరులకు నా తొలి ప్రణామం!

ఒక ‘స్వచ్ఛ సుందర చల్లపల్లి’ కార్యకర్త,

‘మనకోసం మనం’ ట్రస్టు బాధ్యుడు

04.11.2021.