ఒక్కసారికి మాత్రమే పనికొచ్చే ప్లాస్టిక్ వస్తువులను ఎప్పుడూ వాడం...

2285* వ నాటి గ్రామ మెరుగుదలకై కార్యకర్తల కదన కేళి.

            శనివారం వేకువ కూడ అదే ముహూర్తం - 4.19. అప్పటికే వచ్చిన 15 మంది కాక – అంతే మంది చేరికతో మొత్తం 30 మంది స్వచ్చంద శ్రామికుల వీధి పారిశుద్ధ్య ప్రయత్నం పై శీర్షికలో ఉటంకించినట్లు – కదనం కాక మరేమిటి! నేటి 50 కి పైగా పని గంటల వ్యవధిలో బాగుపడి, 6.30 కు కనువిందు చేస్తున్న ప్రాంతం – సాగర్ టాకీసు ఉప మార్గంలోని సామ్యవాద వీధి నుండి – అటు విజయ్ నగర్, ఇటు అశోక్ నగర్ ల నడిమి 3 అడ్డ రోడ్ల మేర! కొసరుగా ఒక మురుగు కాల్వ, సజ్జా ప్రసాదు గారి బజారులో కొంత.

            మేధోశ్రమకన్న దైహిక శ్రమ కష్టం కావచ్చు. సదరు శరీర కష్టం మురుగు కాల్వల్లోనో, వీధి ఎంగిలాకుల – ప్లాస్టిక్ తుక్కుల - కుళ్లి కంపుగొట్టే క్రిందటి రోజు ఆహారపదార్దాల – త్రాగి పడేసిన ఖాళీ సారా సీసాల వంటివి ఎత్తి శుభ్రపరచేదైతే - పంచాయతీ పారిశుద్ధ్య కార్మికులు తప్ప ఎవరు ముందుకొస్తారు? ఎంత కష్టాన్నైనా ఇష్టపడి చేస్తే అలసటే ఉండదని మానసిక విశ్లేషకులు చెపుతారు! అందుకేనేమో - ఈ స్వచ్చ కార్యకర్తలు ఇన్ని వేల రోజులుగా అత్యధికులు అసహ్యించుకొనే ఇన్ని రకాల పనుల్లో కూడ సంతోషం మూటకట్టుకొంటున్నారు!

            కాకపోతే మరేమిటి? గ్రామస్తులు హాయిగా నిద్రాపరవశులైన వేళ - ఇందరు వాలంటీర్లు - గృహిణులు, డాక్టర్లు, పించనుదారులు, ఉద్యోగులు రహదారిని ఊడుస్తూ – పిచ్చి, ముళ్ల మొక్కల్ని తొలగిస్తూ – సమస్త వ్యర్ధాలను సేకరించి, ట్రాక్టర్ లో నింపుకొని, చెత్త కేంద్రానికి తరలిస్తూ - రోడ్ల వెంట పూల సోయగాల్ని, పచ్చదనాన్ని మెరుగుపరుస్తూ ఇప్పటికి ఏ 3 లక్షల పనిగంటలో ఎలా శ్రమిస్తారు?

            ఇక్కడ నా అజ్ఞానం, సందిగ్ధం ఒకటున్నది :

“ఒకప్రక్క తమవీధిలో, ముంగిళ్లలో 30 మంది పదేపదే ఊడ్చి-  శుభ్రపరుస్తుంటే – మైకు నుండి వినిపించే జేసుదాసు మంద్ర కంఠపు పాటల్తో శ్రుతికలుపుతూ శ్రమదానం చేస్తుంటే – ఏ గృహస్థులు వీధి కశ్మల కారకులయ్యారో, వారికి మాత్రం సదరు జేసుదాసు శ్రావ్య గీతాలు మంచి జోలపాటలుగా పనిచేశాయా” – అని!

            నేటి వేకువ చలిగాలిలో కూడ ఒక యువ కార్యకర్త ముఖం మీద చెమట బిందువులు చూసినప్పుడు ఒక పాత సినిమా (స్వర్ణ కమలం) పాట –

            “అందెల రవళులు పదములవా? అంబరమంటిన హృదయముదా...? అనేది గుర్తొచ్చి.

            “నీటి ముత్యములు మంచులవా – శ్రమదానంతో స్వేదములా...?”

            అనే పాట స్ఫురించింది!

            నేటి శ్రమదాన విరమణ తర్వాత, గోళ్ళ వేంకటరత్నం ఊరి స్వచ్చ – శుభ్ర – సౌందర్యాకాంక్ష పిదప – అర గంట పాటు అందరూ మన అత్యంత సీనియర్ కార్యకర్త వేమూరి అర్జునరావు దంపతుల్నే గుర్తు చేసుకొని ఆయన సమర్పిత వారి విందునే స్వీకరించి, తదుపరి వారం దావణగిరిలో - వారిని పరామర్శించే ప్రణాళికనే చర్చించారు.

            గోపాళం శివన్నారాయణ గారి వైద్య శిబిరం దృష్ట్యా – రేపటి మన శ్రమదాన ప్రదేశం విజయా కాన్వెంట్ ప్రక్క వీధే అని గుర్తించమనవి!   

            గర్వపడుచు జైకొట్టుము

గర్వపడుము చల్లపల్లి కార్యకర్త సేవలకై 

జై కొట్టుము ఈ వేకువ శ్రమ విరాళ సంస్కృతికే

సిగ్గుపడుము ఇన్నేళ్లుగ చేయనందుకా కార్యం

అందించుము ఇంటింటికి స్వచ్చోద్యమ సందేశం!

ఒక ‘స్వచ్ఛ సుందర చల్లపల్లి’ కార్యకర్త &

‘మనకోసం మనం’ ట్రస్టు బాధ్యుడు

27.11.2021.