ఒక్కసారికి మాత్రమే పనికొచ్చే ప్లాస్టిక్ వస్తువులను ఎప్పుడూ వాడం...
గ్రామ ప్రధాన వీధి గుంటల పూడికలో...@2292* వ రోజు.
మూడు రోజుల - 1300/1400 కిలోమీటర్ల కన్నడ దేశ పరామర్శక – వినోద విహారయాత్ర ముగించి 20 గంటలైనా కాలేదు. ఆరుగురు కార్యకర్తలు సోమవారం వేకువనే ఒక టాటాఏస్ వాహనంతో బెజవాడ రహదారిలో వెదకుతూ తారు పెచ్చుల్ని, రాతి ముక్కల్ని సేకరిస్తున్న దృశ్యం. ట్రక్కులో కెక్కించి, విజయవాడ బాట – కోట మలుపులోను, హీరో షోరూమ్ ఎదురుగాను రెండు గుంటల్ని పూడ్చి, చక్కబెట్టేందుకు గంటన్నర సమయదానం!
‘రెస్క్యూటీమ్’ అనబడే ఈ కార్యకర్తలకివన్నీ నిత్యకృత్యాలే కావచ్చు,
సదరు రోడ్ల గోతులెన్ని వాహనాలకు ప్రామాదికంగాను, చూసేందుక సహ్యంగాను, వాహన చోదకులకు మహాచిరాకుగా. శిరోవేదనగా ఉండడాన్ని ఆ బాధ్యతా మూర్తులు తట్టుకోలేకనే ఇవన్నీ చేస్తుండవచ్చు – గ్రామ సామాజిక సాదరులకు నా విన్నపమేమంటే:
అందరు గ్రామస్తులకూ ఈ కార్యకర్తలంత అభినివేశం, ఊరి మేలు కోసం ఉడుంపట్టూ ఉండకపోతేపోయె - గ్రామ వీధుల స్వచ్ఛ - శుభ్ర - సౌందర్యాలను అనాలోచితంగా భంగపరచకున్నా చాలు - అదే పది వేలు!
నేటి పని ముగిశాక నిత్య నూతన ప్రణాళికా బద్ధ గ్రామ మెరుగుదల కోసం ముమ్మారు నినదించినది మాలెంపాటి అంజయ్య మహోదయుడు!
సాహో! రెస్క్యూ దళమా!
కన్నడ సీమన ఎగసిన నిన్నటి స్వచ్ఛ పతాకం
ఈ వేకువ చల్లపల్లి వీధుల్లో ఎగరడం
గ్రామ భద్రతా వీరుల చెమట లిట్లు చిందడం
చల్లపల్లి స్వచ్చోద్యమ సంస్కృతికొక నిదర్శనం!
ఒక సీనియర్ ‘స్వచ్ఛ సుందర చల్లపల్లి’ కార్యకర్త
06.12.2021.