ఒక్కసారికి మాత్రమే పనికొచ్చే ప్లాస్టిక్ వస్తువులను ఎప్పుడూ వాడం...
‘రెస్క్యూ దళం’ అనే పేరుబడిన స్వచ్చ కుటుంబీకులు 2307* వ నాటి చర్యలు.
డిసెంబరు నెల చలి - అందులోనూ ఈ రెండు మూడు రోజులుగా దాని పంజా దెబ్బ ఇంకాస్త ఎక్కువగా ఉండగా - ఈ మంగళవారం నాటి వేకువ రెస్క్యూ టీమ్ మాత్రం ఇవేమీ పట్టించుకోక - రెండు ముఖ్య రహదార్లలో రోడ్డు భద్రతా చర్యలకు పాల్పడ్డారు! గ్రామస్తుల - ఇతర ప్రయాణికుల సౌకర్యం కోసం వారి వాహనాల మన్నిక కోసం తమ భద్రతను, తమ సౌఖ్యాన్ని లెక్కచేయని ఈ ఆరుగురికి ధన్యవాదాలు!
ఏదో గుర్తింపు సౌలభ్యం కోసం కొందరు స్వచ్ఛ కార్యకర్తలకు ఎవరో ఎప్పుడో “గ్రామ రక్షణ దళం” అనే బిరుదు తగిలించారు. వీళ్లేమో గత నాలుగేళ్ళ నుండి ఆ నిక్ నేమ్ ను 100% సార్థకం చేశారు! నిజానికి వీళ్లలో సగం మంది స్వచ్ఛంద శ్రమదానంలో ఆల్ రౌండర్సన్న మాట! వీళ్లు మోకాలి లోతుకు దిగి, శుభ్రం చేయని మురుగు కాల్వ ఉందా? బాగా ఎత్తుకెక్కి సుందరీకరించని చెట్లున్నాయా? శ్మశాన శుభ్రతలు కావచ్చు - రోడ్ల, వీధుల గుంటలు కావచ్చు - ఈ ఆరేడుగురి ఆపన్న హస్తాలు తగలని చోటులేవి?
ఈ గజగజలాడే చలి వేకువలో బాలాజీ విభాగ భవన సముదాయం దగ్గర్లోని డ్రైన్ల అంచుల తారు పెచ్చుల్ని, రాతి - పెంకు ముక్కల్ని ట్రక్కులో నింపుకొని - విజయవాడ రహదారిలోని 6 వ నంబరు పంటకాల్వ వంతెన రెండువైపుల గుంటల్ని పూరించడం ఒకటీ –
నడకుదురు మార్గంలో - ముఖ్యంగా మదర్ థెరిస్సా పాఠశాల ప్రక్కన గోతులు సరిజేసిన చర్యమరొకటీ –
ఈ సామాజిక పరోపకారానికి సదరు కార్యకర్తలే ప్రతిఫలమూ, కృతజ్ఞతా, గుర్తింపూ ఆశించకపోవడం వాళ్ల సౌజన్యమైతే – ఒక గ్రామ సామాజికుడుగా ధన్యవాదాలు తెలపడం, చాతనైతే కాస్త అభినందించి, అనుసరించడం నాలాంటివారి వివేకం!
తమ పని ముగింపు వేళ నడకుదురు రోడ్డు పరిసరాల్ని స్వచ్ఛ – శుభ్ర – సౌందర్య సాధనా సంకల్ప నినాదాలతో మూడు మార్లు మ్రోతెత్తించింది గంధం బృందావనుడు!
రేపటి వీధి పారిశుధ్య – సుందరీకరణల నిమిత్తం వేకువనే మనం కలిసి సాగవలసిన చోటు బైపాస్ మార్గంలోని అశోక్ నగర్ తొలి వీధి దగ్గరే!
సమర్పిస్తున్నాం ప్రణామం – 66
చెయ్యెత్తిన – జై కొట్టిన స్వార్థాని కనర్థానికి
ఉపేక్షించి – ఊరుకొన్న స్వచ్ఛ సైన్య శ్రమరీతికి
ఏం దక్కునొ – ఏం మిగులునొ ఈ గ్రామం కథ చివరికి
ఆ దుస్థితి మాన్పబూను అందరికీ ప్రణామం!
ఒక ‘స్వచ్ఛ సుందర చల్లపల్లి’ కార్యకర్త &
‘మనకోసం మనం’ ట్రస్టు బాధ్యుడు
21.12.2021.