ఒక్కసారికి మాత్రమే పనికొచ్చే ప్లాస్టిక్ వస్తువులను మనం ఎందుకు వాడాలి?
చల్లపల్లి స్వచ్చోద్యమకారుల 2310* వ నాటి తడాఖా!
ఈ మధ్య ఎక్కువ మార్లు స్వచ్ఛంద శ్రమకారులు కలుసుకొంటున్న వేకువ 4.18 సమయమే నేటి వీధి కాలుష్యం మీద సమర ముహుర్తం! ఆ సమర భూమి కూడ గత 10 - 12 రోజుల్లాగే బైపాస్ మార్గంలోని అశోక్ నగర్ 1వ, విజయ్ నగర్ రెండవ వీధుల దగ్గరే! కశ్మల రక్కసి మీద పోరు సాగించింది 27 మందే! వీరిలో ఏడుగురు స్థానికలైనందుకు నాకు సంతోషమే! గలీజుల విధ్వంసం జరిగి, పూర్తిగా బాగుపడింది 2 వ వీధి కాగా - పాక్షికంగా మెరుగుపడ్డవి రెండు బాటలు!
“ఐకమత్యమే బలం” అని మన పూర్వికు లేనాడో చెప్పితే- "వ్యక్తికి బహువచనం శక్తి!" అని శ్రీశ్రీ తనసొంత స్టైల్ లో ప్రతిపాదించాడు. అన్ని వార్డుల్లో అన్ని వీధుల్లో - అన్ని రోజుల్లో ఈ విజయ్ నగర్ ప్రాంతంలో వలే స్థానికులు గనుక స్వచ్ఛ కార్యకర్తలకు సహకరిస్తే - ఎక్కడికక్కడ గృహస్తులు సామాజిక స్పృహను ప్రదర్శిస్తే - తమ గృహాల - వీధుల స్వచ్ఛ – శుభ్ర - సౌందర్య - స్వస్తతల పట్ల ఒక కన్నేస్తే - వార్డు మెంబర్లు, పంచాయతీ పాలక వర్గాలు ఇంకాస్త బాధ్యత వహిస్తే.....మన ట్రస్ట్ చైర్మన్ గురవారెడ్డి చమత్కరించినట్లు – ఈ “చల్లపిల్ల” కేవలం 100 రోజుల్లో సర్వాంగ భూషితురాలై “స్వచ్ఛ జాతీయ సుందరి” గానెగ్గదా?
నా ఆలోచనల్ని “పగటి కలలు” అని కొట్టేయ వద్దు. “కలలు కనండి – నిజం చేసుకొనేందుకు శ్రమించండి....” అని ఈ దేశ మాజీ అధ్యక్షుడు (అబ్దుల్ కలాం) చెప్పి - ఋజువు కూడా చేశాడు!
అలాంటిది - ఇందరు అవగాహనా పరులు, విద్యాధికులు, సానుకూల దృక్పధులు ఉన్న చల్లపల్లి గ్రామం – ఇప్పటికే జాతీయ – అంతర్జాతీయ స్థాయిలో వార్తలకెక్కిన ఊరు – ఐకమత్యంతో కనుక అడుగేస్తే - ఎన్ని అద్భుతాలు జరగవు!
“అసాధ్యం అనే మాట మనం కల్పించుకొన్నదే! “సుసాధ్యం” అనే పదం కూడ ఎందరో – ఎన్ని మార్లో అనేక రంగాల్లో ఋజువు చేసిందే!
ఒక ప్రక్క 16 - 17 మంది కార్యకర్తలు విజయ్ నగర్ రెండన వీధి పొడవునా అశుద్ధతను, అస్తవ్యస్తాలను, డ్రైన్ల తప్పుడు నడకల్ని, పెరిగిన గడ్డిని, పిచ్చి – వ్యర్ధ తీగల్ని, కొమ్మల్ని, మొక్కల్ని, డొక్కు ప్లాస్టిక్ సీసాల్ని, ఇతర వ్యర్దాల్ని చెండాడి, సరిజేసి, ట్రాక్టర్ లోకేక్కిస్తుంటే -
సంఖ్య తక్కువైనా సుందరీకర్తలు బైపాస్ మార్గంలో పట్టి పట్టి మెరుగులు దిద్దుతుంటే -
విజయ్ నగర్ చివరి అడ్డ రోడ్డులో ఎండిన చెట్ల వ్యర్ధాల గుట్టల్ని మిగిలిన కార్యకర్తలు 6.15 దాక ట్రాక్టర్లో నింపుతూనే ఉన్నారు!
ఇదీ - మన ఊరి ఆదర్శ - ప్రయోజనకర – సుదీర్ఘ స్వచ్చంద శ్రమదానమంటే! స్వార్థం కోసం కాక – గ్రామ ఉమ్మడి మేలు కోసం జరిగే – ఎవ్వరూ వంక బెట్ట జాలని ప్రయత్నమంటే ఇదే! జాతిపిత ఆచరణ పూర్వకంగా దేశానికి చేసిన హితబోధ కూడా ఇదే! అంతే గాని – స్వచ్ఛ కార్యకర్తలు వారిస్తున్నా – బ్రతిమాలుతున్నా – వీధుల్లో, డ్రైనుల్లో చెత్త విసరడం కాదు - కనపడిన ప్రతి వీధి మార్జిన్లను పోటీపడి కబ్జాలు చేయడం కానేకాదు – అలాంటి చర్యలకు ఏ ఒక్క గ్రామ పాలక సభ్యుడైనా – అధికారి ఐనా మద్దతు పలకడం అసలే కాదు!
6.40 వేళ – కాఫీ ఆస్వాదనానంతర – గ్రామ స్వచ్చ – శుభ్ర – సౌందర్యాకాంక్షను నదురు బెదురు లేక ముమ్మారు నినదించింది చిరంజీవి పరసా జగదీష్ అనే 8 వ తరగతి కుర్రాడు!
రేపటి మన స్వచ్ఛ - పరిశుభ్ర కర్మక్షేత్రం కూడ బైపాస్ వీధిలోని విజయ్ నగర పరిసరాలే!
సమర్పిస్తున్నాం ప్రణామం – 69
ఒక విశిష్ట ప్రయోజనమును - ఒక సమంచిత జన హితమ్మును
సమాజ సేవకు లెన్నుకొనదగు సదాచరణాత్మక పథమ్మును
ఎంచుకొనిన - ఆచరించిన - నిర్వహించిన మహాశయులకు
చల్లపల్లి ప్రజల తరపున సమర్పిస్తున్నాం ప్రణామం!
ఒక ‘స్వచ్ఛ సుందర చల్లపల్లి’ కార్యకర్త
24.12.2021.