ఒక్కసారికి మాత్రమే పనికొచ్చే ప్లాస్టిక్ వస్తువులను ఎందుకు వాడాలి?

అలుపెరుగని - స్ఫూర్తి తగ్గని గ్రామ స్వచ్చోద్యమం - @2317^*.

        ఈ శుక్రవారం – 2021 వ సంవత్సరాంతపు వేకువలో - చలిగాలులు మనుషుల సహనాన్ని పరీక్షిస్తున్న 4.19 సమయంలో - ఇరుగో 17 మంది కార్యకర్తల వీధి పారిశుద్ధ్య సంసిద్ధత! అదే బైపాస్ మార్గంలో! కొన్ని క్షణాల్లో వచ్చి - ఇంకా 15 మంది - అంటే మొత్తం - 32 మంది - అడపా, యడ్ల వంశస్తులు కాక మరో ఇద్దరు స్థానిక మహిళలు కూడ – 2 గంటల పాటు సాగించిన సమరంతో - సాధించిన పారిశుద్ధ్య ప్రగతేమంటే - వంకరటింకరగా - ఇరుకుగా ఉన్న యడ్లవారి వీధి మరో మారు స్వచ్ఛ - సుందరమైపోవడం!

        ఐదారుగురు గ్రామ సుందరోద్యమ వీరుల ప్రధాన వీధి సుందరీకరణం దీనికదనం! రహదారి వనాల నవీకరణం, రోడ్డు మార్జిన్ల ఎగుడుదిగుళ్లను చదును చేయడం, ఆ దారిలో ప్రయాణికుల చూపుల్ని ఈ సుందరీకృత ప్రదేశం వంకకు త్రిప్పేయడం అందులో భాగం!

        ఈ 20 మందికి పైగా కార్యకర్తల పెనుగులాటతో – యడ్ల వారి వీధి – అరకిలోమీటరు మొత్తం మురికి వదిలిపోయి, మార్జిన్ల పిచ్చి - ముళ్ల మొక్కలు తొలగిపోయి, ఇసుక – దుమ్ము - ఆకులలములు అదృశ్యమై, చివరకు 6.00 కు ముందే ఈ వ్యర్ధాల గుట్టలన్నీ ట్రాక్టర్లో కొలువు దీరి, డంపింగ్ కేంద్రానికి పయనించాయి! బైపాస్ - బందరు రహదార్ల నడుమ స్వచ్ఛ - శుభ్రతా సాధకులకు జేజేలు!

        నాకు ప్రతి రోజూ ఒక రకమైన దిగులు కల్గించే ఆలోచనేమంటే:

ఈ స్వచ్ఛ కార్యకర్తలే కనుక 2317^* దినాలుగా - 3 లక్షలకు పైగా పని గంటలుగా –  ఊరి వీధుల కాలుష్యం మీద తిరుగుబాటు చేయకుంటే - రహదార్ల సుందరీకరణం పట్టించుకోకుంటే - బహిరంగ ప్రదేశాల, శ్మశానాలు, కొన్ని కార్యాలయాలు, దేవాలయాల కశ్మలాల మీద విప్లవించకపోయుంటే – ఇప్పుడందరూ మెచ్చుకొంటున్న చల్లపల్లి గతి ఏమిటీ అని! స్వచ్చోద్యమ కారులు గనుక ఒక నెల పాటు సమ్మె చేస్తే – ఇంత స్వచ్ఛ – సుందర గ్రామం ఎలా మరి పోతుందో అని!

        ఇలాంటి వన్నీ లేనిపోని పిచ్చి సందేహాలే కావచ్చు –  ఎందుకంటే - గ్రామ స్వచ్ఛ -సుందరోద్యమ దీక్ష నరనరానా జీర్ణించుకొన్న –  దాన్నొక (మంచి) వ్యసనంగా మలచుకొన్న స్వచ్ఛ కార్యకర్తలు ఇంకొక దశాబ్దమైనా దాన్నుండి బైటపడలేరని నా నమ్మకం - అప్పటికి ఈ స్వచ్ఛ – శుభ్ర - సుందరోద్యమ వ్యసనం ఊళ్ళో ఇంకెంత మందికో - తరువాతి తరానికో అంటుకోవచ్చు!

        నేటి స్వచ్చంద యడ్ల వీధి పారిశుద్ధ్య శ్రమ వేడుక 6.25 కు ముగిసి - 10 నిముషాల కాఫీ – కబుర్ల పిదప - ఈ సంవత్సరాంతపు త్రివిధ స్వచ్ఛ – శుభ్ర – సౌందర్య సమగ్ర గ్రామ నినాదాలిచ్చిందీ - కొత్త సంవత్సర తిధి - వార - కాలమాన పట్టికల్ని కార్యకర్తలకు పంచిందీ - కొన్నాళ్ల ఎడంతో వచ్చిన వేముల శ్రీనివాస్.

        వరసక్రమం ప్రకారం మనం క్రొత్త సంవత్సర శ్రమదాన వేడుక జరుపుకోదగిన రేపటి చోటు - షాబుల్ బజారు తిన్నగా బైపాస్ మార్గమే!

            స్వచ్చోద్యమ సాఫల్యం

అసమంజస చర్చలేని - అహంకార మచ్చరాని

కుల మతాల గొడవెరగని గొప్ప ఉద్యమం ఇదే!

రాజకీయరచ్చెరుగని – శ్రమదాన పథం ఆగని

స్వచ్చోద్యమ సాఫల్యత సంభవించు గ్రామమిదే! -

- నల్లూరి రామారావు

   స్వచ్ఛ సుందర చల్లపల్లి కార్యకర్త,

  ‘మనకోసం మనం’ ట్రస్టు బాధ్యుడు

  31.12.2021.