ఒక్కసారికి మాత్రమే పనికొచ్చే ప్లాస్టిక్ వస్తువులను ఎందుకు వాడాలి?

ఎనిమిదేళ్ళవుతున్నా ‘తగ్గేదేలే’ అంటున్న గ్రామ స్వచ్ఛ ఉద్యమం - @2318^*

          శనివారం నాటి ఆంగ్ల నూతన సంవత్సరాదిన కూడా సాగర్ టాకీస్ దగ్గర, వీధి మలుపులో – చల్లపల్లి స్వచ్ఛ సుందర ప్రయత్నం కధ పాతదే! మంచు, చలిగాలి యదాతధమే! 4.20 కి, దైనందిన వీధి పారిశుద్ధ్యాన్ని ప్రారంభించేందుకు ఠంచనుగా వచ్చిన ఈ 43 మంది బాధ్యులు కాక - ఆలయాల దగ్గరి భక్త జనులు కాక - ఏ కొద్ది మందో అనివార్యంగా మేల్కొనడమే గాని, పాత ఏటిని మూలకు త్రోసి, క్రొత్త ఆశల ఏడాదిని కావలించుకొని - (కొందరైతే గానాబజానాల్లో మునకలేసి) - అలసిసొలసి, చాలా మంది ఏడెనిమిదింటికి గాని మేల్కొనరాయే! 

          ఇక అప్పుడు లేచిన అదృష్టవంతులు కాస్త పరిశీలించి చూస్తే ఏం కనిపిస్తుంది? తమ ఊళ్లో కనీసం 2 వీధులు నిన్నటికన్న భిన్నంగా – మెరుగ్గా మారిన దృశ్యమే కదా?

          ఏడేనిమిదేళ్ళ క్రితం వలె కాక ఎక్కువ మంది గ్రామస్తులు ఇప్పుడు – ఈ మైకు పాటల చప్పుళ్ళని – కార్యకర్తల పలుగుల, పారల, కత్తుల, చీపుళ్ళ, రైల్వే పారల, గోకుడు పారల మ్రోతల్నీ – పని హుషారులో కొందరి ఉద్వేగభరిత, ఉద్రేకనియత కంఠస్వరాలని సహిస్తున్నారు, భరిస్తున్నారు, కొంత మేరకు హర్షిస్తున్నారు. సదాలోచనాపరులైన నా చల్లపల్లి గ్రామ సోదరులు పబ్ ల వినోద సంస్కృతిని కాక – మద్యపాన వికృత సంస్కృతిని కాక – రహదారి మార్జిన్ల కబ్జా దుష్క్రతిని కాక, తమ ఊళ్లో తమకోసమే ఎనిమిదేళ్లుగా రెక్క విప్పుతున్న – విజ్ఞాన, వినోద ఆరోగ్యాలే ధ్యేయంగా మొగ్గ తొడుగుతున్న ఒక వినూత్న స్వచ్చంద శ్రమదాన సంస్కృతికే ఓటేస్తారని నా సంపూర్ణ విశ్వాసం –

          నా నమ్మకానికి ఆధారం – ఇదిగో 2022 వ ఏటి తొలి వేకువనే 43 మంది గ్రామ వీధుల పారిశుద్ధ్య ప్రక్రియ. పాత కార్యకర్తలు 35 మందే కాక షాబుల్ వీధి, ఇరుగు పొరుగు వీధులకు చెందిన 10 మంది కొత్త వాళ్ల ప్రమేయం! వీళ్ళంతా ఏదో మొహమాటంతో కాక – ఇదేదో గ్రామ సేవ అనుకోక – ‘ఇది కేవలం తమ కనీస సామాజిక బాధ్యత’ అనే స్పృహతో రెండు గంటల పాటు పరుల కోసం శ్రమించడమే ఈ రాష్ట్రంలోని -  దేశంలోని వేలాది, లక్షలాది గ్రామాల నుండి చల్లపల్లిని వేరుచేసి చూపుతున్నది!

          కొంగ్రొత్త సంవత్సరం తొలి ఉషోదయాన ఈ 40 మందికి పైగా స్వచ్చ సంస్కృతి ప్రదాతలు సినిమా హాలు సమీపాన ఏం సాధించారని ప్రశ్నిస్తే – ‘30 వేల మంది నివసించే ఊళ్లో – 120 వీధులలో కనీసంగా రెండు వీధుల్లోనైనా వీళ్ళు చేయనిది ఏ పని?’  అనే ప్రశ్నే దానికి సమాధానం.

          6.40 సమయంలో మైకు సాక్షిగా గోళ్ళ వెంకటరత్నం ఉద్వేగంగా కనీసం ముమ్మార్లు గ్రామ స్వచ్చ – శుభ్ర – సౌందర్య ఉద్యమ నినాదాల్ని వినిపించడం కాక ఎవరు పంచుతున్నారో – ఎవరు స్వీకరిస్తున్నారో తెలియనంతగా ఐదారుగురు – ప్రాతూరి శాస్త్రి గారి రవ్వ లడ్లు, పల్నాటి వారి కిస్ మిస్ లడ్లు, మారుతి గారి చిట్టి లడ్లు, గంధం వారి నేతి బొబ్బట్లు, ధ్యాన మండలి తరపున తినుబండారపు ప్యాకెట్లు – ఇవి గాక కాఫీ, టీ ల సత్కారాలు, తోట డ్రైవరు గారి పలహారాలు వగైరాలన్నీ చల్లపల్లి స్వచ్చోద్యమ వేడుక విశేషాలే. ఇక అప్పుడు  గానీ వేకువ 4 గంటలకే మేల్కొన్న స్వచ్ఛ కార్యకర్తలు 7 గంటలకి ఇళ్లకు చేరుకొని ఉంటారు.

          ఘంటా లీలాకృష్ణయ్య గారి 705/-  విరాళం నేటి మరొక విశేషం. కంఠంనేని జ్యోత్స్నాదేవి,  పాలడగు రత్న కుమార్ల 12,000/-, ఇంకా శోభారాణి – పిచ్చియ్య గార్ల 10,000/- బ్యాంకు చెక్కు విరాళాలు కూడా మన స్వచ్చోద్యమానికి అంకితమైనవి. మన ఊరి కోసం ఇలాంటి ఆర్ధిక – సమయ – శ్రమదానాల రుచి మిగిలిన చల్లపల్లి గ్రామ సహోదరులకు సైతం తెలిసి రాగలదని విశ్వసిద్దాం!

          ఆదివారం వేకువ శ్రమ సంస్కృతీ పరివ్యాప్తి కోసం ఇదే బైపాస్ మార్గంలో పాత శిధిల ప్రభుత్వాసుపత్రీ వద్దనే మన పునర్దర్శనం.

          ఈ ఉద్యమ సంరంభం

ఇది కొందరి ఉద్వేగమొ - ఏ ఒక్కరి ఆవేశమొ -

మహారంభ శూరత్వమొ మరొకటో కాదు సుమా!

చల్లపల్లి స్వచ్చోద్యమ ప్రస్థానం నిబద్ధితం -

నిమంత్రితం - నియంత్రితం - నిరంతరం - తరంతరం!

- నల్లూరి రామారావు

   స్వచ్ఛ సుందర చల్లపల్లి కార్యకర్త,

  ‘మనకోసం మనం’ ట్రస్టు బాధ్యుడు

  01.01.2022.