ఒక్కసారికి మాత్రమే పనికొచ్చే ప్లాస్టిక్ వస్తువులను ఎందుకు వాడాలి?

గ్రామ పారిశుద్ధ్య ప్రగతిలో 2321^* వ నాడు.

        (4-1-22) మంగళవారం వేకువ 4.30 కే గ్రామ స్వచ్చోద్యమ కారుల రంగ ప్రవేశం. ఐదుగురేమో “రెస్కూదళం” అనే ముద్రపడిపోయిన కార్యకర్తలు. ఇద్దరు మాత్రం స్థానిక ఉప్పల వారి వీధి గృహస్తులు. వీరు కాక ఇంకో సీనియర్ కార్యకర్త. ఇదంతా మళ్లీ ఉప్పల వారి వీధిలోనే!

        అ ఇరుకు వీధి చిన్నదే గాని, గ్రామ రక్షక దళానికి నాలుగైదు నాళ్లుగా బాగా ఉపయోగపడింది – మురుగు మట్టి, ఇసుక - దుమ్ము, రాళ్లు రప్పలు ట్రక్కుల కొద్దీ అప్పజెప్పింది. ఆవిధంగా సదరు రోడ్డూ మెరుగు పడింది, ఇతర వీధుల పల్లాలకూ పనికొచ్చింది!

        ఈ వేకువ అలా పల్లాలు పూడినది భారత లక్ష్మి రైస్ మిల్‌ బజారులో, దివంగత వా.కో. ఉద్యానవనం దగ్గరి పల్లం ఇప్పుడు సమతలంగా మారింది. అటుగా రాకపోకలు చేసే ద్వి - చతుశ్చక్ర వాహనాలకు సౌకర్యం, సౌలభ్యం, ఆహ్లాదం సమకూరింది.

        మరి ఇదంతా ఎవరి చలవ? సౌకర్యాల - ఆహ్లాదాల హక్కుదారులు గ్రామంలోని వందల మంది; వేకువ సమయాన శ్రమించిన స్వచ్ఛ – శుభ్ర - సౌందర్య సృష్టికర్తలేమో ఐదారుగురు కార్యకర్తలు!

        6.45 సమయంలో ఈ ఉభయ వీధుల మెరుగుదలను సంతృప్తికరంగా ముగించాక   తూములూరి లక్ష్మణరావు మూడు మార్లు స్వచ్చోద్యమ లక్షాలైన స్వచ్చ - శుభ్ర – సౌందర్య సంపాదనా కాంక్షను నినదించి, నేటి తమ గ్రామ బాధ్యతను ముగించారు.

        రేపటి - (5-1-22) వేకువ మన పునర్దర్శన వీధి- సాగర్ టాకీస్ మార్గంలోని సంత - రైతు బజార్లే!

        స్వచ్చోద్యమకారులే

ఉవ్వెత్తున లేచి సాగు ఉద్యమమిది ఎవరి కొరకు?

నిస్వార్థ - క్రమబద్ధ - శ్రమదాతలు ఎచట - ఎవరు?

సంఘం - బుద్ధం - ధర్మం శరణు జొచ్చు ధన్యులెవరు?

శ్రమ పతాక – శ్రమ వికాస సజ్జను లెచ్చోట గలరు?

- నల్లూరి రామారావు

   స్వచ్ఛ సుందర చల్లపల్లి కార్యకర్త,

  ‘మనకోసం మనం’ ట్రస్టు బాధ్యుడు

   04.01.2022.