ఒక్క వాడకానికే పరిమితమైన ప్లాస్టిక్ సామానులు ఎవరైనా ఎందుకు వాడాలి?

గ్రామ స్వచ్చోద్యమంలో ఇది 2370* వ రోజు.

          శనివారం సైతం వేకువ చీకట్లో - వాతావరణం కొంత మారి, చలి పెరిగిన సందర్భంలో - 5-3-22 వ నాడు శివరామపురం రోడ్డులో – విజయా/ వివేకానంద కళాశాలల సమీపంలో - 4.16 నుండి 6.24 దాక అన్ని రకాల వీధి మెరుగుదల కోసం శ్రమించిన వారు పాతిక మంది!

          కొద్ది రోజుల ముందు ఈ రోడ్డుకు అదృష్టం పట్టి, గుంటలు తగ్గి కొంత బాగుపడిన మాట నిజమే గాని - ఈ 100 - 110 గజాల రహదారిలో - ఇన్ని కళాశాలల -  కళ్యాణ మండపాల - దుకాణ సముదాయాల - నివాస గృహాల - బడ్డీ కొట్ల - ప్రదేశంలో కొంత రోజు వారీ కాలుష్యం పుట్టుకోచ్చే మాట నిజమే గాని – మరీ ఇంత భీభత్సమా? 100 గజాల్లోనే కార్యకర్తలు 50 గంటలు శ్రమించవలసినంతగా, పెద్ద ట్రక్కు నిండిపోయేంతగా, కొసరుగా రెండు పెద్ద సంచుల ప్లాస్టిక్ వస్తువులూ, 11 డిప్పల మద్యం గాజు సీసాలూ పొగుబడడమా?

          స్వచ్ఛ కార్యకర్తల తెగువ సంగతికేం గాని – వాళ్లెలాగూ మురుగ్గుంటల, రోడ్లు గుంటల రహదార్ల అందాన్ని దెబ్బతీసే ఖాళీ స్తలాల బాగు చేతకూ, పచ్చదానాల - పూల సొగసుల – స్వచ్ఛ శుభ్రతల కల్పనలకూ ఎన్నడో అంకితమైపోయారనుకోండి! మరి వివిధ సంస్థల యాజమాన్యాల, వ్యాపారుల, స్థానిక గృహస్తుల, విద్యార్థుల బాధ్యత సంగతేమి? సామాజిక స్పృహ స్థాయి ఏమి?

          గ్రామ జనాభాలో 1 శాతంలో సగం కూడ లేని ఈ స్వచ్ఛ సైనికులు దశాబ్దాల తరబడీ గ్రామ సౌకర్యాల కోసం పాటుబడుతూనే ఉండాలా? తద్భిన్నంగా హక్కులు తప్ప ఏ బాధ్యతా పట్టని కొందరు గ్రామస్తుల వైఖరి కొనసాగుతూనే పోవాలా? కార్యకర్తలు గనుక తమ రోజు వారీ శ్రమదానంలో సరైన పరమార్థాన్నీ, సంతృప్తినీ పొందకపోతే - అయిష్టంగానూ, నటనగానూ తమ శ్రమదానాన్ని నిర్వహిస్తుంటే – ఇన్ని వేల రోజులు కాదు, ఒక నెల రోజులైనా చల్లపల్లి స్వచ్ఛ – సుందరోద్యమం నిలబడేదే కాదు!

నేటి ఉదయం సైతం పాతిక మంది కార్యకర్తల తడాఖాతో:

- సుమారు 30 గజాల మురుగు కాల్వ బాగుపడింది;

- ఆ కాల్వగట్ల ఎండు బురద మట్టి రోడ్డు అంచుల గుంటల్లోకి చేరి బాట మరి కొంత సౌకర్యవంతమయింది;

- 10 మంది శ్రమత్యాగంతో రోడ్డుకు తూర్పు ఖాళీ స్తలం కొంతమేర రకరకాల దరిద్రాలను కోల్పోయి, కాస్త శుభ్ర - సుందరంగా కనిపిస్తున్నది,

- కనీసం రేపటికైనా - 12 రోజుల శ్రమతోనైనా – బండ్రీవుకోడు వంతెన దాక 1 ½ కిలోమీటర్ల రోడ్డు తీరుగా - మెరుగ్గా రూపొందుతుందని నమ్మకమొచ్చింది;

- ఐతే, వేకువ శ్రమదానంలో స్థానికులు తగినంతగా భాగస్వాములౌతారనే భరోసానే ఇంకా రావలసి ఉంది!

          6.40 కాఫీల వేళ పశువైద్యులు గోపాలకృష్ణుల వారి 2000/- విరాళం ట్రస్టుకు అందింది. దానికి ముందు గంధం వారి - దాసరి వారి గ్రామ స్వచ్ఛ – శుభ్ర –సౌందర్య ప్రతిపాదక నినాదాలు ముమ్మారు విన్పించాయి.

          రేపటి వేకువ శ్రమదాన ప్రయత్నం కూడ మనం ఇదే పెదకళ్లేపల్లి రహదారిలోని వివేకానంద డిగ్రీ కాలేజి దగ్గర కలిసి చేయవలెనని నిశ్చయించబడింది!

     సమర్పిస్తున్నాం ప్రణామం – 70

రెండు వేలదినాలె ఏమిటి! ముప్పై ఏళ్లకు పైగా

ప్రజా సైన్సు ప్రగతి కొరకు - వైజ్ఞానిక సుగతి కొరకు

స్వచ్చోద్యమ నిరతి కొరకు - సాహసించి గెలుపొందిన

మార్గదర్శకుల కిదిగో మనః పూర్వక ప్రణామం!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   05.03.2022.