ఒక్క వాడకానికే పరిమితమైన ప్లాస్టిక్ సామానులు ఎవరైనా ఎందుకు వాడాలి?
2371* వ నాటి గ్రామ సామాజిక బాధ్యతా పరిపూర్తి.
ఈ వేకువ గ్రామ ముఖ్య రహదారి పారిశుద్ధ్య కృషి 31 మందిది. 2 గంటలకు పైగాను, మొత్తం మీద 55 - 60 పని గంటలు గాను - ఒక నిబద్ధతగాను, ఏ హైదరాబాదీయులో ఐతే నమ్మజాలని వాస్తవంగాను కొనసాగిన శ్రమదానం వల్ల –
1) వివేకానంద కాలిజ్,
2) విజయ కళాశాల,
3) కల్యాణ మండపం రోడ్డు సమీపాన,
4) మాంస విక్రయశాల దగ్గర చెప్పుకోదగినంత వీధి శుభ్రత సాధ్యపడింది.
బైట సమాజంలో ఐతే కుల/ మత/ ప్రాంత విభేదాలుంటాయి గాని, చల్లపల్లి స్వచ్చోద్యమానిది ఒకే కులం - అది గ్రామ ఉమ్మడి శ్రేయో నిబద్ధం! ఈ 30 మందికీ “అన్న - అక్క - బావ - తమ్ముడు - బాబాయ్...” వంటి ఐడెంటిటీలే ఎక్కువగా ఉంటాయి తప్ప, “ఊరు - వార్డు – అంతస్తు - సామాజిక వర్గ...” గుర్తింపులుండవు. గ్రామ సౌఖ్య - స్వస్తతా లక్ష్యాలు తప్ప వైయక్తిక స్వార్థచింతనల కంపు, రాజకీయ కశ్మలాలు, అహంకార ప్రకోపాలు కనిపించవు! నిజానికి ఏడెనిమిదేళ్లుగా ఇదొక భిన్న ప్రపంచం!
మొత్తం చల్లపల్లి గ్రామమూ, నియోజక వర్గమూ, రాష్ట్రమూ కూడ ఇలా శాశ్వత ప్రాతిపదికన మారిపోతే – రాష్ట్రంలో, దేశంలో ప్రతిరోజూ ఇలా అందరి శ్రమదానమూ చోటు చేసుకొంటే - ఫిన్లాండ్, న్యూజిలాండ్, స్వీడన్లలాగా మనరాష్ట్రం, దేశం మారిపోతే.... ఆహా! ఇదొక సుమధుర స్వప్నం! (కలలు కనండహో! అబ్దుల్ కలాం గారు చెప్పారు మరి!)
ఏడెనిమిదేళ్ళుగా చల్లపల్లి కార్యకర్తలు కలలు కనడమే గాదు – ఆ కలల సాక్షాత్కారం కోసం శక్తీ కొద్దీ పాటుబడుతూనే ఉన్నారు! ఈ జాడ్యం 30 - 40 ఊళ్లకు ఇప్పటికే అంటించారు కూడ! అట్టి కలల సంపన్నులైన 30 మంది కళ్ళేపల్లి రోడ్డులో చేసిన ఈ నాటి నిర్వాక మేమనగా :
- ఒక జూనియర్ కళాశాల ఎదుట – వచ్చే, పోయే వారు ఆగి చూసేంతగా శుభ్రపరిచారు (కళ్ళాపి మాత్రం చల్లలేదు!)
- కళ్యాణ మండపం దారి ప్రక్క భారీ వాహనాల భారానికి పడిన లోతైన గుంటల్లోని ప్లాస్టిక్ సంచులు, ఇతర తుక్కు తొలగించారు – తాతా, మనవళ్ళు ఈ పని లో నిమగ్నమైన ఒక ఛాయా చిత్రాన్ని గమనించండి!
- ఒక పెద్ద నివేశన స్తలం ప్రక్క డ్రైనునూ, గట్లను శుద్ధి చేయడానికే 12 మంది కార్యకర్తల శ్రమ ఖర్చైపోయింది.
- చీపుళ్ళతో 100 గజాల రోడ్డును ఊడ్చే పని, రెండు రకాల మద్యం సీసాల్ని, కప్పుల్ని పోగేసే పని, యదావిధిగా జరిగిపోయాయి!
- చెత్త లోడింగు, డైన్ల తుక్కు తొలగింపూ - అన్నీ అనుకొన్నట్లే నెరవేరాయి!
ఆదివారం వస్తే ఆలస్యంగా నిద్రలేవడం చాల మంది చేసే పని. స్వచ్చ కార్యకర్తల సంస్కృతే వేరు కదా - ఆరోజు మరింత మంది, మరికాస్త ఎక్కువ శ్రమదానం చేయడం వాళ్ల అలవాటు!
కాఫీలకదనంగా – శాస్త్రి గారి పనే కాబోలు - చిరు తిండి కూడ సమకూరింది. ఫిబ్రవరి మాసపు స్వచ్చ కార్యక్రమ ఆయ – వ్యయాల పట్టిక కూడా సమర్పించబడింది! ఈ వీధికి చెందిన కార్యకర్త - గోళ్ల వేంకటరత్నం ప్రవచిత గ్రామ త్రివిధ నినాదాలు విస్పష్టంగా ఉన్నాయి.
బుధవారం వేకువ శ్రమించదగిన ప్రదేశం కూడ ఈ పెదకళ్ళేపల్లి మార్గమే! అందుకు మనం కలుసుకోదగిన చోటు – బండ్రేవు కోడు కాల్వ దగ్గరి చంద్ర హాస్పిటలే!
సమర్పిస్తున్నాం ప్రణామం – 72
“నాలుగున్నర వేకువందున సాధ్యమా శ్రమదాన ఉద్ధృతి?
రెండువేల – నాల్గు వందల దీర్ఘకాలం సేవలెట్లని.....”
లోకులెల్ల అవాక్కులయ్యే శ్రీకరంబగు సంప్రదాయం
పాదుకొల్పిన స్వచ్చ - సుందరపాదులకె నా తొలి ప్రణామం!
- నల్లూరి రామారావు,
స్వచ్ఛ సుందర చల్లపల్లి కార్యకర్త,
‘మనకోసం మనం’ ట్రస్టు బాధ్యుడు
06.03.2022.