ఒక్క వాడకానికే పరిమితమైన ప్లాస్టిక్ సామానులు ఎవరైనా ఎందుకు వాడాలి?

అవలీలగా 2374^* రోజులకు స్వచ్ఛ కార్యకర్తల శ్రమదానం.

        బుధవారం మార్చి నెల 9వ దివసం! మళ్లీ వేకువ 4.13 కే డజను మంది కార్యకర్తల వీధి పారిశుద్ధ్య పనులు మొదలు! క్రమంగా మరో 17 మంది - వెరసి 29 మంది క్రమబద్ధ ప్రయత్నంలో –

1) బండ్రేవుకోడు మురుగు కాల్వ దక్షిణపు గట్టు

2) చంద్ర హాస్పిటల్‌ పరిసరాలు

3) వంతెన వగైరాల దుమ్ము వదలి, తుక్కు తొలగి, నీచ నికృష్ట ప్లాస్టిక్ సారా సీసాల బెడదపోయి, మరొక 100 గజాల వీధి స్వచ్చ - సుందరంగా మారింది.

        అదేంటో గాని - ఈ పెద్ద డాక్టర్లకు, విశ్రాంత ఉద్యోగులకు, గృహిణులకు, రైతులకు తమ పేర్ల ప్రక్క డిగ్రీల హోదాల ఐడింటిటీలకన్న “స్వచ్ఛ చల్లపల్లి కార్యకర్త” అనే హోదా తగిలించుకోవడమే ఇష్టం! చరిత్రకు, సంప్రదాయాలకు భిన్నంగా ఇలాంటి అభీష్టాలు ఏ ఊళ్ళోనైనా చూశామా? తదేక నిబద్ధతగా, వ్యసనంగా, అనన్య సామాన్యంగా 2374^* రోజులుగా తమ గ్రామ స్వస్తతా సంక్షేమం కోసం శ్రమించడం విన్నామా?

        ఏ దేశం - ఏ ఊరు - ఏ ఇంట్లో నైనా భిన్న దృక్పథాలుంటాయి గాని, ఈ ఒక్క ప్రత్యేకత మాత్రం చల్లపల్లికే సొంతం! వాన - వరదలొస్తే, ఎండలు తుక్కు లేపితే, మంచులు ముంచితే, కరోనా గడగడలాడిస్తే కూడ వెనకడుగేయని అచంచల - ఆవశ్యక, ఆదర్శ శ్రమదానానికి అభివందనలు! ఈ శ్రమదానం వెలుగులో

1) స్వచ్చ - పరిశుభ్ర - స్వస్త -  సుందర చల్లపల్లే కావాలో

2) వీధి ఆక్రమణల - ప్లాస్టిక్ తుక్కుల - అస్తవ్యస్త - కంపుల చల్లపల్లే మంచిదో తేల్చుకోవలసింది మాత్రం 26 - 27 వేల మంది గ్రామస్తులే!

        నేటి శ్రమత్యాగంతో 2 గంటలకు పైగా వీధి కశ్మలాల మీద కార్యకర్తల పోరు వల్ల వచ్చిన ఫలితం స్థూలంగా:

- నూనె మర ఉత్తరంగా, వంతెన దగ్గరగా - కాళ్లు జారిపోతున్న ఏటవాలులో 12 మంది కత్తులు, దంతెలతో మొండి పిచ్చి - ముళ్ల - చెట్లనూ, తీగల్ని నరికి, లాగి, పోగుల్ని ట్రాక్టర్ లోకి ఎక్కించడం (ఇదేమీ తొలి మారు కాదు - ఏడో, ఎనిమిదో పర్యాయం!);

- బెత్తెడు మందాన మురుగు కాల్వ వంతెన మీద పేరుకొన్న దుమ్ము - ధూళి, ప్లాస్టిక్ తుక్కులు, పేడల్ని ఐదారుగురు శుభ్రపరచడం (ఇంత నికృష్టపు కాలుష్యం మధ్యనే కొందరు వంతెన గోడల మీద సాయంత్రాలు ఎలా కూర్చొంటారో!)

- రోడ్డుకు పడమర ఖాళీ భాగాన్ని మరికొందరు మెరుగు పరచడం - 2 డిప్పల ఖాళీ గాజు సీసాలు, గోనె సంచెడు ప్లాస్టిక్ బుడ్లు, కప్పులు, గ్లాసులు, ప్లేటులు - వాటిని వంగి ఏరిన ఇద్దరు ముదుసలులు!

- ఇక్కడికి దూరంగా - మాంసం అంగడి ఎదురుగా రోడ్డు మార్జిన్ గుంటల్ని ముగ్గురు సుందరీకర్తలు సమపరచి, చెమటలు చిందించడం;

        ఇలా వివరిస్తూ పోతే ఇది అనంతం!

6.40 వేళ జరిగిన 3 విశేషాలు:

1) గూడునొప్పెడుతున్నా సరే - ఊరి ఉషోదయ బాధ్యతలు వదలని - నినాదాలకంతగా ఇష్టపడని పసుపులేటి సత్యం ప్రకటించిన త్రివిధ స్వచ్చ - శుభ్ర - సౌందర్య నినాదాలు;

2) కోడూరు వేంకటేశ్వరుని నెలవారీ 520/-  విరాళం,

3) ఈ సాయత్రం 6 గం.లకు గంగులవారిపాలెం బాటలోని “గస్తీ గది” అనబడే ‘చుట్టు గూడు’ ప్రారంభానికి ఆహ్వానం.

        రేపటి శ్రమదాన బాధ్యత కోసం మనం కలువదగిన చోటు బస్టాండు దగ్గరి మురుగు కాల్వ వంతెనే!

        సమర్పిస్తున్నాం ప్రణామం – 75

ఇదేం లోకమొ! యుగయుగాలుగ చెడుకు మంచికి నిత్య ఘర్షణ

మంచి ముసుగున చెడే నడచుట! వంచనల సయ్యాట లిచ్చట!

కశ్మలాల నధఃకరిస్తూ - కల్మషాలను తరిమి కొడుతూ

మీరు సాగిస్తున్న క్రతువుకు మేము చేస్తున్నాం ప్రణామం!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   09.03.2022.