ఒక్కసారికి మాత్రమే వాడే ప్లాస్టిక్ వస్తువులు మనకెందుకు ?

స్వచ్చ సుందర ధారావాహికలో ఆదివారం - @2399*వ ఎపిసోడ్.

03.04.2022 వ వేకువ కార్యకర్తల శ్రమదాన సమయం 4.20 నుండి 6.00 దాక!

100 నిముషాల కాలం-24 మంది జమిలి కృషి- ఇంత పెద్ద ఊరి కున్న ఒకే ఒక ఆహ్లాదకర NTR పార్కులో!

సామాజిక చరిత్ర విశ్లేషకులు ఇందరి మూకుమ్మడి శ్రమ సందేశాన్ని ఏమని తీర్పు చెపుతారో గాని, ఒక సినీ కవి మాత్రం:

           “పది మందిలో పాట పాడినా, అది అంకిత మెవరో ఒకరికే

           విరి తోటలో పూవులెన్ని పూచినా, గుడికి చేరేదీ నూటికి ఒకటే....”

అని వ్రాసిన సందర్భం వేరు, అదేదో నాయికా – నాయకుల నడుమ ఒక కృత్రిమ సన్నివేశం!

     దానికి భిన్నంగా – సగటున ప్రతి వేకువ 30-40 మంది స్వచ్చ కార్యకర్తలు 2400 దినాలుగా – అందరి ఉమ్మడి లక్ష్యం తమ గ్రామ శుభ్ర-సౌందర్యాలుగా-పాతిక ముప్ఫై వేల మంది గ్రామ సహోదరుల ఆహ్లాద, స్వస్తతల సాధనగా-ఒకానొక శ్రమ జీవన వేదంగా- నూతన సంస్కృతీ ప్రవర్తకంగా నడుస్తున్న ఉద్యమం వేరు!

          మానవ శ్రమ శక్తి వనరులు, కష్టించే తత్త్వం పుష్కలంగా ఉన్న మన దేశంలో కూడ మెదడున్న సృజనాత్మక శ్రమ శక్తి ని మూలన పడేసి, యాంత్రిక శక్తినే  వాడుకోవడం చూస్తున్నాం. ఈ స్వచ్చంద శ్రమ దాతలు మాత్రం చాదస్తుల్లాగా యాంత్రిక శక్తికి బదులుగా ఒళ్లు హూనమయ్యేట్లుగా – పార, పలుగు, చీపురు, గొడ్డలి, గోకుడు పని ముట్లతోనే చెమటలు క్రక్కుతూ పని చేస్తారు – స్వార్థ పరంగా కాదు, గ్రామ సమాజ పరంగానే.

          ఐతే వీళ్ళంతా కేవలం చాదస్తులో లేక అభ్యుదయకర నవీన సంస్కృతీ ప్రారంభకులో కాలమే-భవిష్యత్ సమాజమే నిర్ణయించాలి! దేశ వ్యాప్త గుర్తింపు కోసం తాపత్రయమనో, మీడియాలో ప్రచారపు పిచ్చి అనో, వేల దినాల- లక్షలాది పని గంటల వ్యసనమనో ఇప్పటికిప్పుడు తేల్చేయడానికి మనమెవ్వరం?

          ఇప్పటికి మాత్రం ఈ చల్లపల్లి స్వచ్చోద్యమం దేశంలో మరెక్కడా చోటు చేసుకోని, 30/40 గ్రామాల్లో కాస్త ముందు చూపున్న వారు అనుసరిస్తున్న- అనుకరిస్తున్న ఒకానొక స్వచ్చంద సాముహిక శ్రమదానం – అంతే!

          “నేటికి మూడు వేకువలుగా పార్కులో ఇందరు కార్యకర్తలెందుకు శ్రమిస్తున్నారు? గృహిణులు, వృద్ధులు తమ శారీరక మానసిక శ్రమశక్తిని  ధారపోసే అవసరమేమిటి “ అంటే – ఈ రెండు – మూడు సాయంత్రాల్లో NTR పార్కులో అరుదైన జానపద కళా ప్రదర్శనలు, నాలుగైదు గంటల పాటు వాటిని ఆస్వాదించవస్తున్న వందలాది క్రిక్కిరిసిన ప్రేక్షకులు! అందరు ప్రోగైన పార్కులో పుట్టుకొచ్చే కాలుష్యాలు తొలగించే బాధ్యతో, అదృష్టమో ఈ స్వచ్చ కార్యకర్తలే దక్కించుకొంటున్నారు మరి!

          ఉన్నది 24 మందే గాని, ఎవరి క్రమ శిక్షణ వారిదే; లక్ష్యం మాత్రం ఏకోన్ముఖమే!  అది - “ ఇంత మంచి పార్కు మరింత శోభస్కరంగా –ఆహ్లాదకరంగా – ప్రయోజన కరంగా ఉండాలనే!”

          6.30 కు స్వచ్చ కార్యకర్తల త్రివిధ ఆశయాల్ని-గ్రామ స్వచ్చ-శుభ్ర-సౌందర్య సందేశాన్ని నినాదాలుగా ప్రకటించిన యువ కార్యకర్త రామానగరానికి చెందిన రాజు.

          బుధవారం వేకువ మనం మరొకమారు కలిసి శ్రమించవలసింది  సాగర్ టాకీస్ బైపాస్ మార్గంలోని సజ్జా ప్రసాదు గారి (అశోక్ నగర్ తొలి) వీధి దగ్గరే!

      సమర్పిస్తున్నాం ప్రణామం – 98

అన్ని గ్రామ పరిసరాలు కాలుష్యపు అన కొండలె!

రహదారులు-శ్మశానాలు క్రమ్ముకొన్న చెత్తలే!

అందుకు మినహాయింపే స్వచ్చోద్యమ చల్లపల్లి

ఆ సంఘటనకు కారకులందరికీ ప్రణామాలు!

    - నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

      03.04.2022.