ఒక్కసారి మాత్రమే వాడే ప్లాస్టిక్ వస్తువులను బహిష్కరిద్దాం.

అశోక్ నగర వీధుల్లో 2407^* వ నాటి స్వచ్చ పరిశ్రమ.

          బుధవారం - (13-4-22) వేకువ 4.19 & 6.05 నడుమ జరిగింది 25 మంది గ్రామ బాధ్యుల శ్రమదానం. ముందు అనుకొన్నదీ, ఆగిందీ బైపాస్ లోని భారత లక్ష్మి ధాన్యం మర దగ్గరే గాని, ప్రధానంగా శుభ్రపడింది మాత్రం - అశోక్ నగర్‌ ప్రథమ వీధే! సజ్జా ప్రసాదు గారి ఇంటికి ఉత్తర – దక్షిణ బాటతో బాటు పాక్షికంగా ఎదుటి స్థలం కూడ మెరుగయ్యింది! ఇద్దరు ముగ్గురు మాత్రం ఉండబట్ట లేక బైపాస్ వీధి 150 గజాలూ ఊడ్చేశారు!

          గ్రామ వీధుల కాలుష్యం పట్ల అసహన పరులూ, ముఖ్య వీధి శుభ్ర – సౌందర్యలాలసులూ ఉన్నచోట ఇలాగే జరుగుతుంది మరి! తుక్కు అడ్డుపడి కుంటి నడక నడుస్తున్న మురుగు కాల్వలూ, ఆకులలములూ, చెత్త, పిచ్చి – ముళ్ళ మొక్కలూ ఊరి ఆహ్లాదతకు భంగకరమైతే - తక్కిన గ్రామస్తుల్లాగా ఉపేక్షించ లేక - 2400 రోజుల పైగా శ్రమించే జగమొండి కార్యకర్తలుంటేనే ఇంత పెద్ద గ్రామం వేల కొద్దీ - లక్షల కొద్దీ ఊళ్లలో కెల్లా ఈ మాత్రం ప్రత్యేకంగా నిలుస్తున్నది.

          ఎక్కడ – ఏ నోట విన్నా - స్వచ్ఛంద శ్రమదానం గురించిన సంభాషణల్లో తొలుత చర్చకొచ్చేది స్వచ్ఛ – సుందర చల్లపల్లి ప్రత్యేకతే! అందుకు మూల కారకులైన - వందకు పైగా ఉన్న నిస్వార్థ శ్రామికుల నిబద్ధతే! పాల మీద మీగడ పైకి తేలినట్లు – చల్లపల్లి గ్రామ ఆధునిక చరిత్ర వ్రాస్తే గీస్తే - దాని ప్రపంచ వ్యాప్త గుర్తింపుకు ప్రథమ కారణం సహన శీలురైన - నిష్కామ కర్ములైన స్వచ్ఛ కార్యకర్తల సానుకూలతే!

          మంచి పదాలతో - కాస్త పక్షపాతంతో - నేనిలా కార్యకర్తల శ్రమ దాతృత్వాన్ని అదే పనిగా -  హేతురహితంగా - పొగుడుతున్నట్లు ఎవరికైనా అనుమానం వస్తే - ప్రతి వేకువా జరిగే గంటన్నర – 2 గంటల ప్రయత్నాన్ని ప్రత్యక్షంగా చూడవచ్చు! అశోక్ నగర్ తొలి వీధి దక్షిణపు చివర పాతిక – ముప్పై గజాల చిట్టడివిని, అందుమూలంగా కనిపించే అస్తవ్యస్తతని, అసౌకర్యాన్ని స్వచ్ఛ కార్యకర్తలెలా దారికి తెచ్చిందీ, సర్పంచి తో సహా మహిళలు వ్యర్ధాలను ట్రాక్టర్ లోకి నింపే దృశ్యాన్నీ చూస్తే నా వ్రాతల్లో అతిశయోక్తులు లేవని అంగీకరించాలి!

          గిన్నెస్ బుక్ కోసం ప్రదర్శనలైతే - ప్రసార మాధ్యమాల్లో గుర్తింపు దురదైతే - అవార్డుల, రివార్డుల ప్రయత్నాలైతే – మెరమెచ్చుల – బట్టలు నలగని పనులైతే... మూడున్నర లక్షల పనిగంటల శ్రమదానం ఏ ఊళ్ళో - ఎప్పుడైనా సాధ్యపడుతుందా? పాల పొంగై - నీటి బుడగై ఎప్పుడో తేలిపోయేది కదా!

          ఒక బలమైన తాత్త్విక పునాది, దూషణ – భూషణ – తిరస్కార - పురస్కారాల నధిగమించిన నిబద్ధత లేనిదే ఇంత సుదీర్ఘ – స్వచ్చంద – గ్రామ పౌర సామాజిక బాధ్యత ఎలా సంభవం?

          6.40 వేళ నేటి కృషి సింహావలోకనానికి ముందు చల్లపల్లి స్వచ్చ – పరిశుభ్ర - సౌందర్య సంకల్ప నినాదాలిచ్చినదొక మాలెంపాటి వృద్ధ సింహం! కార్యకర్తలందరికి ద్వారకా తిరుమల లడ్డు ప్రసాదమందించినది మరొక మాలెంపాటి రైతు సింహం! స్వచ్చోద్యమ పెద్దల నిర్ణయానుసారం కాక - ప్రజాస్వామ్యబద్ధంగా ఎన్నికైన రేపటి మన వేకువ శ్రమదాన ప్రాంతం మళ్ళీ అశోక్ నగర్ 2,3 వీధులే!

          గురువారం నాటి మన పునర్దర్శనం దివంగత వా.కో. గారి వీధి దగ్గరే!

        కమనీయ వినోదం

చల్లపల్లి విను వీధిన స్వచ్చోద్యమ పతాకం

ఆ రెపరెప లాద్యములై అఖిల రాష్ట్ర ఆకాశం

కాలుష్య విరహితమయ్యే కమనీయ వినోదం

సాక్షాత్కారం అగుటే స్వచ్ఛ సైన్య విజయం!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   13.04.2022.