ఒక్కసారి మాత్రమే వాడే ప్లాస్టిక్ వస్తువులను బహిష్కరిద్దాం!

   రెస్క్యూ టీం వాళ్ళది వరుస మొత్తం పని దినాల సంఖ్యగా  -2420 * వ రోజు

          గ్రామ భద్రతా దళం మరో మంగళ వారం వేకువ (26.04.2022) కృషి !

బందరు రహదారిలోను, గంగులవారిపాలెం వీధిలోను అది విస్తరించింది. పది మందికి పైగా కాలూ, వేలూ పెట్టిన ఈ క్రొత్త రకం గ్రామ ప్రయోజనకర చర్య కాస్త ఆసక్తి కరంగానే ఉంటుంది:

సంగతేమంటే – అసలిది తాపీ పని. ‘ ఉదర పోషణార్థమ్ బహుకృత వేషమ్” అనే పాత సామెత ఉంది గాని, అది రెస్క్యూ టీం వాళ్ళకు వర్తించదు. వాళ్ళ ఈ క్రొత్త – తాపీ మేస్త్రీల అవతారం పొట్ట కూటికి కాదు – ఏదో కొంత ఊరి సామాజిక బాధ్యత మోస్తున్న ఆత్మ సంతృప్తికే! కావాలంటే మచ్చుకు 68 ఏళ్ల కోడూరు వారిని చూడండి- కొత్తరకం చొక్కా చెమటకు తడిసినా-ముఖంలో ఆనందం గమనించండి.

ఈ కాస్తపాటి పరోపకార పరమానందం కోసమే  స్వచ్చ కార్యకర్తలు తమ 3 ½ లక్షల పని గంటల శ్రమతో 40 ఊళ్లకూ, రాష్ట్రానికీ- ఇంకా చెప్పాలంటే 6 లక్షల గ్రామాలకీ ఆదర్శంగా నిలుస్తున్నది! సక్రమంగానో అక్రమంగానో– మిలియన్లో బిలియన్లో పోగేస్తే వచ్చే ఆనందం కాదిది!

ఈ ఇద్దరు తాపీ మేస్త్రీలూ, నలుగురైదుగురు తాపీ కూలీలూ, ఇంకో నలుగురు హంగుదారులూ ఈ వేకువ 4.25 – 7.00 సమయాల నడుమ-2 ½ గంటలు చల్లపల్లి గ్రామస్తుల కోసం ఏం సాధించారయ్యా అంటే:

1) షాబుల్ వీధి, బందరు రోడ్ల కలయిక దగ్గర గుంటలు పడి సదరు ఇరుకు వీధి వాడకం దారులకు అసౌకర్యంగా, ప్రామాదికంగా ఉన్న చోటును,

2) ప్రభుత్వ బాలికల హాస్టల్ పడమర కూడలిలో పడిన గుంటలను,

3)గంగులవారిపాలెం వీధిలో – జల నాట్య కేంద్రం దగ్గరి మరో గుంటను-

మిల్లర్ లో గాదు- పారల్తో సిమెంటు – ఇసుక- రాతి కంకర మిశ్రమం తయారు చేసి, గుంటలు పూడ్చి- మెత్తి, చదును చేసి – అందుకు గాను చెమటలు దిగకారి-ఎట్ట కేలకు 7.00 కు అనుకొన్నది సాధించారు!(ఇందులో  పెద్ద మేస్త్రి గంధం బృందావనుడు-స్వచ్చోద్యమ సంచాలంలో అతడు ఆల్ రౌండర్ – సకల కళా వల్లభుడు!)

మరి నేటి కార్యకర్తల శ్రమ సరే- ఖర్చు? ఇనుప కొట్టు ఉరిమి సాయి గారిది- సిమెంటు, డా. శిర్విశెట్టి వేణు గారిది రాతికంకర, లారీల నుండి కారిపోయి, కార్యకర్తలు సేకరించిన ఇసుక-ఇలా సముద్రంలోని ఉప్పూ, చెట్టు మీది ఉసిరి కలిసి గ్రామస్తుల సౌకర్య భుక్తి  కోసం కమ్మని పచ్చడి తయారీ!

ఆదివారం నాటి, నేటి స్వచ్చోద్యమ అతిధి BDR ప్రసాదు ప్రవచించిన గ్రామ స్వచ్చ-పరిశుభ్ర- సౌందర్య సాధక నినాదాలతో నేటి బరువు పనికి స్వస్తి!

రేపటి వేకువ వీధి పారిశుద్ధ్య చర్యల కోసం మన పునర్దర్శనం సంత వీధిలోనే!

సమర్పిస్తున్నాం ప్రణామం -107

ఏ మనిషికి ప్రాథమ్యం ఉమ్మడి స్వస్తత అగునో-

గ్రామ సమగ్రాభ్యుదయం కలగను నైజం కలదో-

తనతొ బాటు సమాజమూ తరించాలి అనుకొనునో-

అతడె స్వచ్చ ధన్య మూర్తి- అతనికె నా ప్రణామం !

- నల్లూరి రామారావు

   ఒక విశ్రాంత ఉపాధ్యాయుడు    

   26.04.2022