ఒక్కసారికి పనికొచ్చే ప్లాస్టిక్ వస్తువులు ఎవ్వరమూ, ఎన్నటికీ వాడవద్దు.

2426^* (సోమవారం) నాటి గ్రామ భద్రతా వీరుల కృషి.

            వెనకటికొక ముఖ్యమంత్రి సోమవారాన్ని ‘పోల’ వారంగా మార్చుకొని, ప్రాధమ్య మిచ్చుకొని, యుద్ధ ప్రాతిపదికన పూర్తి చేయాలని తపనపడే వారట! చల్లపల్లి రెస్క్యూటీమ్ కూడ అంతే - సోమవారం నాటి తమ పని బరువు - సులువు ఆలోచించుకొని, రోడ్డు గుంటలు ముందా, 50 టన్నుల టిప్పర్ల వేగానికి పాడైన రహదార్ల మరమత్తు ముందా – శ్మశానంలో మిగిలిపోయిన సౌకర్యాలు తక్షణ కర్తవ్యమా - అని తేల్చుకొని, వాలవలసిన చోట వాలిపోతుంటారు.

            ఈ సోమవారమైతే చివరిదే – అంటే దహన వాటికల దగ్గర వీడ్కోలు తదితర వాహనాల పార్కింగ్ స్తలం మెరుగుదలే వాళ్ల ఎంపిక! అందుకోసం 4:20 కే 4+1+1 మంది కార్యకర్తలు తరిగోపుల ప్రాంగణం (C/o చిల్లలవాగు ఉత్తర గట్టు) దగ్గర ప్రత్యక్షం.

            వాళ్లది అదొక పిచ్చో – వ్యసనమో కాకపోతే – అంత చీకట్లో శ్మశానంతో అనుబంధమేమిటి?  - ఇంత అందమైన, అద్భుతమైన, మళ్లీ మళ్ళీ చూడాలనిపించే మహాప్రస్థాన రుద్ర భూమిలో ఇంకా ఏం మెరుగుపరచాలని?

            అంతకుముందే పార్కింగ్ స్తలం చదునులై పోయినా, ఈ వేకువ కూడ దాన్ని తూర్పు దిశగా మరికొన్ని అడుగులు పెంచారు. అందుగాను ఇంకొన్ని తారు పెచ్చుల్నీ - రద్దునీ ట్రక్కులో నింపుకొని తెచ్చి, కార్చి, సర్దుతున్న కార్యకర్తల పనిని సామాజిక మాధ్యమంలోని దృశ్య శ్రవణం (వీడియో)లో పరిశీలించగలరు.

            తమ పని పూర్తి చేసిన ఆనందాన్ని 6.20 సమయంలో ‘మాలెంపాటి అంజయ్య’ ముమ్మారు గ్రామ స్వచ్చ – శుభ్ర – సౌందర్య నినాదాలుగా ప్రకటించారు.

ఒక ముఖ్య గమనిక:

            స్వచ్చోద్యమకారులైన మన డాక్టర్లిద్దరూ రెండు రోజుల పాటు పొరుగు రాష్ట్రంలోని వనపర్తిలో గడిపిన, జరిపిన – మనలాంటి/ మనను మించిన 50 మంది సామాజిక సేవాతత్పరుల అనుభవాలను కలబోసుకొన్న సంఘటనను గూర్చి - బుధవారం ఉదయం మన వైద్యుల మాటల్లోనే తెలుసుకొందాం.

    సమర్పిస్తున్నాం ప్రణామం - 111

ఆ శ్రమ స్వార్థం లేనిది - అందరి నుద్దేశించిన

దది సమష్టిలోనె వ్యష్టి స్వస్తత కలదని నమ్మిన

దది సమస్త కాలాలకు అన్వయించు కోదగినది

స్వచ్చోద్యమ చల్లపల్లి కందుకె మా ప్రణామం!

- నల్లూరి రామారావు

   ఒక విశ్రాంత ఉపాధ్యాయుడు

   02.05.2022