ఒక్కసారికే పనికి వచ్చే ప్లాస్టిక్ వస్తువులు ఎప్పటికీ వాడమని ప్రతినబూనుదాం!

2435^* వ నాటి గ్రామ పరిశుభ్ర సంకల్పం 29 మందిది!

          ఆదివారం (15-5-22) వేకువ 4.20 - 6.12ల మధ్య కాలపు శ్రమదానం సమర్పితమైనది ఊరి ముఖ్య 3 రోడ్ల కూడలి మొదలు బెజవాడ రోడ్డులోని శివాలయం దాక! ఈ ½ కిలోమీటరు రహదారిలో – 110 నిముషాలలో ఏ కార్యకర్త ఎంత దీక్షగా – ఏ పనిని ఏపాటి నిబద్ధతతో నెరవేర్చిందీ వివరించడం కుదరదు గాని, స్థూలంగా వీళ్ళ పని పద్ధతినీ, ప్రయోజన సిద్ధినీ తెలుసుకుందాం!

          కోటకు ఉత్తర దిశగా – రెండు మలుపుల ఈ మార్గం ముమ్మరంగా వాహనాల రాకపోకలకూ, వ్యాపారాలకూ నెలవు! టీ కొట్ల గ్లాసుల, ప్లేట్లతోను, భోజనశాలల, బడ్డీ కొట్ల నుండి వ్యర్ధాలతోను, మరో వంక శీతల పానీయ జాతరతోనూ ఈ రోడ్డు తక్కిన ఏ ప్రధాన వీధులకూ కాలుష్యం విషయంలో తీసిపోదు.

          బస్సులు, లారీలు, ఆటోలు, ఇక్కడే ఆగి, ఆయా ప్రయాణికుల్లో కొందరు, విసిరే వ్యర్ధాలు, రెండు పక్కలా గోడల మీద అంటించిన సినిమా పోస్టర్లు, మేకలు వాటిని లాగితే వేళ్లాడే పీలికలు, ఇసుక – మట్టి టిప్పర్ల నుండి జారిపడే వాటిని స్వచ్చ కార్యకర్తలు కాక ఎవరు శుభ్రం చేయాలి?

          నాటి - పెంచింది తామైనా, కాస్త హద్దు దాటి పెరిగిన చెట్ల కొమ్మల్ని ఎవరు కత్తిరిస్తారు? ఎవరి దుకాణాల ముంగిళ్లను వారు అందంగా, శుభ్రంగా అమర్చుకోకపోతే - వాటికి కూడ ఈ స్వచ్చ కార్యకర్తలే బాధ్యత తీసుకొంటారు!

కావాలంటే మచ్చుకు రెండు మూడు వాట్సప్ చిత్రాలను గమనించండి.

- 84 ఏళ్ల ఒక వృద్ధ వైద్యుడు - ఒంట్లో ఓపిక తగ్గుతున్నా, అప్పటి దాక కార్యకర్తలకు మంచినీళ్లందించి, నిలబడలేక కూర్చొని, చీపురుతో ఊడ్చే విధం;

- ఇంకో 75 ఏళ్ల ఛాయాగ్రాహక వృద్ధుడు మరింతగా అసౌకర్యం గానూ, ఆయాసంగాను తన పని చేసుకుపోతున్న వైనం;

- రోడ్డు మీద, ప్రక్క దుకాణాల దగ్గర - ఎక్కడ ఏ ఇసుక, దుమ్ము, కాగితం ముక్కలు, తుక్కులు, ప్లాస్టిక్ లు ఉండడాన్ని ఒప్పుకోమని, చెమటలు కారుస్తూ శ్రమిస్తున్న నలుగురైదుగురు మహిళామతల్లులూ;

- ప్రోగుబడిన వ్యర్ధాలను సకాలంలో డిప్పలతో ట్రక్కులో నింపి, చెత్త కేంద్రానికి చేరుస్తున్న ఐదారుగురి పట్టుదలా,

          ఇంకా చెప్పాలంటే – “అబ్బా! ఎంత బాగా వీధుల్ని శుభ్రపరుస్తున్నారయ్యా! మీ వల్లే చల్లపల్లి ఇంత చూడచక్కగా ఉంది...” అని మెచ్చుకొంటూ తప్పుకొన్న వారు తప్ప కార్యకర్తలతో కలిసి శ్రమించని కొందరు గ్రామ సోదరులు.....ఇదీ ఈ ఆదివారం ఉషోదయాన చల్లపల్లి శ్రమదాన కాల విశేషం!

          6.35 వేళకు – 3 రోడ్ల కూడలి దగ్గరి దాసరి శ్రీను హీరో షోరూం ఎదుట సమీక్షా సమావేశమూ, ఆ సందర్భంగా అకుల దుర్గా ప్రసాదుని గ్రామ స్వచ్ఛ - శుభ్ర - సౌందర్య సంకల్ప నినాదాలూ... ఆ విధంగా ఆదివారపు శ్రమదాన ఘట్టం ముగిసింది!

          బుధవారం నాటి వేకువ సైతం మనం విజయవాడ మార్గంలోని శివాలయం పరిసరాల్లోనే కలుసుకొందాం!

       సమర్పిస్తున్నాం ప్రణామం – 117

నాల్గు మాటలేమున్నది – నాలుకతో పలుకవచ్చు

ధన సహాయమొంతైనా ఘన రీతినె జరుపవచ్చు

సమయ శ్రమదానాలు ద్వి సహస్ర దినాలుగ చేసే

స్వచ్చోద్యమ కారులకే సముచిత తొలి ప్రణామం!

నల్లూరి రామారావు

స్వచ్చ సుందర చల్లపల్లి కార్యకర్త,

ఒక విశ్రాంత ఉపాధ్యాయుడు

15.05.2022.