ఒక్కసారికే పనికి వచ్చే ప్లాస్టిక్ వస్తువులు ఎప్పటికీ వాడమని ప్రతినబూనుదాం!

స్వచ్చోద్యమ పనిదినాల వరుస సంఖ్య 2438^*

          13 వ వార్డు (అగ్రహారం) లో ప్రధాన వీధి; 4.16 వేకువ సమయానికే ప్రారంభమైన స్వచ్చంద కార్మికుల ప్రయత్నం; తదాదిగా 6.00 దాక - అనగా 100 నిముషాల పర్యంతం - 27 మంది గ్రామ స్వచ్చ – శుభ్ర – సౌందర్య వ్యవసాయం! అందులో వార్డు సభ్యురాలైన అల్లంశెట్టి శ్రీరంగనాయకమ్మ, గ్రామ సర్పంచమ్మ వంటి బాధ్యుల భాగస్వామ్యం!

          మరి ఇక చెప్పేదేముంది – తెల్లవారే సరికి వీధంతా ఒక క్రొత్త స్వచ్చ కళ! వీరి గంటన్నరకు పైగా శ్రమదానం దెబ్బకు వీధిలో అంతకు ముందున్న దుమ్ము - ధూళి - ఇసుక - పుల్ల - పుడక - ప్లాసిక్ కప్పులు – గ్లాసులు – సీసాలు - ఆఖరికి కాగితం ముక్కలు సైతం లేని ఒక ఆహ్లాదకరమైన అగ్రహారం వీధి మనకిప్పుడు కనిపిస్తున్నది – వాట్సప్ చిత్రంలో గమనించండి.

          ఐతే - ఈ వార్డులో ఎన్నికైన ప్రజా ప్రతినిధులు సరే – తక్కిన వారికి మాత్రం బాధ్యత లేదా అనేదే స్వచ్ఛ కార్యకర్తల ధర్మ సందేహం! నాలాంటి నిత్య శంకితులకైతే – గ్రామంలోని 22 వార్డుల సభ్యులూ, వారి అనుయాయులూ, కుటుంబ సభ్యులూ, ఊరి ఉమ్మడి శ్రేయోభిలాషులూ ప్రతిరోజూ కాకున్నా - అప్పుడప్పుడైనా రోజుకొక గంట పాటైనా శ్రమదానంలో ఎందుకు పాల్గొనరనే ప్రశ్న పుట్టుకొస్తూనే ఉంటుంది!

          చేసేదేముంది - ఇలాంటి సందేహ జీవుల – మందైక భావుల ప్రశ్నలు 2438* పని దినాల శ్రమదానం తర్వాత కూడ ప్రశ్నలు గానే మిగిలిపోతున్నాయి!

          అయ్యా! అమ్మా! (13వ) వార్డు నివాసులారా! స్వచ్చోద్యమ చల్లపల్లిలో నివసించే 25 వేలకు పైగా అదృష్టవంతులారా! స్వచ్చ సైనికుల రేపటి శ్రమదానం సైతం అగ్రహారంలోనే ఉండబోతున్నది  -మీ వార్డుకు, గ్రామానికి చెందని కొందరు డాక్టర్లు, వృద్ధులు, మహిళలూ మీ వార్డు – గ్రామ వీధి  - శుభ్రత నిమిత్తం వేకువనే 2 గంటల సమయ - శ్రమ - అర్ధ దానాలు చేస్తున్నారు. వీలైన ప్రతి ఒక్కరూ వచ్చి - పాల్గొని – సంఘీభావం తెలపండి!

          నేటి కార్యకర్తలు గ్రామ సామాజిక ప్రయోజనార్థం నిర్వహించిన వీధి పారిశుద్ధ్య కృషిలో నన్ను మరీ ఆకర్షించిన కొన్ని దృశ్యాలు:

1) రోడ్డు మార్జిన్లలో పెరిగిన పిచ్చి - ముళ్ల మొక్కల్ని సమూలంగా కత్తులకు బలిచేస్తున్న – పీకేస్తున్న ఏడెనిమిది మంది కత్తి వీరులు –

2) నరికిన – పీకిన వ్యర్ధాలతో సహా సకల కశ్మలాలను చీపుళ్లతో ఊడుస్తున్న మహిళలు –

3) డిప్పల్తో వ్యర్ధాల ప్రోగుల్ని ట్రాక్టర్లో కందిస్తున్న కార్యకర్తలు, ట్రాక్టర్ లో చిద్విలాసంగా నిలబడి అందుకొంటున్న ట్రస్టు కార్మిక పర్యవేక్షకుడు –

4) యధాప్రకారం - ప్రతి రోజులాగే తన ఊరిలో జరిగే ఈ సామూహిక – సామాజిక - సమైక్య శ్రమదానాన్ని చూసి తరించిపోతున్న ఈ ఉద్యమ సంచాలకుడు -

నేటి మరొక ముఖ్య విశేషం :

మొన్నటి గాలివానకు మండల రెవిన్యూ కార్యాలయాలలోని ఒక చెట్టు అంబేద్కర్ విగ్రహం ప్రక్కన కూలిపోగా, దాసి సీతారామరాజు గారి అభ్యర్ధన మేరకు స్వచ్ఛ సుందర కార్యకర్తలు ఆ చెట్టు కొమ్మలను నరికి, ఆవరణను శుభ్రపరచి మన రాజ్యాంగ నిర్మాత పట్ల తమ గౌరవాభిమానాలు చాటుకున్నారు.

          6.25 సమయంలో తన గ్రామ స్వచ్ఛ – శుభ్ర – సౌందర్య సంకల్ప నినాదాల్ని ముమ్మారు అదరగొట్టింది BSNL గౌరుశెట్టి నరసింహారావు నామధేయుడు!

          క్రమం తప్పని 5000/- విరాళ మందించినది ప్రాతూరి ఉదయ శంకర శాస్త్రి!

          గతంలోనూ ఆమె స్వచ్ఛ సుందర చల్లపల్లి కోసం అనేక విరాళాలు ఇచ్చారు. విశ్రాంత ఉపాధ్యాయిని శ్రీమతి యార్లగడ్డ పుష్పసుందరావతి గారు మళ్లీ ఈరోజు కూడా 2 వేల రూపాయలు "మనకోసం మనం" మేనేజింగ్ ట్రస్టీకి సమర్పించారు.

          గత నెల స్వచ్చోద్యమ జమా ఖర్చుల్ని ప్రకటించినది డాక్టర్ DRK!

          రేపటి మన స్వచ్చంద శ్రమదాన గ్రామ భాగం కూడ 13 వ వార్డులోని అగ్రహార ప్రధాన వీధే!

          సమర్పిస్తున్నాం ప్రణామం – 119

మద్య సంస్కృతి క్షుద్ర రాకడ - మత్తు మందుల చిత్ర పోకడ

“నాది – నాకను” వరుసె గానీ, “మనది – మనకను” మాట ఎక్కడ?

సంకుచితమును అధఃకరించి - సమాజ శ్రేయము నభిలషించిన

ఒక సలక్షణ - ఒక విలక్షణ ఉద్యమానికె నా ప్రణామం!

- నల్లూరి రామారావు,

  స్వచ్చ సుందర చల్లపల్లి కార్యకర్త,

  ఒక విశ్రాంత ఉపాధ్యాయుడు

 18.05.2022.