ఒక్కసారికే పనికి వచ్చే - పర్యావరణాన్ని చెరిచే ప్లాస్టిక్ వస్తువులను మనమెందుకు వాడాలి!
ఇది స్వచ్ఛ కార్యకర్తల 2452*వ నాటి గ్రామ బాధ్యత
గురువారం – 2.6.22 వ నాటి వేకువ సైతం 4.20 కే వారి కర్తవ్య నిర్వహణ కోమలా నగర్ చివరి వీధిలోనే! 6.10 దాక - అంటే 110 నిముషాల పాటు అక్కడొక క్రొత్తరకం సందడి! మైకు నుండి వినబడే పాటలొక ప్రక్క, కార్యకర్తల పనిలో వాడే పార – కత్తి - గొర్రు లాంటి పనిముట్ల చప్పుళ్ళో వంక, అప్పుడప్పుడు ఒకరిద్దరి హెచ్చరికలో - సూచనలో - ఛలోక్తులో వినిపించే సందడన్న మాట!
ఈ చిన్న వీధి మొత్తం శుభ్ర పడేదే గాని, రెండు ఖాళీ జాగాలు అడ్డుపడి పూర్తికాలేదు. ప్రధానంగా కార్యకర్తల ఆశయమేమంటే – రోడ్లు శుభ్రంగా ఉండాలి, మార్జిన్లలో కాగితాలు, ప్లాస్టిక్ వస్తువులు వంటివి కనపడరాదు, వీధికి రెండు ప్రక్కలా పచ్చదనం పరుచుకోవాలి....
ఐతే క్షేత్ర స్థాయిలో వస్తున్న చిక్కేమంటే – ఖాళీ జాగాల్లో పిచ్చి - ముళ్ళ మొక్కలు పెరిగి చిట్టడవుల్లా మారడం, పాదచారులో, ప్రక్కిళ్ళ వారో అలవోకగా ప్లాస్టిక్ సంచులో, సీసాలో, కాగితం పొట్లాలో విసరడం...
స్వచ్ఛ కార్యకర్తల ప్రథమ శత్రువు ప్లాస్టిక్ తుక్కే గాని, చెట్ల మధ్య ఇరుక్కొన్న సింగిల్ యూజ్ ప్లాస్టిక్ ల కోసమైనా ఖాళీ జాగాల మొక్కల్ని నరకక తప్పడం లేదు – అందుకే ప్రతి రోజూ పనిలో జాప్యం!
ఇప్పుడిక ఈనాటి శ్రమదాన విశేషాల్ని తెలిపే వాట్సప్ మాధ్యమ చిత్రాల్ని గమనించండి – ఒక్కోచోట 10 – 12 - 15 మంది కార్యకర్తలు ఒక కైవారంగా ముళ్ళ చెట్లు నరుక్కొంటూ - ముగ్గురు నలుగురు బాల కార్యకర్తలు ప్లాస్టిక్ దరిద్రాలను ఏరి, డిప్పల్తో ట్రాక్టర్ లోకి మోస్తూ - కొందరు ఇతర వ్యర్ధాల్ని ట్రక్కులో నింపుతూ శ్రమించే సన్నివేశాలెంత బాగున్నాయో!
మనలాంటి వాళ్లకా దృశ్యాలు ఆశ్చర్యకరం గానూ, ఇంత శ్రమపడే కార్యకర్తల పట్ల ఆరాధనకరంగానూ ఉండవచ్చు. ఆ శ్రమ జీవులకు మాత్రం ఇదొక సాధారణ అభ్యాసం! ఈ వ్యసనమెంత బలమైనదంటే - ఒక్కోమారు తమ ఎదుట మిగిలిపోయిన పనిని వదలరు, బ్రతిమాలుతున్నా విరమించరు!
నేటి శ్రమదాతల్లో – పది - పన్నెండేళ్ల బాల కార్యకర్తలు - దుబాయి నుండి, అమెరికా నుండి, విజయవాడ నుండి చుట్టపు చూపుగా వచ్చిన పిల్లలు పాటుపడుతున్న వైనం ఆకట్టుకోదా? కష్టం విలువ, సొంతానికి కాక ఊరి మేలుకై శ్రమించే ప్రత్యేకత, సమూహంలో కలసి పనిచేసే అలవాటు ఈ వయసులో కనుక అలవడితే - ఇక ముందు ముందు వాళ్లెంతగా జనహితులౌతారో ఆలోచించాలి!
చల్లపల్లి స్వచ్చోద్యమ నిరంతర ఆరాధకులైన ఉదయ శంకర శాస్త్రి గారి నెలవారీ చందా 5,000/- మేనేజింగ్ ట్రస్టీ గారికి అందినది.
అన్ని రకాల గ్రామ మెరుగుదల కృషి చేసి, కాయకష్టంతో ఉక్కతో- చెమటతో బట్టలు తడిసి, తామీనాటికి మంచి పని ముగించామనే సంతృప్తి పొంది, 6.20 సమయంలో ఈ 28 మందీ ఆర్య – ఆరవ్ ల గ్రామ ప్రయోజనకర నినాదాలకు గట్టిగా ప్రతిస్పందించారు. తామే చిరకాల స్వచ్చోద్యమ కార్యకర్తైన పైడిపాముల కృష్ణకుమారి (గ్రామ సర్పంచ్) గారి స్వగ్రామ - స్వచ్ఛ - సౌందర్య - భవితవ్యం పట్ల ఆరాటాన్ని, పోరాటాన్ని, ఆవేదనను ఆలకించారు. డాక్టరు గారి సమీక్షను, సూచనలనూ విని, గృహోన్ముఖులయ్యారు. గంగులవారిపాలెం గస్తీగది దగ్గరి మజ్జిగ పంపకం బాధ్యతను కొందరు తీసుకొన్నారు.
రేపటి మన శ్రమదానం కూడ కోమలానగర్ లోనే ఉంటుంది!
సమర్పిస్తున్నాం ప్రణామం – 31
పరిశుభ్రత సన్నిధిగా - విరితోటల పెన్నిధిగా
సుమ సుందర వీధులుగా, పర్యాటక దృశ్యంగా
శ్రమ సంచిత సర్వోత్తమ గ్రామంగా తమ ఊరిని
నిలుపుతున్న శ్రమ జీవన రీతికి నా ప్రణామం!
- నల్లూరి రామారావు,
ఒక విశ్రాంత ఉపాధ్యాయుడు,
స్వచ్ఛ సుందర చల్లపల్లి కార్యకర్త
02.06.2022.