ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను మనమెందుకు వాడాలి!

సహనశీలమైన చల్లపల్లి స్వచ్చోద్యమం వయస్సు 2459^* నాళ్లు!

            9-6-22 - గురువారం వేకువ సమయపు శ్రమదానం వయస్సైతే 110 నిముషాలు. సదరు ఆయుర్దాతలేమో 21 మంది. ముగ్గురు - నలుగురు బందరు రోడ్డెక్కి చీపుళ్ల ప్రయోగం చేసినా, ఎక్కువ మంది కష్టించింది మాత్రం సచివాలయ అసంపూర్ణ కట్టడం దగ్గరే! రెండు - మూడు రోజులు కార్యకర్తలతో బాటు శ్రమించిన చిన్న కార్ల డ్రైవరు మిత్రులెందుకో ఈ వేకువ కనిపించలేదు.

            అసలెందుకో గాని - దేశమంతటిలోనూ శ్రమకూ, దాని విలువకూ చోటు తగ్గిపోతూ వస్తున్నది. అనేక మంది బట్ట నలగని ఉద్యోగాలు, వ్యాపారాలు - అవి కుదరనప్పుడు అక్రమాలతో బ్రతుకు బండి లాగుతున్నారు – ఏలే వాళ్లు సైతం శ్రమతో సంపదలు సృష్టించే దృక్పధాన్ని కాక, తాతల్నాటి ప్రజల సొత్తుల్ని వాళ్లకే దానధర్మాలు ప్రోత్సహిస్తున్నారు! ఏ పల్లెటూరు కార్మిక – కర్షకులో తప్ప ఒళ్లు వంచి, శ్రమించి, సంపాదించి, తమ కాళ్ల మీద తాము నిలబడే వాళ్లిక ముందు కనిపించరేమో!

            చల్లపల్లి స్వచ్చంద శ్రమదానం అందుకు మినహాయింపు! పంచాయితీల శక్తి చాలనప్పుడు – ప్రభుత్వాల ప్రజారోగ్య సంక్షేమ ప్రయత్నాలు విఫలమౌతున్నప్పుడు – తమ గ్రామ సమాజ సంక్షేమానికి నడుం కట్టి ఎనిమిదేళ్లుగా స్వచ్చ కార్యకర్తల కృషి ప్రస్తుత కాలానికొక ఆవశ్యకం – ఆదర్శం – సముచితం!

            ఎప్పటిలాగే స్వచ్చ కార్యకర్తల ప్రణాళికా బద్ధ కృషి నేడు కూడా! సచివాలయం తూర్పు జాగాలో ఈ నాటి కష్టతరమైన శ్రమ విశేషమేమంటే, 15 – 16 మంది గత మూడు రోజులుగా బాగు చేసిన చోటనే పారలు, గునపాలు, గోకుడు – త్రవ్వుడు పారల్తో జానెడు లోతుగా త్రవ్వడమూ, నేల పొరల్లో దాగిన పాత గుడ్డ ముక్కలు, ప్లాస్టిక్ సంచులు, గ్లాసులు, పాత చెప్పులు, సీసా పెంకులు డిప్పల కొద్దీ ఏరి, ట్రక్కులో నింపుకోవడమూ!

            త్వరలో నిర్మించి, పంచాయితీకి – తద్వారా ప్రజలకు అంకితం చేయబోయే మరుగు దొడ్ల – మూత్రశాలల – ఒక రకమైన పునాది పనులన్న మాట ఇవి! ఈ పనుల్లో మునిగి ఇందరు శ్రమదాతలు బట్టలు చెమటతో తడుపుకొని, వంచిన నడుమెత్తక గంటన్నర పాటు పాటుబడడం పెద్ద విశేషమే!

            6.20 సమయంలో కాఫీ బదులు చల్లని మజ్జిగ సేవించి, ఆకుల దుర్గా ప్రసాదు మూడు మార్లు నినదించిన గ్రామ పరిశుభ్ర – స్వచ్చ – సౌందర్య సంకల్పాన్ని ఎలుగెత్తి ప్రకటించి, శ్రమ జీవనం పట్ల – సహన ప్రశాంత బ్రతుకు శైలి పట్ల డాక్టరు DRK గారి సోదాహరణ ప్రసంగం విని, తమ గ్రామ బాధ్యతను రేపటికి వాయిదా వేసుకుని కార్యకర్తలు గృహోన్ముఖులయ్యారు! వీరిలో కొందరు గంగులవారిపాలెం గస్తీ గది దగ్గర 8.00 నుండి – 22 వ దినం విజయవంతంగా జరిగే మజ్జిగ వితరణ దగ్గర హాజరౌతారు!

            రేపటి మన ఊరి మెరుగుదల ప్రయత్నం విజయవాడ రహదారిలోని పెట్రోల్ బంకు దాటిన తరువాతి కోమలా నగర్ బజారులో జరగాలి!

           సమర్పిస్తున్నాం ప్రణామం – 38

అందరిది ఈ గ్రామ మని, ఆనందదాయకముగా మార్చే

సుదీర్ఘ శ్రమదానోత్సవం గని – ఇందరొకటై పాటుపడగా

ఎందు కింతటి ఆభిజాత్యం? ఏల కలియుట కింత బిడియం?

స్వాగతిద్దాం – సమర్పిద్దాం స్వచ్చ సుందర సత్ప్రణామం!

 - నల్లూరి రామారావు,

  ఒక విశ్రాంత ఉపాధ్యాయుడు,

  స్వచ్ఛ  సుందర చల్లపల్లి కార్యకర్త

  09.06.2022.