ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను మనమెందుకు వాడాలి!

30 మంది x 110 నిముషాల శ్రమ = 200 గజాల రహదారి పారిశుద్ధ్యం - @2461^*

            స్వచ్చ - సుందర చల్లపల్లి నివాసులకూ, సుదీర్ఘ సమయ శ్రమదాతలకూ పై ఈక్వేషన్లు చప్పున అర్థమౌతాయి గాని, క్రొత్త వాళ్లకు కాస్త వివరణ అవసరమే! ఈ శనివారం వేకువ గంటా ఏభై నిముషాలు తమ ఊరి బాధ్యతలు నెరవేర్చింది 30 మంది కార్యకర్తలనీ, స్వచ్చ – శుభ్ర సుందరీకృత ప్రాంతం బెజవాడ రహదారిలో పెట్రోలు బంకు, కోమలానగర్‌లో మూడో వీధి నడుమ ప్రాంతమనీ తాత్పర్యం!

            ఇంకా విడమరిచి చెప్పాలంటే - అక్కడి దుకాణదారులు గాని, వీధి అంగళ్ల – చిరుతిళ్ల – బడ్డీ కొట్ల - త్రోపుడు బళ్ల చిరు వ్యాపారులు గాని ససేమిరా పాల్గొనలేదు – కోమలానగర్ లో ఒక గృహస్దుడు తప్ప!

            ఈ ఊళ్లో సగం మందికి పైగా స్వచ్చంద శ్రమదానం పిలుపు కెలాగూ స్పందించరు. కొందరేమో స్పందించి – స్పందించీ అలసిపోయి విరమించారు. ఇక RTC బస్సు ప్రయాణికులో, సొంతవాహనచారులో అదాటుగా స్వచ్చ కార్యకర్తలు - అందులోనూ బాగా తెలిసిన డాక్టర్ల – బడిపంతుళ్ల - గృహిణులు మోహాల్నీ, చేతుల్లో చీపుళ్లతో/ గొర్రులతోను, దుమ్ము - ధూళి దూసరిత వస్త్రాలతోనూ, అదీ ఈ మురుగు కాల్వల దగ్గర చూస్తే సన్నివేశం చటుక్కున బోధపడక పోవచ్చు!

            కాసేపటి తర్వాతే - తాపీగా - అవసరమైతే ఆరాతీసి గ్రహిస్తారు - వీళ్లందరివి వెర్రిమొర్రి ఓవర్ యాక్షన్లేవీ కాదనీ- తాము నమ్మిన ఆదర్మాన్ని- అంటే సామాజిక బాధ్యతను వీళ్లు సుదీర్ఘ కాలంగా ఆచరణలో ఋజువు చేస్తున్నారనీ!

ఐతే ఎప్పుడైనా మానవ స్వభావమేమంటే - ఎదుటివాళ్లకి సలహాలివ్వడం వేఱు, ఎదుటి వారి త్యాగాన్ని గుర్తించడం, మెచ్చడం వేఱు - స్వయంగా తాము దాన్ని చిత్తశుద్ధితో ఆచరించడం మాత్రం చాలా చాలా కష్టం! అది కష్టసాధ్యమే కాకుంటే ప్రతి రోజూ ఇలా శ్రమదానంలో పాల్గొనే చల్లపల్లి గ్రామీణులు వందల సంఖ్యలో ఉండాలి మరి!

            నేటి 30 మంది స్వచ్చ కార్యకర్తల కృషిదేముంది - అది యధా ప్రకారంగానే – డ్రైను కుంటి నడకని సరిచేయడం, రోడ్డునూ మార్జిన్లనూ దుమ్ము ధూళి రహితం చేయడం, గోనె సంచీడు ప్లాస్టిక్ సంచుల్ని, సీసాల్ని,  మద్యం ఖాళీ గాజుసీసాల్ని ఏరడం, కొన్ని చెమటలు క్రక్కడం, మరికొన్ని సీసాల మంచి నీళ్లు త్రాగడం, గోకుడుపారల్తో ఇసుక- దుమ్ము చెక్కి రహదారిని విశాల పరచడం వగైరాలన్నీ షరా మామూలే!

            6.20కి కాఫీ ఆస్వాదన ముగిసి, తాతినేని – నర్సరీ వేంకట రమణ వినిపించిన త్రివిధ గ్రామ  మెరుగుదల సంకల్ప నినాదాలను పునరుద్ఘాటించి, డాక్టర్. DRK గారు చేసిన నేటి శ్రమదాన సమీక్షను విని, నేటి తమ బాధ్యతను ముగించారు. మాటల్లో -  చేతల్లో మంచి - మర్యాద – మప్పితాల మీద ఆసక్తికరమైన చర్చ కూడ నడిచింది!

                    చిరకాలంగా స్వచ్చ చల్లపల్లికి అంకితుడైన కోడూరు వేంకటేశ్వరరావు గారి క్రమం తప్పని 520/- విరాళం ‘మనకోసం మనం’ మేనేజింగ్ ట్రస్టీకి కృతజ్ఞతాపూర్వకంగా అందినది..

            రేపటి - ఆదివారపు వేకువ సైతం మన బాధ్యతా నిర్వహణ ఈ  బెజవాడ రహదారిలోనే -అందుకుగాను, మనం కలుసుకోదగిన  చోటు విజయా కాన్వెంటు ఎదుటనే!

       సమర్పిస్తున్నాం ప్రణామం – 140

ప్రజా భిమతమూ ముఖ్యమే అది సజావుగ కొనసాగనప్పుడు

ఏదిహితమో- అహిత మేదో ఎంతకూ గమనించనప్పుడు

ఇలా-ఇంత సుదీర్ఘ ఉద్యమ కలాపం అవసరం పడుతది

అంత సంయమనాన్ని చూపిన కార్యకర్తల కొక ప్రణామం!

- నల్లూరి రామారావు,

  ఒక విశ్రాంత ఉపాధ్యాయుడు,

  స్వచ్ఛ  సుందర చల్లపల్లి కార్యకర్త

  11.06.2022.