ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను మనమెందుకు వాడాలి!
ఆదివారం నాటి గ్రామ వీధుల స్వచ్ఛ - సుందరీకరణ - @ 2462*
12.6.2022 వ నాడు కూడ మళ్ళీ కోమలా నగర్ దగ్గరి విజయవాడ రహదారే- ముప్పై ముగ్గురి శ్రమ త్యాగంతో- ప్రభుత్వ వైద్యశాలకు వెళ్లే రోడ్డు కూడ కొంత బాగయి పోయింది! ఐతే – ఇవాళటి 2 గంటల వీధి పారిశుద్ధ్య కృషిలో కొట్టొచ్చినట్లు కనిపించేది మాత్రం చండ్ర వికాస కేంద్రం దగ్గరి దాదాపు ఎండిన మురుగు కాల్వ, బెత్తెడెత్తున ఇసుక – దుమ్ము పేరుకుపోయిన తారు రోడ్డు శుభ్రపడి – అదేదో క్రొత్త రోడ్డనిపించడం!
బెజవాడ రహదారి భాగాన్ని 2 గజాల మేర వెడల్పు చేయడమూ, అందుకు గాను గోకుడు పారల్తో మట్టి పెచ్చుల్ని గోకి, చీపుళ్ళతో ఊడ్చి, మార్జిన్ల ఎత్తు పల్లాల్ని పారలతో సమం చేసి – అదేదో గుడి ప్రాంగణమన్నంత నిష్టగా సుందరీకరించినది చల్లపల్లి బ్యూటిఫికేషన్ బ్యాచ్ కాక ఇంకెవరు?
ఇదే చోట - మురుగు కాల్వ అంచు మీద - ఎప్పటిదో గాని బురద – తుక్కు గుట్ట ఎండి చట్టైపోతే – ఇద్దరు గునపాలవారు, ఇద్దరు పార పనివారు ఎలా శ్రమించి, చదును చేశారో గమనించారా?
విజయా కాన్వెంట్ ప్రక్క వీధి కూడలి దగ్గర ఒక వేగ నిరోధకం – దాన్నానుకొనే ఒక పాక/టెంట్ హోటల్ – అంత వ్యాపారం జరిగే టిఫిన్ సెంటర్ దగ్గర ఇంతకాలంగా ఇంత పెద్ద గంట పడితే – అరగుంటకు పైగా చెమటలు చిందేలా శ్రమించి, రాతి ముక్కలతో, మట్టితో పూడ్చి, చదును చేసి, వాహనాలకు రక్షణాత్మకంగా మార్చినది నలుగురు స్వచ్ఛ కార్యకర్తలు కాదూ?
కాన్వెంటు ఎదుటి మురుగు గుంటే – అందలి చిక్కుపడి పెరిగి, పెన వేసుకొన్న తిక్క – ముళ్ళ – ఎండు మొక్కలే, ప్లాస్టిక్ దరిద్రాలే – ఖాళీ మద్యం సీసాలే ఈ ఉదయం నలుగురైదుగురి ఓర్పును పరీక్షించాయి!
నలుగురు మహిళలూ, ఒక కాంపౌండరూ ఉవ్వెత్తున లేచి, తమను క్రమ్మేస్తున్న దుమ్ము మేఘం నడుమనే ఎంత శ్రద్ధగా ఊడిస్తే 6.10 తరువాత ఈ రహదార్లింత శుభ్రంగా మారాయి?
ఒక పాత సినిమా పాటలో ఒక పాత్ర
“చెపితే చాలా ఉంది – వింటే ఎంతో ఉంది –
ఇనుకో సెపుతారా – ఎంకట సామి.....!” అని పాడినట్లుగా -
ఆదివారం స్వచ్చంద శ్రమదాతల వీధి పారిశుద్ధ్య కృషిని గురించి కూడ ఎంతైనా వివరించవచ్చు! ఊరి మెరుగుదల పట్ల వాళ్ల అంకిత భావానికి జోహార్లు!
6.10 దాక అలా సాగిన కృషి పిదప విజయా కాన్వెంట్ ఆవరణలో యధావిధిగా ఈ నాటి శ్రమదాన ముగింపు సమావేశం. ఇక అందులో ఒక పల్నాటి సింహం తన గ్రామ స్వచ్చ – పరిశుభ్ర – సౌందర్య సంపాదక నినాదాలు ముమ్మార్లు గర్జించగా,
నేటి కార్యకర్తల కృషి పట్ల తన ఆరాధననూ – 10-00 కు గ్రామ కేంద్రం దగ్గర మొదలయ్యే రోడ్ల గుంటల మరమ్మత్తునూ – డాక్టరు DRK గారు వివరిస్తే, స్వచ్ఛ – సుందర చల్లపల్లి ఆస్థాన గాయకుడు గస్తీ గది దగ్గరి మజ్జిగ పంపకాన్ని పాటలుగా వినిపిస్తే,
గోళ్ళ వేంకటరత్నం వర్షాగమనం కోసం చిటికెల - చప్పట్ల మంత్రాలు ప్రయోగించగా.... 6.50 తదుపరి నేటి శ్రమదాన వేడుక ముగిసెను!
బుధవారం వేకువ మన పునర్దర్శనమూ, శ్రమదానమూ విజయా కాన్వెంటు దగ్గరే మొదలుకాగలదు!
సమర్పిస్తున్నాం ప్రణామం – 141
వేల నాళ్ళుగ చల్లపల్లిలొ విస్తరించిన ప్రయోగానికి
దేశమంతట స్వచ్ఛ సంస్కృతి తేజరిల్లిన ప్రయత్నానికి
తక్షణ స్పందనగ వ్రాసిన - ధన్యవాదం సమర్పించిన
శతక మిదిగో – చదువ నేర్చిన సహృదయతకే నా ప్రణామం!
- నల్లూరి రామారావు,
ఒక విశ్రాంత ఉపాధ్యాయుడు,
స్వచ్ఛ సుందర చల్లపల్లి కార్యకర్త
12.06.2022.