కేవలం ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను వాడదగునా?

ఊరికి ఉపకారులు- గ్రామ రక్షక ముఠా వారి నేటి ప్రయత్నాలు - @2477^*

            స్వచ్చ సైనికుల వీధి పరిరక్షణ కృషి ఖాతాలో మరొక శుభోదయం! ఈ మంగళ వారం (05.07.2022) నాటి వారి బాధ్యతలు నెరవేరిన ఊరి భాగాలు విజయవాడ మార్గంలోని శ్రీమంతు క్లబ్బు ఉత్తర వీధి, NTR పార్కు దగ్గరి మంచి నీళ్ల తయారీ కేంద్రం. పని సమయం వేకువ జామున 100 నిముషాలు, పని మంతులు 5+1 మంది!

            ఈ చల్లపల్లి మహా గ్రామంలో ఏ పౌరులైనా బాధ్యతలు నెరవేర్చాలే గాని, ఆరుగురు  రెస్క్యూ టీమేమిటి, 60 మంది స్వచ్చ కార్యకర్తలేమిటి, ప్రతి రోజూ కనీసం 100 మంది పూనుకొంటే గాని నెరవేరని స్వచ్చ – సుందరీకరణ బాధ్యతలుంటాయి! ఇన్ని వేల రోజులుగా- ఈ 100-150 కార్యకర్తల కుటుంబం నుండి ప్రతి వేకువా 30-40-50 మంది పాల్గొనే అదృష్టం మాత్రమే ఈ ఊరికి దక్కింది! వేల – లక్షల ఊళ్ళతో పోల్చినపుడు మాత్రం - ఇప్పటికిదే గొప్ప!

            లక్షలాది పని గంటల శ్రమతో ఈ కొద్ది మంది బాధ్యులు తమ ఊరిని ఈ మాత్రంగానైనా తీర్చిదిద్దుతున్నారంటే – అందుకు వాళ్లని ఇంద్రుళ్ళూ – చంద్రుళ్ళూ అని కూడ కీర్తించలేం! తమ ముంగిళ్లలో జరిగే స్వచ్చోద్యమాన్ని ఏమైనా సరే- పట్టించుకోని వాళ్లని తప్పు పట్టనూ లేం! ఒకే ఊరికి చెందినా,  రెండు రకాల మనుషుల్లో రెండు విధాల జన్యువులు (జీన్స్) ఉంటాయని ఎలా చెప్పగలం ?

            గ్రామ సామాజికుల్లో సహజంగా ఉండదగిన పరస్పర సహకారమూ, తనతో బాటు ఇరుగుపొరుగు వారి సంక్షేమం కూడ పట్టించుకొనే తత్త్వమూ- ఇవి మాత్రమే ఈ స్వచ్చ సైనికుల ప్రత్యేక లక్షణాలు!

            అంచేతనే నేటి ఐదారుగురు కార్యకర్తలు గంటన్నరకు పైగా శ్రమించారు; శ్రీమంతు క్లబ్బు ప్రక్క రోడ్డు లో సిమెంటు స్తంభాలు పాతడానికి కావలసిన ఇసుకను, స్తంభాలనూ అక్కడికి చేర్చి, సిద్ధం చేశారు;

            నడకుదురు రోడ్డు దగ్గర – సుజల కేంద్రం, ఎదుట – నిత్యమూ రద్దీగా ఉండే వినిమయదారుల సౌకర్యార్థం-అక్కడి గుంటను ఎక్కడి నుండో సేకరించి పెట్టుకున్న మట్టి- రాతి ముక్కల్తో నింపి, సర్దడం వాట్సాప్ వీడియో లో గమనించండి !

            ఈ వేళకి తామనుకొన్న పనులు పూర్తి చేసిన సంతృప్తితో – 6.15 సమయంలో అక్కడి జనం దృష్టినాకర్షిస్తూ –BSNL – గౌరుశెట్టి నరసింహా రావు ప్రవచించిన గ్రామ సంక్షేమ సంకల్ప నినాదాలను ప్రతిధ్వనించారు!

            రేపటి వేకువ మన పౌర బాధ్యతల కోసం విజయవాడ బాటలోని  గాంధీ విగ్రహం దగ్గరే మన కలయిక!

      సమర్పిస్తున్నాం ప్రణామం – 56

గ్రామ వీధులన్నిటిలో కార్యకర్త శ్రమ నర్తన!

ట్రస్టు కార్మికుల కృషితో హరిత వర్ణ విజృంభణ!

సామాజిక సామూహిక స్వచ్చ శుభ్ర పరివర్తన!

స్వచ్చోద్యమ పరిణతికే సమర్పించు అభివందన!

- నల్లూరి రామారావు,

  విశ్రాంత ఉపాధ్యాయుడు,

  స్వచ్ఛ సుందర చల్లపల్లి కార్యకర్త

  05.07.2022.