కేవలం ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను వాడవచ్చునా?

2483^* వ నాటి స్వచ్చోద్యమ చల్లపల్లి సంగతులు

          శుక్రవారం (15.7.22) వేకువ బెజవాడ మార్గంలో - ప్రభుత్వ ఉన్నత పాఠశాల ఆవరణలో – నిన్నటి చోటికి ఎడంగా – నీళ్ల టాంకు దరిదాపులో మళ్లీ 24 మంది నిర్వహించిన బాధ్యతలు విజయవంతమయ్యాయి. అదనంగా మరో 10 సెంట్లలో కాలుష్య విధ్వంసం జరిగిందన్న మాట! ఆ మేరకు స్వచ్చ కార్యకర్తలకు సంతృప్తి దక్కిందన్నమాట!

          గాంధీ ఆశయాల్ని మన సమాజం ఏనాడో అటకెక్కించింది. ఊరూరా తిరిగి స్వచ్ఛ - శుభ్రతల్ని విసుగూ - విరామం లేకుండా ఆచరణాత్మకంగా ప్రబోధించిన ఆ ధన్యుడి విగ్రహాలే మిగిలాయి! మాటల్లో కాక – చేతల్లో ఎనిమిదేళ్లు ఈ చల్లపల్లి శ్రమదాన కర్తలు మాత్రం శక్తివంచన లేకుండా అతని ఆశయ సిద్ధి కోసం ప్రయత్నించడమే ఒక విశేషం! గత రెండు వారాలుగా - రోజూ 30 - 40 పనిగంటల చొప్పున ఆ మౌన సందేశకునికి, ఆ పరిసరాల్లో స్వచ్చ కార్యకర్తలు నిజమైన నివాళులర్పిస్తూనే ఉన్నారు.

          స్వచ్ఛంద శ్రమదాతల నేటి కర్మక్షేత్రం – నీళ్లటాంకు తప్ప నిరుపయోగంగా మిగిలిన కట్టడాల నడుమ చిట్టడివి! అడ్డదిడ్డంగా పెరిగిన ముదనష్టపు ముళ్ల మొక్కలు, తాడి చెట్లు, అల్లుకున్న ముళ్ళ – పిచ్చి తీగలు, రాలి పడ్డ కొబ్బరి మట్టలు, కాలు సమంగా ఆనని ఎగుడు – దిగుడు నేల, రాళ్లు - రప్పలు, దట్టంగా పెరిగిన గడ్డి... ఇదీ సదరు చిట్టడివి దృశ్యం!

          క్రింద చెదలు పుట్టల్ని, పుట్టల్లో పెరిగిన తాడి చెట్టును, చెలరేగుతున్న తేనె టీగల్ని కాచుకొంటూనే నేటి 100 నిముషాల సమయ - శ్రమదానం సాగింది. మడ్డి కత్తులతో చెట్లు నరికిన వాళ్లూ, పైపుల అడ్డాల నడుమ - క్రింద తమ కాళ్లకు పాములో, కప్పలో, ఎలుకలో ఏవి తటస్థపడతాయో తెలియని చోట దంతెలతో వ్యర్ధాల్ని లాగే వాళ్ళు, వాటిని గుట్టలుగా పేర్చిన కార్యకర్తలూ, ఏమైతేనేం, ఎంత చెమట చిందిస్తేనేం, తామనుకొన్న స్వచ్చ – శుభ్రతల్ని సాధించారు!

          ఎప్పటిలా కాక, సదరు వ్యర్ధాల రెండు పెద్ద గుట్టల్ని మాత్రం ఈ రోజు చెత్త కేంద్రానికి తరలించలేదు. తామను కొన్న బాధ్యతలు నెరవేర్చిన సంతోషంతో ఉన్న కార్యకర్తల 6.00 తరువాతి ఛాయా చిత్రాన్ని వాట్సప్ మాధ్యమంలో వీక్షించండి!

          కాఫీ సమయం ముగిశాక - జాతిపిత పాద పీఠం వద్ద – అదే సంతృప్తితో ఒక పౌర శాస్త్రోపన్యాసకుడు - వేముల శ్రీనివాసుడు తన ఊరి స్వచ్చ – పరిశుభ్ర – సౌందర్య సాధనా సంకల్పాన్ని ముమ్మారు ఎలుగెత్తి నినదించడమూ, ఈ స్వచ్చోద్యమ ప్రవర్తకుడు డాక్టరు DRK గారు ఈ వర్ష ఋుతువు కనుగుణంగా ఏ రహదార్ల వెంట ఏ మొక్కలు – ఏ విత్తనాలు నాటదగునో చర్చిండమూ జరిగాయి.

          ఇక మన రేపటి ఉషోదయ శ్రమదాన విశేషాల కోసం మన పునర్దర్శనం – 6 వ నంబరు కాలువ వంతెన దగ్గరే!

          సాధకులు ఈ యోధులే!

కశ్మలాలను కౌగలించే - శ్మశానాలను సంస్కరించే - ఊరి మురుగు బహిష్కరించే

హరిత వనము లలంకరించే – పూల తోటలు పరిమళించే - బద్ధకాలను పరిహసించే

జనుల కాహ్లాదములు పంచే - ముని తపస్సులు గుర్తు చేసే – వినయ వినమిత వర్తనలతో

స్వచ్చ - సుందర చల్లపల్లికి సాధకులు ఈ యోధులే!

- నల్లూరి రామారావు,

   విశ్రాంత ఉపాధ్యాయుడు,

   స్వచ్ఛ సుందర చల్లపల్లి కార్యకర్త

   15.07.2022.