కేవలం ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ వస్తువులను తక్షణమే మానేద్దాం!

2502^* వ నాటి శ్రమదానం రెస్క్యూ దళానిది!

            ఈ మంగళవారం (9.08.2022) నాటి  వేకువ మరో మారు 4.30 కు రెస్క్యూ వాలంటీర్ల చతుష్టయం విజయవాడ రహదారిలోని శివాలయం దగ్గర ప్రత్యక్షమయింది! శివభక్తితో కాదు – గ్రామ భక్తితో! తమ సామాజిక కర్తవ్యం పట్ల అనురక్తితో!

నేటి స్వచ్చంద శ్రామికుల కృషికి నేపధ్యమేమంటే :

తక్కిన రోడ్ల సంగతలా ఉంచి,  ప్రధాన రహదారి మీద పడిన గుంటలు! ఎడతెగని వాన ముసురుతో అవి పెద్దవై వాహనాలకు తెస్తున్న ముప్పులు! బాధ్యత గల ప్రభుత్వ శాఖలు ఎంతకాలానికీ పట్టించుకోనప్పుడు చూస్తూ ఊరుకోలేక తన కష్టార్జితం 2 లక్షలతో పూనుకొన్న ఒక గౌరవ విశ్రాంత వృద్ధ పౌరుడు! మళ్ళీ వచ్చిన వాన ముసురు ఆ పనిని సగంలో ఆపడం – రోడ్డు ప్రక్కన పోసిన రాతి రజను చట్టుగా మారుతుండగా ఈ రెస్క్యూ టీం వాళ్ళు దానిని వేరొక చోటికి తరలించి భద్రపరచడం!

            ‘ఇంతగా సాగ తీసి వ్రాశాడు గాని – పని చిన్నదే – ఏముంది ఒక ట్రాక్టరులోకి ఆ గుట్టను త్రవ్వి, డిప్పల్తో మోసి,  నింపి డంపింగ్ కేంద్రానికి చేర్చడమే గదా..’ అని ఎవరికైనా అనిపించవచ్చు! ఈ ఊరి రహదార్ల గుంటల్లో ఎగిరెగిరి పడే  వాహనాలు నడిపే,  ఒళ్లూ – బళ్లూ గుల్లయిపోతే ప్రభుత్వాన్ని తిట్టుకొంటూ పోవడం తప్ప సానుకూల దృక్పధంతో ఇలా శ్రమించేది స్వచ్చ కార్యకర్తలు గాక, ఇతరులెందరు?

            గంటన్నరకు పైగా కష్టించి,  నేటికి పని ముగించిన కార్యకర్తలు BSNL నరసింహారావు నాయకత్వంలో తమ ఊరి స్వచ్చ – శుభ్ర – సౌందర్య సంకల్పాన్ని నినాదాలుగా చాటుకొన్నారు!

            రేపటి వేకువ మన శేష బాధ్యతల కోసం విజయవాడ బాటలోని కాటాల వద్దే మన పునర్దర్శనం!

            శ్రమ సమన్విత బృందగానం

ఎందరెందరో కలిసి నడిచే – వీధి వీధిని శుభ్రపరిచే –

అన్ని వసతులు పెంచి వేసే - ఐకమత్యపు శక్తి చాటే –

ఉన్న ఊరిని మనోజ్ఞంగా - స్వస్త సుందర బంధురంగా

శ్రమ సమన్విత బృందగానం జరుపు దృశ్యం చూడలేమా!

- నల్లూరి రామారావు,

   విశ్రాంత ఉపాధ్యాయుడు,

   స్వచ్ఛ సుందర చల్లపల్లి కార్యకర్త

   09.08.2022.