కేవలం ఒక్కసారికే పనికి వచ్చే - పర్యావరణ ధ్వంసకమయ్యే ప్లాస్టిక్ ల వాడకం మానేద్దాం!

స్థిరవారం నాటి శ్రమదానం సంగతి - @ 2537^*

          17.09.2022 వ వేకువ శ్రమ దాతలు 29 మంది ; వాళ్ల సేవలందుకొన్న చోటు ఉప మార్గము నందలి సినీ ప్రదర్శన శాల దగ్గర ; శుభ్రపడి,  అద్దాలుగా మారిన వీధి మార్జిన్లు 2 ; అన్నీ కలిసి వ్యర్థాలు పెద్ద ట్రాక్టరు నిండుగా ; చల్లని వేళే గాని, కార్యకర్తల చెమటలు దండిగా; 4. 14 & 6. 05 నడుమ బాగుపడిన 100 గజాల వీధిని చూసిన శ్రమదాతల సంతృప్తి మాత్రం మెండుగా!

స్థూలంగా 2537 ^* వ నాటి గ్రామ మెరుగుదల కృషి ఇది.  మరి కొంత వివరాల్లోకి పొతే :

1)  20 రోజుల్నాడు కంటి శస్త్ర చికిత్స జరిగిన పైడిపాముల రాజేంద్రుడు బరువు కొమ్మలు మోయడం, ట్రాక్టరు తోలడం;

2)  ప్రస్తుతానికి దుబాయికి చెందిన అత్యున్నత సాఫ్ట్ వేర్ నిపుణుడు(నాగేంద్ర కుమారుడు) గంటన్నర పాటు అత్యంత హార్డ్ వేర్ పనివాడుగా మారిన వైనం ;

3) 10 మంది కార్యకర్తలు కండలు కరిగేలా- చెమటలు దిగ గారేలా – కత్తులు వాడి చెడు మొక్కల్ని, గడ్డిని తొలగించి రెండు ఉద్యానాలను క్షుణ్ణంగా శుభ్ర పరిచి వదలడం ;

4) కొందరు మహిళామ తల్లులు చీపుల్లేమిటీ – పంజా లేమిటీ – డిప్ప లేమిటీ అవసరార్థం ఏదైనా వాడి సదరు వీధి భాగాన్ని తీర్చిదిద్దడం,

5) మిగిలిన వాళ్ళేమీ తమాషా చూడడం కాదు- మురుగు కాల్వ గట్లను సరిదిద్దో , మన్ను గుట్టల్ని చదును పరచో, ప్లాస్టిక్ దరిద్రాల్ని వదల గొట్టో,..... అలా ఎక్కడేపనికైనా కదలడం;

6) ఇన్ని మకిల గుట్టల్ని ట్రాక్టర్ దగ్గరకు మోసి, డిప్పల్ని అందులోకి విసిరి, అర గంటలోనే అందులోకి ఎక్కించడం సరే – క్రమ పద్దతిలో ట్రక్కులో సర్ది పట్టించిన కార్యకర్తదొక కళ!

          నిజం చెప్పవలెనంటే – ఈ ఉషోదయాన 50 పని గంటలు ఊరి కోసం తమ శ్రమనూ,  సమయాన్ని ధార పోసిన కార్యకర్తలదెంత సంతృప్తో – నన్ను గనుక స్వేచ్చగా వదిలేస్తే – వాళ్ల దృక్పథాన్నీ, సుదీర్ఘ కాల సమున్నత లక్ష్య నిబద్ధతనీ 10 పేజీలైనా వర్ణిస్తే గాని నాకూ ఒక సంతృప్తి!

నేటి 6.25 వేళ సమీక్షా కార్యక్రమంలో ప్రస్తావిత అంశాలు :

- మంగళ, బుధ వారాల్లో ఈ ఊళ్లో జరిగే అమరావతి పాద యాత్రికుల విషయమూ- ఐచ్చికంగా కార్యకర్తలందులో పాల్గొనే సంగతీ,

- సముద్ర తీర పరిశుభ్రతా దినం గుర్తింపూ,

- సింగిల్ యూజ్ ప్లాస్టిక్ వాడకపు, ఫ్లెక్సీల నిషేధపు సంగతుల్ని గురించి కలెక్టరు గారికి, విజ్ఞాపన పత్రాల ఆమోదమూ, సంతకాలూ...

- అంతకు ముందుగా ఈ ఊరి మొక్కల విక్రేత తాతినేని వేంకట రమణుని స్వచ్చ-శుభ్ర- సౌందర్య  నినాదాలు!

          మన రేపటి వేకువ కృషి కూడ సాగర్ ప్రదర్శన శాల దగ్గరే ఉండ గలదు.           

          కావిస్తాం ప్రణామాలు – 165

అలవి కాని ఊరి పనులు తలకు ఎత్తు కొన్నాడో!

తొలి వేకువ తెలి రేకలు ఊరికి అందిస్తున్నాడో!

ప్రజాసేవ లోని మజా  ఆస్వాదిస్తున్నాడో...!

స్వచ్చ కార్యకర్త ఉషోదయ సేవకు ప్రణామం!

- నల్లూరి రామారావు,

  17.09.2022.